Індет жұқтыру қарқыны тежелді

«Денсаулық сақтау минис­­тр­лігінің ресми өкілі ретін­де апта сайын еліміздегі эпи­де­мия­лық ахуал жөнінде және халыққа көрсетіліп жатқан меди­циналық жәрдем туралы ақпарат беріп тұрамыз. Соны­мен қатар індетке қарсы күрестің нәтижелері жа­йын­­да баяндаймыз. Осы орай­да Денсаулық сақтау минис­трлі­гі­нің өзіндік медиа орта­лы­ғы іске қосылғанын еске салғым келеді. Оның негізгі міндеті – қоғамдық ортамен, ақ­парат құралдарымен және мемлекеттік органдармен ара­да­ғы байланысты нығайту. Ми­нис­трліктің атына келіп түсетін арыз-шағымдарға жедел жауап беруге әзірміз. Баспасөз мәжілісінде қойылатын сұ­рақ­тардан бөлек, менің жеке парақшама жіберілген сұрақ­тар­ды, әлеуметтік желіде айтылатын сауалдардың барлығын қам­туға тырысамыз», деді Бағдат Қожахметов.

Бұған қоса Денсаулық сақтау министрлігінің ресми өкілі коронавирусты жұқтыру өсімі тоқтағанын атап өтті.

«Қазақстанда коронавирус­­­ты жұқтыру өсімі тоқтады. Ел бойынша жағдай айтарлықтай жақсарды. Атқарушы билік ахуалды қатаң бақылауда ұстап отыр. Медициналық қауым­дастықтың санитарлық-эпи­де­мия­лық қызметі өзіне жүк­тел­ген міндетін толық көлемде орын­дап жатыр. Осы­лай­ша елі­міз ең күрделі кезеңді артта қалдырды десек болады. Бірақ жеткен жетістікке қуанып, бо­саңсуға болмайды. Ендігі мін­де­тіміз – індетті жұқтыру мен өлім-жітімді тоқтату. Осы ретте барша қазақстандықтарға сани­тарлық ережелерді орын­дау­­­­ға шақырамын», деді Б.Қожахметов.

Ресми статистикаға тоқ­тал­ған ол коронавирусқа шал­дыққан науқастардың арасында 246 адамның денсаулығы нашар, 69 адамның денсаулығы өте нашар екенін мәлімдеді. Биыл 13 наурыздан бас­тап Қазақстанда коронавирус инфекциясымен 99 442 адам ауырды. Жазылып шық­қан науқастардың саны – 72 523 немесе 72,9 пайыз. Стационарларда 4 713 науқас ем қабылдауда және 20 937 адам амбулаторлық жағдайда емделуде. Жалпы 70 науқас өкпені жасанды желдету аппаратында жатыр. Соңғы бір тәулікте COVID-19 вирусын 741 адам жұқтырды.

«1 тамыздан бастап коронавирус инфекциясы және оған ұқсас белгілері бар пневмония деректерін статистика қатарына қостық. Осыдан кейін еліміз індеттің таралу көрсеткіші бо­йынша әлемдік рейтингте бір сатыға ғана көтерілді. Бұған дейін біз 27-орында болсақ, қазір 26-орынға тұрақтадық. Бірақ бұл көрсеткішке қарап жігерді жасытуға болмайды, біз үшін ең маңыздысы – күресті күшейтіп, жағдайды одан әрі жақсарту. Қабылданған шаралардың нәтижесінде қазір қолымызда жан-жақты сара­ланған мәліметтер бар. Бұл бізге болашаққа жоспар құрып, алдын ала дайындалуда мүмкіндік береді. Яғни індеттің күзде күтілетін жаңа толқынына қарсы тұру үшін материалды әрі адами ресурс­тар­ды толығымен дайындауға жағ­дай жасалды», деді Б.Қожахметов.

Сондай-ақ ол елімізде дәрі-дәр­мек тапшылығы мәселесі қалай шешіліп жатқанын айтты.

«Провизорлық орта­лық­тар­да жедел әрекет ету үшін медқызметкерлерді дайындаудан бөлек, дәрі-дәрмектермен толықтыру бойынша ауқымды жұмыс атқарылуда. КВИ-ға ұқсас белгілері бар пневмония­мен сырқаттанған науқастар үшін алдын ала бір айлық қорға есе­п­телінген аппараттар сатып алынды. Өңірлерге 8,7 млрд теңгенің 91 түрлі дәрі-дәрмегі жөнелтілді. Бұл орташа есеппен 40 мың науқасқа жетеді», деді Б.Қожахметов.

Оның сөзіне қарағанда, 15 тамыздан бастап тағы екі айға жететін қор әзірленеді. Стационардағы 200 мың нау­қас­қа жететін дәрі-дәрмектің 50 түрі әзірленді. Сонымен қатар амбулаторлық жағдайда ем алатын бір миллион науқасты емдеу­ге арналған дәрі-дәр­мек­тің 5 түрін сатып алу процесі аяқталуда. Дәл осындай ауқымды шаралар алғашқы рет қа­былданып отыр.

«Сырқаттанып, вирус жұқ­ты­ру бойынша күдік­тен­се­ңіз, тіркелген емханаға барып қаралсаңыз болады. Егер вирус жұқ­тырғаныңыз анықталса, бұ­рынғыдай дәріхана жағалап жүрмей-ақ қойыңыздар! Бар­лық емханаларда қажетті дәрі-дәрмек бар және ақысыз бе­рі­ле­ді. Атап айтқанда, парацетамол, ибупрофен және басқа да қажетті препараттар еліміздің барлық емханасына жеткізіледі. Дәрі-дәрмектерді жеткізу «СҚ-Фармация» компаниясы тарапынан жүргізіліп жатыр», деді ол.