Облыстық денсаулық сақтау басқармасының және БҰҰ Балалар қорының (ЮНИСЕФ) ұйымдастыруымен ашылған оқу орталығы медициналық қызметтің сапасын да бақылап отырады. Орталықтың ашылуы шеңберінде облыс әкімдігі мен ЮНИСЕФ-тің Қазақстандағы өкілі арасында меморандум түзілді. Халықаралық ұйым өкілі Юрий Оксамитныймен кездескен облыс әкімі Өмірзақ Шөкеев ресурстық орталықтың ашылуы өңір үшін маңызды оқиға екенін атап өтті. «Балалардың денсаулығын жақсарту басты назарда болуы қажет. Бұл бағытта біз қолдан келген көмегімізді аямаймыз. Жақын арада орталықтың жұмысы өңірдегі аяғы ауыр әйелдер мен кішкентай бүлдіршіндері бар отбасылардың денсаулығын, әл-ауқатын жақсартуға оң септігін тигізетініне сенімдімін», деді Ө.Шөкеев. Ал ЮНИСЕФ-тің өкілі екіжақты келісімге ризашылығын білдіріп, орталықта алдағы уақытта білікті мамандар даярланатынын жеткізді. «Бала өмірінің алғашқы жылдары оның физикалық және психикалық денсаулығының әрі қарай дамуын айқындайды. Баланың миы шамамен 80%-ға үш жасқа дейін қалыптасады. Сондықтан ЮНИСЕФ аяғы ауыр әйелдер мен кішкентай балалары бар отбасыларға патронаж қызметін көрсететін бағдарламаларды қолдайды, өйткені кішкентай балалардың дамуына жәрдемдесу – балалар құқығын жүзеге асырудың ең тиімді стратегияларының бірі», деді ЮНИСЕФ-тің Қазақстандағы өкілі Ю.Оксамитный.
Білім беру ресурстық орталығы аяғы ауыр әйелдер мен кішкентай балалары бар отбасылар үшін озық үлгідегі кешенді қызмет көрсете алатын патронажды медбикелерді даярлайтын болады. Мамандардың айтуынша, мұндай тәсіл ауылдық және қалалық отбасыларға көрсетілетін қызметтердің сапасы мен халықтың оларға деген қанағаттанушылық деңгейін жақсартады. Орталықта медициналық және әлеуметтік қызметкерлер ЮНИСЕФ және ДДСҰ-ның ұсынымдарына сай ерте жастағы балалардың дамуы, дұрыс тамақтануы және оларға қалай қауіпсіз орта қамтамасыз ету керектігі жөнінде заманауи білімдерін жетілдіре алады. Оған қоса, мамандар өз білімдерін тәжірибеде іске асырады, баланың даму бөлмесінде – қандай ойындар оның толық дамуына жағдай жасайтынын зерттейді, асханада – кішкентайларға алуан түрлі және пайдалы тағамдарды қалай дайындау керектігін меңгереді. Сондай-ақ ата-аналармен қалай қарым-қатынас орнатуды және оларға дұрыс тәрбие беру жөніндегі ақпаратты бөлісуді үйренеді.
Сапалы білім беретін мекемелерді құру, денсаулық сақтау жүйесіне қажетті ана мен баланың денсаулығын қорғайтын медициналық және әлеуметтік қызметкерлердің сапасын жақсартуды қамтамасыз ету негізгі мақсаты саналатын орталық қажетті құралдармен толық жабдықталған. ЮНИСЕФ-тің денсаулық сақтау және тамақтану бағдарламасының үйлестірушісі Қанат Сұханбердиевтің айтуынша, оқу орталығының мамандары халықаралық озық тәжірибелерге сай білім алған. Бұл үлгі 2016-2017 жылдары Қызылорда қаласындағы екі емханада және Жаңақорған ауылында Денсаулық сақтау министрлігінің, ЮНИСЕФ-тің және облыс әкімшілігінің бірлескен күшімен сәтті жүзеге асырылған екен. Осы тәжірибені ескере отырып, өткен жылдан бастап бұл модель ел бойынша енгізілер аумағын ұлғайта түскен.
Түркістан облысы