Тұңғыш Президентіміз – Елбасы Нұрсұлтан Назарбаевтың «Тәуелсіздік тағылымы» атты мақаласын оқығанда сол жылдардың барлық оқиғалары көз алдыма келді. Ол кезде Жамбыл ауданының орталығы орналасқан «Благовещенский» кеңшарының директоры болатынмын. Тәуелсіздік жарияланғанын сол күні естіп, қатты қуандық. Бір-бірімізді құттықтап, көзімізге жас та келген еді.
Келесі жылы Алматыда тәуелсіздіктің бір жылдығына арналған салтанатты жиын болды. Біздің облыстан барған делегацияның арасынан жалғыз мені төралқаға отырғызды. Бәріміздің баққанымыз, сөздерін қалт жібермей тыңдағанымыз Нұрсұлтан Әбішұлы болды. Ол басқа мәселелермен қатар кешікпей жекешелендіру басталып, барлық кәсіпорындар жекеменшікке берілетінін де айтты. Ол жылдарда біз «шаруашылық есеп» әдісіне көшіп, кәсіпорнымыз әжептәуір табыс тауып тұрған. Енді Президент бәрін де жекешелендіруді талап етті. Барлық мал-мүлік, құрал-саймандар ұжым мүшелеріне тиісті пайға сәйкес бөліп берілуі керек екен. Ал жеке шаруалар оны келісіммен қосып, кооператив немесе басқа формадағы шаруашылық құрады деген талап айтылды. Шыны керек, ол кезде біз оны толық қабылдамадық, бірақ нарықтық экономиканың талабы осы екеніне артынан көзімізді жеткіздік.
Елбасы өзінің мақаласында «дүниеде экономикалық даму мен демократияның алуан формасы болса да, оның дәл сол күйінде көшіріп ала қоятын ортақ үлгісі жоқ. Біз әлемдік тәжірибені қорытып, өз ерекшеліктеріміз бен мүмкіндіктерімізді ескеріп, «Қазақстан-2030» стратегиясын түздік» деп жазыпты. Шын мәнінде тура көшіріп алатын үлгі жоқ еді, сондықтан жаңа жол жасауға тура келді. Осы жолда Тұңғыш Президентіміз қиыннан қиыстырып өзіндік жол тауып, елімізді экономикалық тығырықтан аман алып шықты.
Ескендір ЕЛЕУСІЗОВ,
облыстық Ардагерлер кеңесінің төрағасы
Солтүстік Қазақстан облысы