Ал бұл сұранысты қанағаттандыру үшін бірқатар құзыретті органдар маңызды жобалар мен бағдарламаларды іске қосты. Соның бірі – «Баршаға арналған тегін кәсіптік-техникалық білім беру» жобасы. Осыдан екі жыл бұрын қолданысқа енгізілген бастаманың нәтижесінде қазақстандық жастардың тегін білім алуына мүмкіндік туды. Жоба Елбасы Нұрсұлтан Назарбаевтың тапсырмасымен жүзеге асырылған болатын. Оның тәртібі «Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасының бірінші бағытында айқындалған. Техникалық және кәсіптік білімі бар кадрларды даярлауды қаржыландыру жергілікті бюджет есебінен жүргізіледі. Кәсіптік-техникалық білімді тегін алуға жол ашылған алғашқы жылдың өзінде колледж табалдырығын 200 мыңға жуық жас өрен аттаған болатын. Ал өткен жылы олардың саны жүзден асты. Елімізде, 2018-2019 оқу жылында колледждерге тегін білім алу үшін 98,5 мың адам қабылданған. Жалпы жоспар бойынша 2021 жылға дейін 718 мың адам кәсіптік-техникалық білімі бар маман атанбақ, яғни білікті жұмысшы кадрларды даярлаудың көлемі 40 пайызға ұлғаяды. Тегін техникалық және кәсіптік білім техникалық, технологиялық, ауылшаруашылық, сервис және қызмет көрсету мамандықтары бойынша беріледі.
Сонымен қатар медицина, білім, өнер мамандықтары бойынша даярлық мемлекеттік білім беру тапсырысы негізінде жүзеге асырылады. Ал құқық, экономика мамандықтары бойынша даярлық ақылы негізде жүргізіледі. Жобаға 9-11-сыныптарды бітірушілер, оқу орындарына түспеген, жұмыс іздеп жүрген адамдар және тұрмысы төмен отбасылардың мүшелері, сондай-ақ көп балалы отбасылардан шыққан балалар, жетім балалар, ата-аналарының қамқорлығынсыз қалған балалар, даму мүмкіндіктері шектеулі балалар, мүгедек балалар қатыса алады.
Жоба шеңберінде колледждердің оқу үдерісіне жаңа деңгейдегі білім беру бағдарламалары енгізілді. Бұл бағдарламалардың құрылымы жұмысшы мамандығын алу барысында бірнеше біліктілікті игеруге және қалауы бойынша орта буын мамандығын алуға мүмкіндік береді.
Жоба шеңберінде мемлекеттік тапсырыс бойынша оқитын студенттер үлесі 54%-ға дейін өсті. Бұл колледж контингентінің соңғы 5 жылда болған жыл сайынғы төмендеуін тоқтатуға мүмкіндік берді. Сондай-ақ жобаға қатысушылар стипендиямен, бір реттік ыстық тағаммен, жолақымен қамтамасыз етіледі. Нәтижелі жұмыспен қамту және жаппай кәсіпкерлікті дамытуға бағытталған бағдарламада тек нарықта сұранысқа ие мамандықтарға басымдық берілген. Жоба аясында жастар кейбір мамандық бойынша колледждерге емтихансыз, сұхбаттасу қорытындылары бойынша қабылданады.
Еліміз бойынша, барлығы 821 колледж жұмыс істейді, оның 479 колледжі – мемлекеттік, 342-і – жекеменшік. Жұмысшы кадрларды даярлау 213 мамандық және 693 біліктілік бойынша жүргізіледі. Мемлекеттік колледждердегі 488,7 мың білім алушы контингентінің 275,5 мыңы мемлекеттік тапсырыс бойынша білім алуда. Жоба бастау алған жылы оқуға түскендер биыл колледжді тәмамдап, диплом алады. Яғни, өндіріске қосылмақ.
Осыдан үш жыл бұрын «Баршаға арналған тегін кәсіптік білім беру» жобасы бойынша оқытуды бастаған оқу орындарының бірі – Нұр-Сұлтан қаласындағы Қоғамдық тамақтандыру және сервис колледжі. Іргетасы сонау сексенінші жылдардың басында қаланған білім ордасы 9 мыңнан астам дайын маман дайындап шығарған. Бүгінгі таңда колледждің 911 контингенті бар. Студенттер 3 мамандық, 11 біліктілік бойынша оқытылады. Барлығы бойынша жұмысшы мамандар дайындалады. Оқу бағдарламасының 40 пайызы теориялық, ал 60 пайызы практикалы білім беруге құрылған. Практикалық білімді студенттер әлеуметтік серіктестер базасында алады. Яғни, бірыңғай практикадан өтеді.
