Еркелеп өткен еліне

Осы жылы талантын жер жүзі таныған әнші дүниеге келген Қазалы өңірі үшін мерейтойлар жылы. Киелі топы­рақта кіндігі кесіліп, Шығыс жас­тарының жалынды көсеміне ай­налған Ғани Мұратбаевтың да туғанына 120 жыл толып отыр. Осыған бай­ланысты аудандық мәдениет және тілдерді дамыту бөлімі «Шығыстың жұлдызы, Шығыстың бұлбұлы» атты шаралар жобасын түзіпті. Одан бөлек «Айналайын халқымнан еркелеткен» атты бағдарлама аясында қазақтың атын алыс-жақынға танытқан ақмаңдай әншінің рухын ұлық­тауға арналған шаралар өтіп жатыр.

– Былтыр жыл соңында Роза Тәжі­бай­қызының отбасында болып, жос­парларымызды талқыладық. Жаңа мәдениет үйінен ашылатын музейге қойылатын жәдігерлер жағын пы­сық­тадық. Қазір ән өнерінің тұтас бір дәуірінің басында тұрған тұлға туралы біраз естелік, фотосуреттер жинақталды, – дейді аудандық мәдениет және тілдерді дамыту бөлі­мі­нің басшысы Болат Жолтаев.

Былтырғы жыл соңынан бері жоспарланған 44 шараның алғашқы легі өтіп жатыр. Аудан орталығында салынып жатқан жаңа мәдениет үйінің алдына қойылатын бюстің тұғыртасын дайындауға пандемия кедергі болды. Бағланова бар қа­зақ­қа ортақ, бірақ әншінің кіндігі кесілген киелі топырақтағылар той иесі болғандықтан, жауапкершіліктің салмағын сезініп, өлмес өнер иесінің ғасырлық тойын атап өтуге айрықша дайындалып жатыр.

Ауданда жыл басынан бергі бар­лық мәдени іс-шара кіріспесі Бағлано­ва­мен байланыстырыла басталатын болыпты. Осыған дейін ауданда «Ақ­маң­дайлым» атты әншілер конкурсы өткізіліп келген болатын. Кейін облыс орталығына көшкен өнер додасы талай дарынның тұсауын кескен айтулы шараға айналды. Былтырдан бастап ауданда «Іңкәрім-ай» конкурсы қолға алынды. Жұлдызы биік өнер иесінің жүз жылдығына байланысты естеліктер мен сирек фотолар топтастырылған кітап та баспа жүзін көреді. Құрастырушылар бұл кітапқа әнші туралы бұрын белгісіз болып келген мәліметтер енгендігін айтып отыр.

Мәлімет демекші, Роза Тәжібай­қы­зының туған жері Қазалы өңірі екендігі әмбеге аян. Жоғарыда айтып өткеніміздей, әнші күллі қазаққа ортақ, тіпті қай шет елдің сахнасына шықса сол тілде бір ән салатын дарын иесін әлем жұртшылығы да жа­тыр­қамайды. Даңқы аспандап тұрса да қайран балалығы қалған Қаза­лысына еркелеп келетін әншінің өмір­баянында кіндік кескен жері тура­лы анық та, қанық жазылған. Бірақ осыған қарамастан қазір Бағланованы басқа көршілес аудандарға теліп жүргендер де кездесіп қалады.

– Менің нағашы әжем Жекей Қожахметова осы Розаның жақын жеңгесі болып келетін. Роза мен екі шешесі осы кенттегі 1 Май көшесінде тұрған, – дейді бүгінде сексеннен асып отырған Тойған Алданазарова. – Ал әншінің оқыған жері теміржол вокзалына жақын №420 мектеп. Бала ке­зінде Мойнақ жағында да бір­ша­ма уақыт тұрса керек. Атасы азан шақырылып қойған аты Теке болса да ел аузында Шақкөз аталып кеткен әйгілі батыр. Ол атамыздың сүйе­гі, әкесі Тәжібайдың белгісі осында. Туған топырағына жиі соғып тұра­тын Роза апамыз осыдан біраз жыл олардың басын қарайтып, ас берді.

Қазалыдағы мәдениет орталығы, ескерткіш бюст ашыларда Тойған апаға әншінің келіні Марал жолығып, аманатын жеткізіпті. Еліне еркелеп өткен Роза Тәжібайқызының ақырғы өтініші бойынша қабірінен алынған топырақ туған жеріндегі ескерткіш түбіне, ол жерден алынған бір уыс Алатау баурайындағы зиратына жет­кі­зілді.

Әлеуметтік желілерде Бағ­ла­но­ва­дай күллі Алаш алақанына салған аяулы жанның руы туралы жаңсақ айтылып жүргені де жер­лес­те­рінің жанына батады. Қазақ руға бөлінбейді, қазақ рудан құралады. Дегенмен...

– Өнерінің арқасында елін әлемнің әр түкпірінде танытқан бұлбұлдың бар қазаққа ортақ екенін тағы бір еске сала кеткеннің артығы болмас. Бірақ тұлғамыздың тегін тануда осын­дай олқылықтардың да кез­де­сіп қалатынын жасырмай айтқан жөн. Біз Кіші жүз ішінде Әлімнің Шек­ті­сінен тарайтын Асанбыз. Оның ішінде былайғы жұрт «Бөлек Асан» атандырып жіберген Өтебіміз. Роза Тәжібайқызы осы рудан, біздің апамыз. Тіпті бала кезімде аудандық газетке берген сұхбаттарының бірінде өзінің руы туралы айтқанын оқы­ған­мын. Сол тұстағы екі шоқып, бір қарайтын сауысқандай сақ сая­сат­­тың басылымға бұл деректі қа­лай жібергеніне әлі күнге қайран қа­ла­­мын. Бірақ анығы осы, – дейді осы ел­дің белгілі азаматы Дәулет Тұяқбаев.

Мерейтойға дайындыққа ора­ла­йық. Кітаптан бөлек, облыстық Qyzylorda телеарнасы Роза Тәжібай­қы­зының ғұмырын қамтитын деректі фильм түсірді. Аудандағылар жуыр­да ашылатын мәдениет үйінен жаб­дықталар музейге қойылатын жәді­гер­­лерді түгендеп, тыным таппай жүр. «Мерейтой шараларын Асанәлі Әшімов ағамызбен де ақылдастық» дей­ді аудандық мә­де­ниет және тіл­дер­ді дамыту бөлі­мі­нің басшысы Болат Жолтаев. Қазақ киносының мэтрі: «Музей жасақтасаң, апамның қасығына дейін сонда тұрсын», деген тілегін айтыпты.

Өткенді құрметтеу, тұлғаны тану деген осындайдан басталса керек.

Қызылорда