Ауданда 2010 жылдан бастап оқушылар спартакиадасы, «Еске алу» жобасы өткізіліп келеді. Мақсат – балалар мен жасөспірімдерді спортқа баулу мен елге еңбегі сіңген адамдардың есімін ұлықтау, құрмет көрсету. Жыл бойы өткізілетін спорттық шаралар осы жобаға енген адамның құрметіне арналады.
Бұл игі іс бүгінде аудан орталығы Аққулы ауылындағы Балалар және жасөспірімдер спорт клубының директоры Тоқтамыс Кенжеғалиевтің бастамасымен жалғасуда. Өткен жыл Социалистік Еңбек Ері Жұмабек Жанғожинге арналыпты.
Кейінгі ұрпақ есімін білсін деген Жұмабек Жанғожинмен бірге Социалистік Еңбек Ері атанған Жанпейіс Сыздықов, Балғабай Оспанов, Жұмахан Асылхановтар болса, ал Жоламан Қалымов, Керімхан Ибрагимовтар аудандағы Бесқарағай асыл тұқымды қой зауытында еңбек етіп, солтүстік қазақ меринос қойының тұқымын шығаруға үлес қосқан екен.
Ал биылғы спорттық шаралар Социалистік Еңбек Ерлері Күләй Шарбақбаева мен оның баласы Ғабдынасыр Ерғалиұлының құрметіне арналады.
– Мен Күләй Шарбақбаеваның немересімін. Апамыздың еңбек жолы жалғасуда. Ұрпақтары да ауылда қалып, мал шаруашылығымен айналысуда. Аудандық спорттық спартакиаданың биыл біздің әулетімізге арналатынын естіп ерекше қуандық, – дейді Нұрсұлу Шарбақбаева.
Біз де бір жылы апамыз жайлы жазу үшін ауданға барып қайтқан едік. Күләй апамыз 1958 жылы Социалистік Еңбек Ері атағын алған. Он жыл бойы қой баққан адам. Жыл сайын қозылар санын көбейткен қой өсірудегі бұл әдісті бүкіл ел «Шарбақбаевтар конвейері» деп атаған.
Кейін анасының ақ таяғын иеленген ұлы Ғабдынасыр да 1981 жылы Социалистік Еңбек Ері атағын алады.
Ал Шабар ауылына Дінмұхамед Қонаев келгенін жұрт осы күнге дейін айтады.
– Дінмұхамед Қонаев 1958 жылы облысқа сапармен келіп, арнайы біздің ауылға атбасын бұрып, шешеміздің үйіне соқты. Үлкен адамның кішкентай ауылға келуі мереке болды. Ол кісі анамыздың жоғары марапатына құтты болсын айта келіпті. Сонда Қонаев ағамыз ескі үйімізді көріп «батыр батырға лайық үйде тұруы керек» деген еді, – деп еске алған еді сол кезде көзі тірі Ғабдынасыр ата.
Аққулы ауылындағы тарихи-өлкетану музейінде есімдері ел есінде қалған адамдардың құжаттары, қолданған заттары, фотосуреттері қойылған.
– Бұл жобада қай жылы қандай адамға құрмет көрсетілетіні де белгіленген. Аудандағы ел аузында аты қалған адамдардың есімдерін жаңғырту, соғыс және бейбіт күн батырларының ерлігін кейінгі ұрпаққа жеткізу – бізге міндет. Осы жоба бойынша 2014 жылы Әбілқайыр Баймолдин зиратына тәу етіп, Ресейдің Невель қаласына дейін бардық. Қала тұрғындары жерлесімізді ерекше құрметтейді екен, – дейді Тоқтамыс Жәнібекұлы.
Павлодар облысы,
Аққулы ауданы