Сенбі, 6 қазан 2012 8:05
Ресей Федерациясының Президенті Владимир Путин 1952 жылдың 7 қазанында Ленинград қаласында дүниеге келген. 1975 жылы өзі туған қаладағы университеттің заң факультетін бітірген. Бүгінде ата жасы алпысқа толып отырған оның саяси олимпке шығу жолы осы университетпен тығыз байланысты. Мұнда ол өзінің кейінгі өмір жолында белді жолбасшысы болған сол кездегі доцент Анатолий Собчакпен жақын танысады.
Сенбі, 6 қазан 2012 8:05
Ресей Федерациясының Президенті Владимир Путин 1952 жылдың 7 қазанында Ленинград қаласында дүниеге келген. 1975 жылы өзі туған қаладағы университеттің заң факультетін бітірген. Бүгінде ата жасы алпысқа толып отырған оның саяси олимпке шығу жолы осы университетпен тығыз байланысты. Мұнда ол өзінің кейінгі өмір жолында белді жолбасшысы болған сол кездегі доцент Анатолий Собчакпен жақын танысады.
Университетті бітірген Владимир Путин Мемлекеттік қауіпсіздік комитетіне (МҚК) қызметке жіберіледі. Бұл сол кездегі көп жұрттың қолы жете бермейтін таңдау-тын. Өйткені, МҚК-ге барған адам пәтермен, жақсы еңбекақымен бірден қамтамасыз етілетін. Қызмет баспалдақтарымен тезірек өсуіне де жағдай жасалатын. Ең бастысы бұл биліктің оған сөзсіз сенім білдіргенін сездіретін ишара еді. Ал ол сол кездегі жастардың көбінің басты арманы болған. Биліктің сеніміне кіру жолында болашағын қатты ойлаған қыз-жігіттер үлкен белсенділік көрсетіп бағатын. Ондай жастар тіпті студент аудиториясынан партия қатарына өтіп алуға тырысатын. Өйткені, ол жарқын болашаққа жарық сәуле түсіру деген сөз еді. Жас Владимир де сондай белсенділердің бірі болғаны көрініп тұр: ол да студент болып жүргенде-ақ партия қатарына өткен.
МҚК қатарында жүргенде түрлі курстар, аттестация сияқты сынақтардан өтіп 9 жыл бойы шыңдалған ол 1984 жылы МҚК институтының бір жылдық факультетіне оқуға қабылданады. Мұнда оған басқа пәндермен қатар неміс тілін жетік үйренуге жағдай жасалады. Оқуды 1985 жылы «сыртқы барлау» мамандығы бойынша бітірген соң кейіпкерімізді ГДР-ге жасырын қызмет атқаруға жібереді. «Барлаушылық» әрекетін ол Дрезден қаласындағы «КСРО-ГДР достық үйінің» директоры қызметімен байланыстыра жүріп 1985 жылдан 1990 жылға дейін атқарған.
Владимир Путин шетелдегі «іссапардан» оралған соң МҚК Ленинград басқармасының КСРО аумағындағы барлау бөліміне қызметке тұрады. Ал ресми қызметі ЛГУ-дің ректоры С.Меркурьевтің халықаралық мәселелер жөніндегі көмекшісі деп аталған. Демек, ол осы университетте де «барлау» жұмыстарын жүргізген сияқты.
Бұл кезең КСРО-да демократиялық қозғалыстардың бұрқ-сарқ етіп қайнап жатқан уақыты еді. Сол дүмпумен демократ депутат, аттыға жол, ауыздыға сөз бермейтін шешен, алғыр заңгер, ЛГУ-дің профессоры Анатолий Собчак Ленинград қаласы кеңесінің төрағасы болып сайланады. Ескі таныстығының арқасында Владимир Путин оның кеңесшісі болып ауысады. Ал 1991 жылы Собчак қаланың мэрі болып сайланғанда Владимир Путин сыртқы байланыстар жөніндегі комитеттің төрағасы қызметіне тұрады. Осы істе жүргенде оның іскерлігі алғаш рет көзге түседі. Мэрдің қолдауына сүйене отырып ол Санкт-Петербургке шетелдік фирмалардан инвестиция тарту жұмысын жақсы жолға қояды. Өзінің іскерлігі әрі тиянақты орындаушылығымен ол А.Собчактың сеніміне кіре түседі. 1994 жылдан бастап Санкт-Петербург билігі төрағасының бірінші орынбасары қызметіне көтеріледі. Артынан осы қалада өзімен бірге қызмет еткен И.Сечин, Д.Медведев, В.Зубков, Г.Греф, А.Миллер Д.Козак, С.Нарышкин және тағы басқаларды Ресейдің билік олимпіне шыққанда өзімен бірге алып жүріп, түрлі орынтақтарға отырғызды.
1996 жылы Анатолий Собчак губернатор сайлауында жеңіліп қалды. Бірақ оның іскер командасы жұмыссыз қалған жоқ. Көбі Мәскеуден орын тапты. Владимир Путин де Ресей Президенті Іс басқарушысының орынбасары қызметіне шақырылды.
