Президент Қ.К.Тоқаев ұлы бабамыз, әлемнің екінші ұстазы атанған ғалым, ойшыл әл-Фарабидің туғанына 1150 толуын атап өту жөнінде арнайы Жарлық шығарған болатын. Кемеңгер тұлға мұралары бұған дейін де жан-жақты зерттеліп, көптеген еңбегімен зерделі оқырман жақын танысты деуімізге болады. Ғұламаның атақты еңбектерінің бірі «Қайырымды қала» деп аталады.
Халық мұрасы атанған бұл трактатта әл-Фараби ел билеуге қажетті қасиеттерді санамалап, оның негізгі талаптарын атайды. Бұл принциптер күні бүгінге дейін өзінің өзектілігін жойған жоқ.
Ел билеу үшін адам бойында қандай қасиеттер болуы керек?! Бұл туралы ұлы бабамыз не дейді? Оны түсіну үшін данышпан, кемеңгер бабамыздың аталған еңбегіне назар аударған жөн. Жоғарыдағы сұрақтарға осы трактаттан жауап аласың.
Ғалым ойынша қала «ел, ұлт» деген мағынаны білдіреді. Сондықтан да қала басшысы болу үшін қандай қасиеттер керек? Оның басты қағидаты мынада: «Ол – иман, ол – қайырымды қаланың бірінші басшысы, ол – қайырымды халықтың басшысы және жер жүзін мекендейтін елдің басшысы. Өз бойында туа біткен он екі қасиетті ұштастырған адам ғана осындай (билеуші – У.Қ.) бола алады».
Иә, әл-Фараби өз заманының оза туған ғалымы, ойшылы, данагөйі ретінде басшы болатын адамның қасиеттерін әр тұрғыдан қарастырады. Басшыға лайық адамның тұтас келбетін көрсетеді.
Ойшыл бабамыз ел билейтін адамның қасиеттерінің бірі «адамның мүшелері мүлдем мінсіз болуға тиіс» деп жазады. Қазіргі заман тұрғысынан қарағанда ел билеушінің жұртты өзіне қаратып, тартып алатын қасиеті болуы шарт. Яғни, «харизматикалық» деген ұғымды білдіреді.
Ресейдің бұрынғы Президенті, марқұм Борис Ельциннің: «Сіздердің сөзі қай жерде де өтетін, келбетті Нұрсұлтан Назарбаевтай Президенттеріңіз бар ғой. Сондықтан да Ресей мен Қазақстан арасындағы барлық мәселені нөлдік жағдайда шештік», деп Кремльде айтқан сөзі Елбасының харизматикалық бет-бейнесінің айғағы емес пе?!
Биліктегі адам «жаратылысынан өзіне айтылғанының бәрін жете түсінетін, айтылған сөзді сөйлеушінің ойындағысындай және істің жай-жағдайына сәйкес ұғып алатын болуы керек».
Мұны да қазіргі жағдайға салып қарасақ «халық сөзін еститін және тыңдайтын» адамның бейнесін көреміз. Ел тұтқасын ұстаған Қ.Тоқаев бір жылдың ішінде өзінің халықтық, білімді және білікті саясаткер екенін дәлелдеді.
Казіргі әлемдік індет, коронавирус тарап отырған кезде де Президент Қ.Тоқаев халықтан ештеңені жасырған жоқ. Қиын сәтте халықтың сөзін сөйледі. Үкіметке нақты тапсырмалар берді. Қазақстанның барлық буынына көмек көрсетілетінін айтты. Өзін-өзі қамтамасыз ететін адамдар да осы санатқа енді. Олардың көпшілігі ауылдық елді мекендерде тұратыны белгілі. Сондай-ақ зейнеткерлер де қамқорлықтан тыс қалған жоқ. Көктемгі егіс кезіндегі жағдайға орай қандай көмек көрсетілетіні туралы да сындарлы сөз айтты.
Данышпан бабамыз «Өзі түсінген, көрген, естіген және аңғарған нәрселердің бәрін жақсы сақтайтын, бұлардан еш нәрсені ұмытпайтын болу керек» деп ескерткен еді.
