Екі мың гектар жер мемлекетке қайтарылды

Облыс басшысы Гүлшара Әбдіқа­­лықова әкімдік тарапы­нан Ауыл шаруа­шылығы минис­тр­лігіне жерді мемлекет меншігіне қайтару туралы бірнеше рет ұсы­ныс жасалғанын айтып өтті. Енді шығын көлемі анықталып, тиісті сараптама жүргізіледі. Заңға сәйкес тарату комиссиясы құрылады, оның құрамына барлық мүдделі орган мен тұрғын кіреді. Қажетті рәсімдер жүргізілгеннен кейін тәжірибелік шаруашылық жойылып, оның жері жергілікті атқарушы орган теңгеріміне қайтарылады.

Министр мен әкім Қыркеңсе ауыл­дық округіндегі «Бекарыс-С» шаруа қожалығына барып, көк­темгі егіс барысымен де танысты. Былтыр күріштен 57 центнерден өнім алған қожалық осы жылы жаңа сорт екпекші.

Осы күні аудан орталығында көктемгі егіс науқаны мен мал ша­руашылығын дамыту мә­се­лелеріне арналған жиын өткізілді.

«Бәйтерек» ұлттық басқару хол­дингі» АҚ басқарушы директоры Айгүл Жуанышбаева, «ҚазАгроҚаржы» АҚ басқарма төрағасы Айдар Прашев, «Аграр­лық несие корпорациясы» АҚ басқарма төрағасының орынбасары Асылхан Жұбашев, аудандағы шаруашылық иелері қатысқан жиында облыс басшысы суды мейлінше аз қажет ететін өнім түріне ден қою, Үкі­мет бекіткен су лимитіне қарай әре­­кет ету, каналдарды тазалау, насос қон­­дыр­ғыларын орнату бағытындағы жұ­мыстарды саралады.

– Биыл да өткен жылғыдай су тап­шылығын тартатын түріміз бар. Бұл егінмен қатар жайылымдықтар мен шабындықтарды суландыруға әсер ететіні сөзсіз. Осыған байланысты Үкі­мет резервінен бөлінген қаражатқа 21 канал тазалап, 52 ұңғыманы жөндеу және бұрғылау, 133 дана насос қондырғысын алу жоспарымызда бар. Осыған байланысты елдегі шаруалармен кездесіп, лимит аясында егілетін өнім көлемін нақтылауда ортақ шешімге келу үшін талқылаулар ұйымдастырдық. Оңтүстік аудандарда көкөніс шығымы жоғары. «Байқоңыр» ӘКК» АҚ-мен бірлесіп, қажетті картоп, сәбіз, пияз және басқа да өнімдерді егіп, тұрақтандыру қорына ұсы­нып, сырттан өнім алуға деген тәуел­ділікті азайтуға жұмыс істегеніміз жөн, – деді Г.Әбдіқалықова.

Жиында тиісті басқарма басшылары вегетациялық кезеңде іске асырылуға тиіс жұмыстар жоспарын баяндаса, Жаңақорған ауданының әкімі Руслан Рүстемов егіске дайындық барысын айтып, Келінтөбе магистралды кана­лы­ның бас сағасына су тоспасын салуды ұсынды. Бірқатар шаруа қожалық иелері субсидия алу, жемшөп тасымалдау, су қо­рына қатысты сауалдар қойып, ұсыныстарын жеткізді.

Басқосуда көтерілген әрбір ұсыныс­ты тыңдай келе Ауыл ша­руашылығы министрі Ербол Қаршөкеев шаруаларды алаң­датқан мәселелерге қатысты нақты жауап берді.

– Биыл Президент тапсырмасы негізінде көктемгі егіс жұ­мыстарына бөлінетін қаражат көлемі ұлғайды. Бі­ріншіден, «Кең дала» бағдарламасы арқылы жыл сайын 70 млрд теңге қаражат бөлінсе, осы жылы соны екі есеге ұлғайтуға мүмкіндік алғалы тұр­мыз. Азық-түлік келісімшарт корпорациясы арқылы форвардтық сатып алу үшін жыл сайын 40 млрд теңге бөлінсе, оның көлемін 80 млрд теңгеге ұлғайтып жатырмыз, – деді министр.

Биылғы күрделі кезеңді ес­керіп, субсидия алу тәртібінің жаңа ережесі келесі жылдың 1 қаңтарына қалдырылды. Демек субсидия ескі жүйе бойынша беріледі. Осы жылы бұл үшін 309 млрд тенге ақша қарастырылған еді. Пре­зидент тапсырмасына сәйкес қаражат көлемін 388 млрд теңгеге ұлғайту туралы ұсыныс берілді. Министр бұл былтырдан қалған қарызды өтеуге мүм­кіндік беріп, ауылшаруашылық өнімінің бағасын тұрақты ұстауға сеп­тігін тигізетінін атап өтті. Со­нымен бірге, субсидиялаудың бір­ыңғай ақ­па­ра­тын енгізетін жаңа жүйе дайындалды. Енді фермерлерден артық құжат талап етілмейді. Барлығы автоматты түрде іске асырылады.

Сапар соңында Ербол Шы­рақпайұлы Шиелі ауданындағы «Мөлдір және К» серіктестігінің құс фермасына барды. Кәсіпкер Насырбек Мырзабеков «Биз­нестің жол картасы – 2020» мем­лекеттік бағдарламасы арқылы несие алып, өндіріс орнындағы екінші цехты іске қосқан. Тәулігіне 20 мың дана жұмыртқа алатын фермада алдағы уа­қытта құс етін өндіру жоспарланып отыр.

Қызылорда облысы