Коронавирус пандемиясы салдарынан Сингапурдың экономикасы осы жылдың екінші тоқсанында бірінші тоқсанмен салыстырғанда 41,2 пайызға қысқарды. Мұндай мәліметтерді сауда және өнеркәсіп министрлігі жариялады, деп жазады Egemen.kz
Техникалық рецессияны көрсететін бұл құлдырау қатарынан екі тоқсан бойы жалғасуда. Бірінші тоқсанда ЖІӨ 3,3 пайызға қысқарды. Жылдық көрсеткіште әлемдегі ең бай елдердің бірі Сингапур экономикасы 12,6 пайыздық құлдырауды бастан кешіруде. Бұл – тәуелсіз Сингапур тарихындағы (1965 жылы) рекордтық құлдырау.
Тоқсандық көрсеткіште өндіріс көлемі 23,1 пайызға, құрылыс 95,6 пайызға төмендеді, ал қызмет көрсету саласындағы құлдырау 37,7 пайызды құрады.
Сингапур билігі коронавирус пандемиясы кезінде адамдарға тікелей көмек ретінде 2,5 миллиард доллар бөлді. Ел экономикасын қолдауға ЖІӨ-нің 20 пайызы (70,3 миллиард доллар) бағытталған.