Ежелден талай тарихи оқиғаларға негіз болған Әулиеата өңірінде, екі мың жылдан астам жылнамасы бар көне Тараз шаһарында туризм саласын дамытуға қолайлы орындар жетерлік. Алайда өңірде аталған мәселе жиі көтерілгенімен, туризмді дамыту әлі де ойдағыдай болмай тұр. Мұнда кезінде мың сан керуен жүріп өткен ұлы Жібек жолы, тарихи-мәдени ескерткіштер, көне дәуірдің куәгері іспетті тасқа қашалған таңбалар, жалпы тарихи құндылықтардың бәрі де бар. Осы орайда, Жамбыл жерінде туризмді ілгерілету мақсатында «Қазақтуризм» Ұлттық компаниясы ұйымдастырған «Керуен» экспедициясы Әулиеата жерінде болды.
Негізі «Керуен» экспедициясының сапары Алматы облысынан басталған екен. Ал, бұдан кейін Әулиеата өңіріне келген өлкетанушылар әуелі Байзақ ауданының аумағындағы ортағасырлық «Ақыртас» тарихи кешеніне барды. «Қазақтуризм» ұлттық компаниясы туристік өнімдерді дамыту департаментінің директоры Даниель Сержанұлы бастап келген «Керуен» экспедициясын тараздықтар «Көне Тараз» этно-мәдени кешенінде қарсы алды. Көне шаһарға келген экспедиция өкілдері «Көне Тараз» кешеніндегі «Сағат» стелласы мен «Қолөнер және туризм» орталығын аралап көрді. «Сапарымыз Алматы облысынан басталған. Жаркент қаласынан Жамбыл облысына қарай бет алып, әуелі «Ақыртас» кешенінде болдық. Одан «Көне Тараз» этно-мәдени кешеніне келдік. Жаңадан бой көтерген бұл кешеннің құрылысы, ғимараттардың орналасуы, жалпы олардың маңыздылығы бізге қатты ұнады. Біз бұл сапарымызда қолайлы туристік нүктелерді белгілеп жүрміз. Сол туристік нысандарды дамыту бойынша жергілікті әкімдермен келіссөздер жүргізілетін болады. Жамбыл облысынан әзірге төрт туристік нүктені белгілеуді назарға алдық. Енді Меркі және Т.Рысқұлов аудандарындағы тарихи және туристік орындарға көңіл аударып отырмыз. Қазіргі карантиндік талаптарға байланысты экспедиция құрамы үлкен емес. Негізінен экспедиция құрамында үздік блогерлер, фотографтар, туристік операторлар бар. Біз бұл сапарымыздағы маңызды мәселелерді, көңілімізге түйген ерекше құндылықтарды әлеуметтік желілерге салып, көпшілікке жарнамалайтын боламыз», дейді Даниель Сержанұлы.
Тарихи Жібек жолының бойымен жүріп келе жатқан экспедиция мүшелері Әулиеата өңіріне келуші туристер үшін маңызды жобаларды назарға алып отыр. Бұл ретте «Тараз туристік ақпараттық орталығының» жетекшісі Бауыржан Мөрбеков мұндай саяхаттар аймақ туризмі үшін тиімді әрі көне тарихымызды насихаттауға таптырмайтын мүмкіндік екенін айтты. Сонымен қатар Жамбыл жеріндегі тарихи жәдігерлерді жалпақ жұртқа танытуда да маңызы зор.
Жамбыл облысы