Байыбына қарап, бағамдасақ мұның ар жағында өз сөзіне өзі жауап беретін, сөз бен ісінде алшақтығы жоқ адамның бейнесі келеді.
Әл-Фараби жазады: «...Әйтеуір бір заттың кішкене ғана белгісін байқаған заматта сол белгінің ишаратын іліп әкетерліктей, алғыр да, аңғарымпаз ақыл иесі болуы шарт». Яғни, алғырлық, аңғарымпаздық, ақылдылық сынды қасиеттер басшының бойында неғұрлым көп болса, соншалықты халқының да жағдайы жақсы болады.
Ел билеуші бойында тағы бір қасиет болуы қажет. Билеуші «өткір сөз иесі және түйгенінің бәрін айдан анық айтып бере алатын тілмар болуы шарт». Әрине, бұл қасиет кез келген билеушінің қолынан келе бермеуі мүмкін. Мәселе сөзуарлық туралы болып отырған жоқ. Айтқанына жұртты иландыра алатын шешен де, көсем де болатын тұлғаға лайық ұғым. Би-шешендерден қалған сөз – соның айғағы.
Біздің заманымыздан бұрынғы, шамамен 620-555 жылдары өмір сүрген Анахарсис қалдырған мына жолдарға назар аударалық:
Менің бар жамылғым –
Сақтың шапаны,
Етігім – аяғымның терісі,
Таңғы асым мен түстігім –
Сүт, ірімшік және қуырдақ,
Сусыным – су.
«Халқымның сұлтаны емес – ұлтанымын» деген сөз осындай замандардан қалған жәдігер.
Күлтегін айтады:
Сонау бастан, о бастан,
Бір-біріне жарасқан,
Жаралғалы қара жер,
Жаралғалы Көк Аспан,
Естеми мен Бұмынның,
Адамзаттың бағы асқан.
Төрт бұрышы дүниенің,
Соларменен санасқан.
Бүкіл түркі әлемі,
Екеуіне қарасқан.
Міне, қаншама жылдар, ғасырлар ауысса да ұлы тұлғалардың есімі өшкен жоқ. Есімдері тарихта қалды.
Бұқар жырау бабамыз Хан Абылай ауырып жатқанда көңіл сұрай барып:
Қайғысыз ұйқы ұйықтатқан,
ханым-ай,
Қайырусыз жылқы бақтырған,
ханым-ай,
Қалыңсыз қатын құштырған,
ханым-ай,
Үш жүзден үш кісіні құрбан қылсам,
Сонда қалар ма екен қайран,
жаның-ай»
деген сөздің ар жағында Абылай ханға деген халық махаббаты тұр.
«...Өнер білімге құштар болу, оқып үйренуден шаршап шалдықпай, осыған жұмсалатын еңбектен қиналып азаптанбай, бұған жететін болуы керек» дейді әл-Фараби.
Бұл – ұлағат. Бабамыздың ойын тереңірек түсіну үшін ұлы Абай хакімнің қырық бірінші қара сөзіне жүгінген жөн.
– Қазаққа ақыл керек, түзеймін деп қам жеген адамға екі нәрсе керек, – дейді хакім Абай. – Әуелі – бек зор өкімет, жарлық қолында бар кісі керек».
Ал жарлық кімнің қолында болады? Әрине, билік иесінде. Басында бақ, астында тағы бар адамның қолында болмақ. Сол жарлықты Абай бабамыз халықты оқыту, білім-ғылымға үйрету үшін жұмсау керек деп біледі. «...Дүниеде көп есепсіз ғылымның жолдары бар, әрбір жолда үйретушілерге беріп, сен бұл жолды үйрен, сен ол жолды үйрен деп жолға салып, мұндағы халыққа шығынын төлетіп жіберсе, хәтта қыздарды да ең болмаса мұсылман ғылымына жіберсе, жақсы дін танырлық қылып үйретсе, сонда сол жастар жетіп, бұл аталары қартайып, сөзден қалғанда түзелсе болар еді».
