Павлодар қаласында ерекше аялдамалар пайда болды. Көпшілік қоғамдық көлік күтетін орындар қазақтың тарихи тұлғалары мен даңқты жерлестеріміз жайлы көрнекі ақпараттармен безендіріліп, әрқайсысы шағын музей іспетті алыстан көз тартады.
Өңірлік мәдениет, тілдерді дамыту және архив ісі басқармасының бастамасымен облыс орталығының аялдамалары тарихтан тәбәрік беретін орындарға айналуда. «Тұлғалар тағылымы» деп аталатын бұл жобаның мақсаты – танымал тұлғаларды қала тұрғындарына насихаттау, олардың өмір жолы мен шығармашылығын таныстыру.
– Аялдамада қоғамдық көлік күтіп тұрған адамдар белгілі ақын-жазушылар мен өнер адамдарының шығармашылығынан, қоғам қайраткерлерінің мемлекеттің дамуына қосқан үлесінен, батырлардың жасаған ерлігінен азды-көпті мағлұмат ала алады. Солардың ішінде Олжабай батыр, Кәукен Кенжетаев, Мұқағали Мақатаев, Мағжан Жұмабаев, Қалмұқан Исабай, Аманжол Шәмкенов, Дихан Әбілев, Қабдыкәрім Ыдырысов, Қамар Қасымов, Нағымбек Нұрмұхаммедов, Рафиқа Нұртазина, Қазанғап би, Генерал Бәкіров, Генерал Смағұлов, Ағайынды Дүйсенбинов сынды жақында ғана есімдері көшелерге берілген тұлғалар жайлы безендірілген аялдамалар да бар. Бұған қоса биыл 150 жылдығы тойланып жатқан Алаштың біртуар азаматы, тіл білімінің атасы Ахмет Байтұрсынұлы мен ел тарихында елеулі орын алған Шахан Мусин, Рамазан Тоқтаров, Сержан Қанапиянов секілді ірі тұлғалардың өмір жолы да қамтылды, – дейді басқарманың ономастика жұмыстары жөніндегі бөлім басшысы Батырбек Қайыр.
Осылайша облыс орталығында ұзын саны 19 тұлға жайлы ерекше дизайнмен кескінделген мәліметтер қаланың 40-қа жуық аялдамасына жапсырылып, шаһардың сәнін арттыра түсті. Алдағы уақытта бұл жұмыстардың аясы кеңейеді деп жоспарланған.
«Қала жұрты мен сырттан келген қонақтар үшін бұл біздің жерлестеріміз бен ұлт мақтаныштарын танытудың бір жолы деуге болады. Біздің өңір ғана емес, тұтас еліміздің руханиятына, мәдениеті мен өзге де салаларына өлшеусіз үлес қосқан даңқты адамдар, тарихи тұлғаларды көпшілік танып білуі керек. Осы тұрғыдан алғанда жерлестерімізге, әсіресе жастар мен жас ұрпаққа бұл аялдамалардың үлгі-өнегесі мол болмақ.
Екіншіден ақпараттардың ана тілінде берілуі тіліміздің аясын кеңейтуге, оны өзге ұлт өкілдеріне үйретуде көмегі зор болады деп есептеймін. Автобус күтіп тұрғандар оларға зер салып, не жазылғанын зерделеп жатса қуаныш қой. Өңірлік мәдениет басқармасының бұл бағытта әлі де біраз жоспарлары бар көрінеді. Олардың ұқыптылықпен, жауаптылықпен жүзеге аса беруіне тілектеспін», – дейді Халықаралық «Қазақ тілі» қоғамдық бірлестігінің облыстағы филиалының төрағасы, «Найзатас» журналының бас редакторы Асыл Әбішев.
ПАВЛОДАР