Қазақ киноөнерінде бұған дейін фантастика жанры болған-болмағанын біле бермейміз. Болса да некен-саяқ, жоққа тән. Осы олқылықтың орнын толтыру мақсатында Алматыдағы Tiger Films киностудиясы батыл қадамға бармақшы. Аталған ұжым фантастика түсіретінін ресми түрде мәлімдеді.
«Мой парень – инопланетянин» фантастикалық фильмінің түсірілімі алдағы аптада басталады. Қиял-ғажайып жанрындағы туынды жер бетіндегі және өзге ғаламшар арасындағы байланыс, қиял-ғажайып, махаббат пен шытырман оқиғаға толы өрбімек. Түсірілім алдында шығармашылық топ дәстүр бойынша жаңа жобаға сәттілік тілеп, жолашар ырымын жасады.
Түсірілімі енді басталатын фильмнің режиссері Ален Ниязбековтің айтуынша, «фантастика – қазақ киносында толық қалыптаспаған жаңа жанр. Біз комедиядан әрі қарай жаңа жанрға бет бұрдық. Осылайша, «Мой парень – инопланетянин» фильмі жаңашылдыққа толы болады деп ойлаймын. Фильмде екі ғаламшардың байланысы көрсетіліп, махаббатпен ұштасады. Қиял-ғажайып жанрындағы фильмнің басты рөлдерін актер Бауыржан Сатов пен Жұлдыз Өмірғали сомдайды. Жер шары мен Тигарден жұлдызы арасындағы байланыс қос кейіпкердің махаббатымен жалғасады. Бұдан басқа да негізгі рөлдерде Дәурен Серғазин, Жахан Отарғалиев және Қайрат Әділгерей ойнайды.
Дәурен Серғазин,
театр және кино актері:
– Менің кейіпкерім – сол ба- лалық шағындағы арман-қия- лының жетегіндегі адам. Өзінің арманына ғашық, өзінің арманына сенетін адамның бірі. Өзге ғаламшарлықтарға имандай сенеді, қатты іздейді. Солармен күресіп, соларды аңдып, осындай ізденісте жүрген кейіпкер.
Рано Умарова,
фильм продюсері:
– Бұл қазақстандықтардың сүйікті фильмдерінің бірі болады деп ойлаймын. Өйткені махаббат пен фантастиканы жұптастырамыз. Актерлер құрамы шебер әрі танымал адамдардан құралған. Түсірілім Алматы қаласы мен облысында болады, негізінен ша- ғын қалаларда түсіреміз.
Tiger Films киностудиясы 2021 жылы құрылған. Бүгінге дейін көрерменге үш комедиялық фильмді тарту етіпті. Туындылары елімізден өзге Қырғызстан мен Әзербайжанда көрсетілген көрінеді.