Әл-Фараби бабамыздан қалған мұраны Абай хакім де аманат, ұлағат етіп бізге тастап кетті.
Бүгінде қос данышпанымыздың өсиеті орындалып жатыр. Оның куәсі болып отырмыз. Дарынды балаларымызға арналған мектептер бар, Назарбаев Зияткерлік мектептері жұмыс істейді. Он үш мыңнан астам талантты қыз-жігіт әлемнің озық университеттерінде білім алып келді. Қазір олар жоғары билікте, экономикада, саясатта, бизнесте, квазисекторларда жауапты жұмыстар атқарып жүр.
– «...Тағамға, ішімдік ішуге, сұхбат құруға келгенде қанағатшыл болуы керек, жаратылысынан сауыққұмарлықтан аулақ болып, бұдан алатын ләззатқа жирене қарауы шарт» деген сөздерді де әл-Фараби үлкен лауазымды қызметкер сақтанатын қасиет деп есептейді.
Мемлекетті басқару бақытына ие болған адамның қаперінен шықпайтын тағы бір маңызды шарт бар. Ұлы ойшыл «...шындық пен шыншыл адамдарды сүйіп, өтірік – жалған мен суайттарды жек көруі керек, жаны асқақ және ар-намысын ардақтайтын болуы шарт, оның жаны жаратылысынан пасық істердің бәрінен жоғары болып, жаратылысынан игі істерге ынтызар болуға тиіс» деген сөздердің еш уақытта ескірмейтін, өшпейтін мұраты бар.
Кез келген билеуші қасына жаны таза, ары таза, шындықты жақтайтын, ешкімнің ала жібін аттамайтын адамдар жүруі керек деп есептейді.
Қазақтың батыр ұлы Бауыржан Момышұлы: «Шындық бар ма?» деген сұраққа былай деп жауап берген ғой: «Шындық бар. Бірақ шындыққа шырылдап жетем дегенше өсек пен өтірік алдыңды өртеп жібереді».
Ойшыл, данагөй бабамыз «Қайырымды қаланың» басшысы бойындағы ең асыл қасиеттердің бірі оның адалдығы деп біледі. Оқиық: «...дирхем, динар атаулыға жалған дүниенің басқа да атрибуттарына жирене қарауы керек, жаратылысынан әділеттілік пен әділеттілерді сүйіп, әділетсіздік пен озбырлықты және осылардың иелерін жек көру керек».
«Алтын көрсе періште жолдан таяды» деп халық бекер айтпаған ғой. Осы ойды ғұлама әрі қарай тереңдете түседі. «...жақындарына да, жат адамдарға да әділ болып, жұртты әділдікке баулып, әділетсіздіктен зардап шеккендердің залалын өтеп, жұрттың бәріне өз білігінше жақсылық пен ізгілік көрсетіп отыруы қажет, әділ болу керек, бірақ қыңыр болмауы керек». Нағыз ұлттық философия осы. Адамзаттың бәріне қажет құндылық және ұлағат.
Бұл ойды әл-Фарабидің замандастары да, кейінгі данагөй ойшылдар да айтқан.
Ж.Баласағұни өзінің атақты «Құтадғу білік» атты ізгілік кітабында былай дейді:
«Турашыл ер – тілі шындық,
тыңдалық
Түгел сөздің түп атасы – туралық.
Тура жүр де зұлымдықты жебеме,
Қараны аққа, қараға ақты
теңеме демей ме?
Ұлы Абай бабамыз Отыз сегізінші қара сөзінде «ынсап, ұят – бұл ғаділеттен шығады» дейді. Бұл – ойшылдар үндестігі.
Әл-Фараби берік шешім айта алу билеушіге тән қасиеттердің бірі деп есептейді. «...Қорқыныш пен жасқану дегенді білмейтін, батыл, ержүрек болу керек» деген сөзі осының айғағы.
