Кеше Үкіметтің баспасөз орталығында Премьер-Министрдің орынбасары Ералы Тоғжановтың қатысуымен ел аумағында төтенше жағдай режімінің аяқталуы туралы брифинг өтті.
Мемлекет басшысы Қ.Тоқаев мәлімдегендей, 11 мамырдан бастап елімізде төтенше жағдай режімі аяқталды. Алайда Е.Тоғжановтың айтуынша, қауіп әлі бар және қатерлерді ескермеуге болмайды. Сондықтан карантин шаралары жалғасады. Шектеу шаралары әрбір өңірдегі эпидемиялық ахуалға байланысты кезең-кезеңмен алынып тасталады.
«Карантин шараларын жеңілдетуді біз 20 сәуірден бастадық. Осы кезең аралығында 1,1 млн адам жұмысын қайта бастады. Бүгіннен бастап аумағы 2 мың шаршы метрге дейінгі азық-түлік емес дүкендер, сұлулық салондары, балаларды дамыту орталықтары жұмысқа кіріседі. Саябақтар мен гүлзарларда адамдардың серуендеуіне рұқсат етіледі. Саябақтардың жанындағы ойын-сауық қызметтерінің жұмысы әлі шектеледі», деді Премьер-Министрдің орынбасары.
Сонымен қатар спорттық жаттығулар өткізуге, мәдениет қызметкерлеріне репетициялар жүргізуге рұқсат етіледі. Жұмыс істейтін ата-аналар үшін балабақшаларда санитарлық нормаларды сақтаумен кезекші топтар ұйымдастырылады.
Е.Тоғжанов 11 мамырдан бастап Президенттің шешімі бойынша әуе қатынасы еліміздің тағы 7 қаласында ‒ Ақтөбе, Қарағанды, Көкшетау, Қостанай, Павлодар, Тараз, Талдықорған шаһарларында ашылғанын айтты. Нұр-Сұлтан, Алматы қалаларынан Өскемен, Семей, Павлодар, Қызылорда және Петропавл қалалары арасында әуе рейстері 1 мамырдан бастап қалпына келтірілген еді.
Сондай-ақ ішкі әуе қатынастары үшін ПТР-тест тапсыру мәселесі қоғамдық талқыға түскен еді. 11 мамырдан бастап мұндай талап болмайды. Дегенмен, ұшу кезіндегі санитарлық бақылау бұрынғысынша сақталады: олар – жолаушылардың дене температурасын өлшеу, отырғызу және ұшақтан шығу кезіндегі әлеуметтік қашықтық және маска тағу.
«Бақылау бекеттерінің жұмысына қатысты сұрақтар да көптеп түсіп жатыр. ТЖ режімі тоқтатылғанына қарамастан, олар әлі де әрекет етіп тұрады. Алайда қала маңында тұратын, бірақ қалада жұмыс істейтін және керісінше қалада тұрып, қала шетінде жұмыс істейтін азаматтар өңірлер әкімдіктерінің бекітілген тізімі бойынша блок-бекеттерден өте алады», деп атап өтті вице-премьер.
Білім саласына тоқталар болсақ, 3,3 млн оқушыны және ЖОО-лар мен колледждердің 1 млн студентін қашықтан оқыту оқу жылының соңына дейін жалғасады. Аттестаттарды табыстау мен соңғы қоңырау мектептерде 3-4 маусымда ашық алаңда, санитарлық нормалар қатаң сақталып өткізіледі. Айта кетейік, ҰБТ-ны 20 маусымнан бастап 168 пункт базасында қатаң санитарлық ережелерге сай штаттық режімде өткізу жоспарланған.
Е.Тоғжановтың айтуынша, кәсіпкерлер мен тұрғындардан сауда ойын-сауық орталықтарының, мейрамханалар мен қонақүйлердің жұмысын қайта бастауға қатысты көптеген сұрақ келіп түсуде.
«Бұл кезеңде олардың жұмысқа кіріспейтінін ерекше атап айтқым келеді. Бұл мәселе өңірлердегі санитарлық-эпидемиялық ахуалды ескерумен сәл кейін қарастырылатын болады», деді Премьер-Министрдің орынбасары.
Вице-премьер ендігі кезекте экономикалық белсенділікті кезең-кезеңімен ретке келтіріп, азаматтар үшін қалыпты тіршілік жағдайларын жасау міндеті тұрғанын атап өтті.
«Карантиндік шектеулер әрбір адам үшін құндылықтарды қайта бағалап, өзі мен өз ортасына жауапкершілігін арттырды. Күнделікті өмірімізде гигиеналық, санитарлық талаптарды сақтау, қауіпсіздік шараларын орындау қалыпты жағдайға айналып отыр. Коронавирус инфекциясының тарау қаупі тұрақталып келе жатқанына қарамастан, әлі де карантиндік шаралардың сақталуы аса маңызды», деді ол.
Карантин режімі аяқталғанымен оның шарттары әлі де сақталады. Шектеу шаралары әр өңірдің жағдайына байланысты жеке қаралып, оны жеңілдету туралы шешім кезең-кезеңімен шығарылып отырады.