Зәуре ҚЫЛЫШБАЕВА,
Қоғамдық тамақтандыру және сервис колледжінің директоры:
«Елордада сервис мамандықтарын дайындаймыз. Біздің негізгі әлеуметтік серіктестеріміз Астанадағы шетелдік қонақүйлер мен мейрамханалар. Кейін студенттер оқу бітіргенде сол жерлерге 100 пайыз жұмысқа орналасып кетеді. Бізде оқитын балалар 1 курстан бастап іс-тәжірибеден өтеді. Тегін білім алатын балалардың барлығына стипендия беріліп, тамақпен қамтамасыз етіледі. Тіпті жолдарына да ақша төленеді».
Биыл қоғамдық тамақтандыру және сервис колледжін 205 түлек бітіріп шығады. Олардың барлығы қазірдің өзінде жұмысқа орналасып қойған. Оқу орны әлемнің 9 елімен ынтымақтастық орнатқан. Жыл сайын студенттер колледж есебінен түрлі халықаралық жарыстарға қатысып тұрады. Өткен жылы колледж студенті Олжас Алданазар Краснодар қаласында өткен «WorldSkills» байқауында екінші орын алды. Ол байқауға мейрамхана сервисі бойынша қатысқан болатын. Ал биыл Нұр-Сұлтан қаласында өтетін байқауға оқу орнынан 6 бала қатыспақ. Қазірдің өзінде дайындық қарқынды жүріп жатыр дейді колледж директоры. Сондай-ақ кәсіптік-техникалық білім беретін оқу ордасының студенттері Краснодар қаласына барып, халықаралық фестивальден қанжығаларын майлап қайтты. Жерлестерімізге бас жүлде бұйырған екен.
Аспаздық – бұл мамандық қана емес, өнер дейді студенттер. Өйткені аспаздықты таңдағандар бар жан-тәнімен тамақ дайындауды жақсы көретіндер. Елордалық Қалымбек Атагелдиев үшінші сыныптан бастап аспаз болуды армандаған. Анасымен бірге асханада жағаласып өскен бала тамақ әзірлеуді ерте кезден меңгерген екен. Кейін мектеп оқушысы интернеттен колледж туралы бейнероликті көзі шалып қалады. Осылайша оның арманы жалғасын тауып, Нұр-Сұлтандағы тамақтану және сервис колледжінің студенті атанады.
«Мен грантқа түстім. 16 мың теңге стипендия аламын. Бұл – орташа көрсеткіш. Егер оқуыңды жақсы оқысаң 20 мыңнан астам ақша ала аласың. Мен «Хилтон Астана» қонақ үйінде тәжірибеден өтіп жатырмын. Маған дәл сондай жерлерде жұмыс істеген ұнайды. Өйткені тәжірибеден өту кезінде біз қазақстандық емес, шетелдік стандарттармен танысамыз. Біздің студенттердің көбі үшінші курста толық жұмыс істейді. Жұмыс істемейтіндері бірен-саран болар. Тіпті олар жалақы да алады. Өйткені жұмыс берушілерге де білікті маман қажет. Ал біздің студенттер өз ісінің шеберлері», дейді Қ.Атагелдиев.
Қалымбек жас болса да, үлкен іске бас болғысы келеді екен. Жай аспаз емес, Қазақстанның атын айдай әлемге танытпақ. Бозбала, тіпті «Мишлен жұлдызын» иеленемін деп отыр.
«Әуелі Америка Құрама Штаттарына «Work and Travel» бағдарламасы бойынша барып, әрі қарай Еуропаға оқуға түскім келеді. Өйткені елімізде гастрономия саласы дамымаған. ТМД елдері «Мишлен жұлдызын» әлі 50 жылдай ала алмайтын шығар.
Қалымбектің айтуынша, дәмі жағынан италиялық асхана керемет, ал технология жағынан қарайтын болсақ, француз мен жапон асханасына жетері жоқ екен. Қалымбек аспаздық өнерді мықты меңгерген студент қана емес, сондай-ақ белсенді жастардың бірі. Бос уақытында колледжде өтетін іс-шараларға жиі қатысып тұрады. Өзі секілді студенттерді үнемі қасына жинап алады. Солардың бірі – Диана Олжабай. Қалымбекке қарағанда Диана колледжге не үшін түскенін білмеген екен. Бірақ кулинарлық өнердің қыр-сырын меңгерген бойжеткен енді бұл мамандықсыз келешек өмірін елестете алмайды. Оның да арманы асқақ, болашақта Нұр-Сұлтанда теңдесі жоқ кулинарлық тағамдарды әзірлейтін дүкен ашпақ.
Гүлназ САЙЛАУҚЫЗЫ