Әл-Фараби ілімін түсінуге талаптана отырып «Қайырымды қала» басшысы болу үшін қандай қасиеттер керек екенін білдік. Бірақ осылардың бәрі бір адамның бойында болуы мүмкін бе? Бұған данышпан әл-Фарабидің өзі жауап береді. «Кімде-кім туған кезінен бастап және жас жеткіншек шағында жоғарыда аталған шарттарды бойына дарытқан болса және есейгеннен кейін басқа алты шартқа сай келетін болса, біріншісінің орнын басатын екінші басшы сол болады».
Міне, өмір осыны дәлелдеп отыр. Саяси сыннан өткен, әлемдік өркениет жолы дамуының негіздерін білетін, саяси сарапшы, Сыртқы істер министрі, Үкімет басшысы, Сенат Төрағасы, Біріккен Ұлттар Ұйымының жетекшісінің орынбасары болған Қ.К.Тоқаевтың Мемлекет басшысы болып сайлануы осындай сындарлы сыннан өткендігінің көрінісі.
Ғұлама ғалым ел басқаруға лайық адамның тағы алты қасиетін алға тартады. Олар «дана болу», «заңдарды, ережелер мен әдеп ғұрыптарды жадында сақтап жетік білу, өзінің барлық іс-әрекетін осыларға сәйкес жүргізу», «бұрынғылардан тиісті заң сақтамаған жағдайда, бірінші имандардың (Ата заң – У.Қ.) үлгісімен әрекет жасай отырып, бұл жөнінде тапқырлық көрсету», «...болашақ оқиғаларды да қалаған кезінде танып біліп отырарлықтай тапқыр да білгір болу, өзінің осындай іс-әрекеттерінде ол халықтың әл-ауқатын жақсартуды мақсат етуге тиіс», «...өзі белгілеген заңдарды орындауға жұртты өз сөзімен жігерлендіре білу», «әскери істерді жүргізу үшін қажетті дәрежеде қайратты болу, оның бер жағында әскери өнерді қызмет бабындағы өнер ретінде және билеуші өнер ретінде біліп алу».
Данагөй ғалым, данышпан ретінде әл-Фараби бабамыз ойға ой қосады. Ал осы алты қасиет бір адамның бойында болмаған жағдайда не істеуге болады? Осыған орай ойшыл төмендегідей қорытынды жасайды. «...Егер осы қасиеттер бір топ адамның бастарына бөлек-бөлек біткен болса, сөйтіп бірінде даналық, екіншісінде тағы бір қасиет, үшіншісінде тағы бір, бесіншісінде тағы бір, алтыншысында тағы бір қасиет болса, онда осы адамдар өзара келіскен жағдайда, бәрі де қайырымды басшылар болмақ».
Кез келген мемлекет тарих сынынан өтеді. Біздің еліміз де ауыр сындарды басынан өткізді. Елтұтқа болған адамдар халықты талай тығырықтан алып шықты. Біз Егемен, Тәуелсіз мемлекет ретінде саяси сахнаға шықтық. Әлем мойындады, өркениетті отыз елдің санатына қосылуды мұрат етіп отырмыз.
Тарихи, әдеби мұраларымызды зерттеп, зерделеп жатырмыз. Әл-Фараби бабамыздың ұлы мұраттары да жаңа заманның жаңа адамдарын қалыптастыруға, тәрбиелеуге ықпал ететіні сөзсіз.
Әл-Фарабидің даналық ойларын ана тілімізге аударған Қ.Сағындықов, М.Жанғалин, М.Ишмухаммедов сияқты сөз зергерлеріне жас ұрпақ риза ғой деп ойлаймын.
Хакім Абай:
Білімдіден шыққан сөз,
Талаптыға болсын кез.
Нұрын, сырын көруге,
Көкірегінде болсын көз – дейді.
Бабалар рухы асқақтап, қазақ елінің Көк байрағы желбірей берсін.
Уәлихан ҚАЛИЖАНОВ,
ҰҒА академигі, Қазақстанның еңбек сіңірген қайраткері