Қазақстанның Жоғары Сот кеңесі мен Құқық арқылы демократия үшін Еуропалық комиссиясының (Венеция комиссиясы) мұрындық болуымен ІV халықаралық дөңгелек үстел жиыны өтті. Онлайн форматта ұйымдастырылған форум биыл «Сот жүйесіндегі сот кеңестерінің рөлі мен орны және олардың заманауи модельдері» тақырыбына арналды.
Басқосуда судьялар корпусына кадрларды іріктеу және Еуропа мен ТМД елдерінің тәжірибесінде сот кеңестерінің қызметін жетілдірудің өзекті мәселелері талқыланды. Мұндай іс-шараны ұйымдастыру игі дәстүрге айналғанын айтқан Қазақстан Жоғары Сот кеңесінің төрағасы Денис Шипп форумның Еуропа мен Азия сот кеңестерінің, халықаралық институттардың, мемлекеттік органдардың өкілдері, сондай-ақ құқықтану және HR менеджмент саласындағы жетекші сарапшылар үшін маңызды тақырыптар бойынша пікір алмасатын тиімді алаң екенін атап өтті. «2018 жылы өткен дөңгелек үстел кезінде біз судьялар іріктеу жүйесін және Жоғары Сот Кеңесі жұмысын жаңғырту мәселелеріне тоқталсақ, 2019 жылы сот жүйесіндегі кадр саясатының перспективалы бағыттары талқыланды. Жаһандық індет жағдайлары өткен жылы ұйымдастырылған дөңгелек үстелдің тақырыбын анықтап берді. Судьялыққа үміткерлерді іріктеу, судьялардың жұмысын бағалау және жоғарылатудағы заманауи цифрлы және чарт технологиялар да кеңінен сөз болды», деді Д.Шипп.
Жоғары Сот кеңесінің мәртебесіне арналған жиында Еуропа кеңесінің Венеция комиссиясының төрағасы Буккикио Джанни сот жүйесінің қоғам мүддесін қорғаудағы Жоғары Сот кеңестерінің тиімділігіне кеңінен тоқталса, Еуропалық сот кеңестері желісінің президенті Донатти Филиппо сот жүйесінің тұрақтылығы мен тәуелсіздігін қамтамасыз ету мәселелерін сөз етті.
Ал Қазақстан Жоғары сотының Төрағасы Жақып Асанов кеңестің басты миссиясы судьялар корпусын жасақтау екеніне тоқтала келе: «Егер судья кадрлары білікті, мықты болмаса, бұл жүйедегі ешқандай реформа нәтиже бермейді. Себебі судья өзі шешім қабылдап, өзі үкім шығарады. Сондықтан да біздің салада кадр біліктілігі өте өзекті мәселе», деді. Судьяларды іріктеу, олардың мансаптық жоғарылауына қатысты бірқатар заң қабылданғанын айтқан Ж.Асанов бұл бағыттағы үш негізгі жаңалықты атап өтті. Яғни осы заңдардың арқасында елімізде судьяларды іріктеу тәртібі өзгерді, тәжірибелі судьялардың кетуіне тосқауыл қойылып, қатардағы судьялардың тәуелділігі жойылды.
Іс-шара шеңберінде судьялар корпусын қалыптастырудағы Қазақстан Жоғары Сот кеңесінің рөлі, қалыптасу және даму перспективалары жан-жақты сөз болып, халықаралық сарапшылар Франция, Бельгия, Италия және Испания елдері тәжірибелерін үлгі ете отырып, сот кеңестерінің заманауи еуропалық модельдерін егжей-тегжей талқылады. Сонымен қатар басқосуда судьялардың біліктілік алқалары, Ресейдің судьялар қауымдастығы жүйесіндегі судьялар корпусын құру тәжірибесі қарастырылды.