Мүмкіндігі шектеулі жандарды еңбекке баулуда Шымкент қаласында тындырымды тірлік көп. Соның бірі ретінде қалалық №2 арнаулы әлеуметтік қызметтер көрсету орталығында мүмкіндігі шектеулі азаматтарды жеңіл еңбек, кәсіптік дағдыға үйретуде. Орталықта ем қабылдаушылардың психикалық жай-күйі ескеріле отырып, қабілеттеріне қарай 4 сағаттық еңбек-емдеу терапиясы жолға қойылған.
Мұнда еңбек терапиясы жөніндегі нұсқаушы орталықтағы азаматтарға көгалдандыру, ағаш өңдеу, бөлме гүлдеріне күтім жасау, талдарды баптап өсіру секілді жеңіл жұмыстарды үйретеді. Орталық қамқорлығына алған ер-азаматтар сынған, бұзылған заттарды жөндеп, қайта өңдеу жұмыстарына көмектессе, қыз-келіншектер тобы арнайы жабдықталған тұрмыстық бөлмеде өз қолдарымен тәтті тағамдар пісіріп, ас мәзірі бойынша дастарқан әзірлеуді үйренеді.
Орталық мамандарының айтуынша, емделушілер арасында бес саусағынан өнер тамған жандар жетерлік. Әсіресе тері өңдеу кәсібіне ерекше қызығушылық танытады екен. Аталған орталықта мүмкіндігі шектеулі жандарды ынталандырып, еңбекке, өнерге құлшыныстарын арттыру үшін әр тоқсан сайын қолөнер бұйымдарынан көрме ұйымдастырылады. Әрі үздік деп танылғандары марапатталады.
Бүгінде қалалық №2 арнаулы әлеуметтік қызметтер көрсету орталығында 18-ден асқан психоневрологиялық аурулары бар І және ІІ топтағы мүгедектерге арнаулы әлеуметтік-медициналық, психологиялық және педагогикалық қызмет түрлері көрсетіледі.
Жетпіс жылдық тарихы бар мекеме ғимараты қайта жөндеуден өтіп, стационарлық үлгіде жасақталған. Онда асхана, монша кешені, спорт алаңы, күзет бөлімі бар. Барлық бөлмелері заманауи үлгіде қажетті техникалық базамен жабдықталған.
ШЫМКЕНТ