Сол, 1996 жылдың тамызынан 1999 жылдың тамызына дейінгі үш жылда Владимир Путин адам таңғаларлық карьера жасады. Көптеген адамдар олимпке ұзақ жылдар бойы халыққа танымал болып, қайраткерлік істерімен көзге түсіп, көпшілікке белгілі орындарда жүріп көтерілетін болса, ол үн-түнсіз келіп, биіктен бір-ақ шықты деп айтуға болады. Алдымен ол Іс басқарушының орынбасарлығынан 1997 жылы Президент Әкімшілігі басшысының орынбасарына, бірінші орынбасары қызметіне көтерілді. 1998 жылғы шілдеде Федералдық қауіпсіздік қызметі директоры қызметіне тағайындалады. Арада бір жыл өтпей жатып, 1999 жылдың тамыз айында ол Ресей Федерациясы Үкіметінің Төрағасы болды. Дәл сол күні Б.Ельцин халыққа теледидар арқылы айтқан сөзінде оның өзінің ізбасары болатынын ашық айтты. Әрине, Ресейдің билік басындағы адамдар арасында сол кезде көпке танылған беделді қайраткерлер көп еді. Бірақ Б.Ельцин оларды емес, көп жұрт біле бермейтін Владимир Путинді таңдағаны таңқалдырарлық іс. Бұл арада Б.Ельцин белгілі адамдардың белгісіз қырлары көп болатынын, ал белгісіз адам белгілеп берген жолдан таймайтынын қатты ескерсе керек. Соның есесіне Владимир Путиннің де Президенттің міндетін атқарушы ретінде бірінші қол қойған құжаты бұрынғы Мемлекет басшысының барлық қауіпсіздігіне кепілдік беретін жарлық болды.
Владимир Путиннің Үкімет басшысы болған уақыты чешен жанкештілерінің Дағыстанға басып кіруі, Буйнак, Мәскеу және Вола мен Донда террористердің тұрғын үйлерді жаруымен сәйкес келді. Бәрінде де Владимир Путин салқынқандылық көрсетіп, лаңкесшілер деп танылған жандарға қатты соққылар берді. Бұл істер оның халық алдындағы беделін көтеру үшін әдейі ұйымдастырылған деген пікірлер айтылғанымен, іс жүзінде бәрібір оның рейтингі арта түсті. 1999 жылдың 31 желтоқсанында Б.Ельцин биліктен өз еркімен кетіп, президенттің міндетін атқаруды Владимир Путинге жүктеді. Осы кезден бастап Владимир Путин Ресей Федерациясындағы жоғарғы билікті уысынан шығарған емес. Ол 2000-2008 жылдар аралығында екі рет Президент болып сайланды, ал 2008-2012 жылдарда өзінің ұзақ жылдардағы сенімді серігі Д.Медведевтің сайлануына жағдай жасап, өзі Үкімет басшысының міндетін атқарды. Ал биыл ол қайтадан Президент болып сайланды.
Владимир Путиннің билік басындағы уақытын көптеген адамдар орталық билікті күшейту үшін демократияны, сөз бостандығын шектей бастағанымен байланыстырады. Адам құқын қорғау жөніндегі уәкіл В.Лукин Владимир Путиннің билік құрған кезеңі Ресейде шовинизм пен расизмнің, ұлттық азшылықтарға қысым көрсетудің қатты өскенімен сипатталатынын айтады. Бұл істің бір мысалына Владимир Путиннің ұлттық аймақтар мен республикалардың орта мектептерінде жергілікті халықтың тілін қоса оқытуды алдырып тастаған 309-шы заңды қабылдағанын көлденең тартады. Бірақ экономикалық көрсеткіштер бойынша путиндік Ресей 90-жылдарда жоғалтқан позицияларын толық қайтара отырып, жаңадан, бұрын-соңды болмаған өміршең секторларды шұғыл дамытуға қол жеткізді. Қазір Ресейдің алтын-валюталық қоры дүниежүзінде үшінші орынға шыққан. Экономиканың дамуына орай халықтың тұрмысы да жақсара түсуде.
Владимир Путин өзін Қазақстанның досы санайды. Екі елдің арасындағы саяси, экономикалық ынтымақтастықтар Владимир Путин Ресейді басқарған жылдарда жақсара түсті. 2012 жылы Президент болып сайланғаннан кейін бізге келген сапарында ол өзінің Қазақстанға тек қуанышты көңіл-күймен келетінін, біздің елдеріміздің арасындағы экономикалық мүмкіншіліктерімізді кооперациялайтын Кеден одағы, БЭК сияқты айрықша қатынастың қалыптасқанына тәнті екенін атап өтті. Сонымен бірге, ол 2011-2012 жылдарға арналған Бірлескен іс-қимыл жоспарының табысты түрде іске асып жатқанына қанағат білдірді. Және Ресей Президенті Қазақстанмен инновациялық ынтымақтастықты дамыту бағытындағы жобаларды іске асыру бүгінгі күні стратегиялық бағыт екенін айтып отырады.
Жақсыбай САМРАТ,
«Егемен Қазақстан».