Қонаев қаласындағы «Балдәурен-Қапшағай» оқу-сауықтыру орталығының базасында өткен республикалық «Балдәурен білгірі-2022» зерттеу жұмыстары мен әлеуметтік жобалар байқауында Қарағанды облысының атынан бақ сынаған Ерхан Бораш бірінші орынды жеңіп алды.
Шет ауданындағы Ақсу-Аюлы кентіндегі мектеп-гимназияның оқушысы аталған сайыста ақын және сазгер Дәулет Ырысбайұлының шығармашылығына арналған «Арқада бар бір ақын Дәулет» атты жобасымен қазылар алқасының жоғары бағасын алды.
Ерхан Бораштың орындауындағы ақынның «Қарағанды вальсі» композициясы тыңдарман қауым мен қазылар алқасының ыстық ықыласына бөленіпті.
Жас дарынның өзі байқаудың тартысты және әділ өткенін айтады.
– Байқауға екі апта бойы тыңғылықты дайындалдым. Қазылар алқасының талқысына ұсынылған жоба өзім оқып жүрген Жамбыл Ақылбаев атындағы мектеп-гимназияның тәлімгер-педагогтерімен бірге келісіліп, таңдалды. Бұдан бұрын да байқауларға қатысқан тәжірибеден болар, бұл жолғы сайыста бәлендей толқу бола қойған жоқ, – дейді жеңімпаз.
Ерхан Бораш алдағы уақытта да Дәулет Ырысбайұлының шығармашылығын тереңдете зерттеп, ақынның артында қалған мұрасының ел ішінде насихатталуына барынша көңіл бөлмекші.
Қарағанды облысы,
Шет ауданы