Қазақстанда алғаш рет байланыс операторлары арасында жиіліктерді бөлу бойынша электронды сауда-саттық басталды. Аукцион ұялы байланыстың бесінші буынын (5G) енгізу және жиілік диапазондарын бөлуді көздейді.
Бәсекелестікті қалыптастыру бағытында аукционға радиожиіліктерді бөлу тәртібімен бекітілген талаптарға сәйкес келетін компаниялар қатыса алады. Бұл аукцион 5G технологиялары үшін радиожиіліктерді таратудың ашық механизмін көрсетеді. Осындай іс-шаралардың өткізілуі елдегі телекоммуникациялық желілердің дамуына серпін беретіні сөзсіз. Оған қоса, жаңа операторлар үшін бәсекелестік ортаның құрылуына мүмкіндік береді.
«Бүгінгі таңда технологиялар қарқынды дамып келеді. Сондықтан әртүрлі экожүйелерді, қосымшаларды, қызметтерді жүйелендіру үшін сапалы инфрақұрылым қалыптастыруымыз қажет. Әрине, 5G технологиясын дамыту үшін бірнеше жыл қажет. Алайда осы уақыт ішінде трафиктер едәуір үлкен көлемде дамып, жаңа қызметтер пайда болады. Біз азаматтарымызға сапалы заманауи сервистерді ұсыну үшін, жаңа ұялы байланыс жүйесін енгізуді көздеп отырмыз», дейді Цифрлық даму вице-министрі Асхат Оразбек.
Аукцион шарттары бойынша қатысушыда – кемінде алты облысты, республикалық маңызы бар қалаларды қамтитын телекоммуникациялар мен ұялы байланыстың магистральдық желілері және мемлекеттік лицензиясы болуға тиіс. Тағы бір маңызды талап – қатысушы компания тарамаған немесе банкротқа ұшырау сатысында болмауы керек. Оған қоса, кепілдік жарнаны төлегені туралы құжаттарды ұсынуға міндетті.
GSMA Intelligence халықаралық ұйымының жаһандық және өңірлік зерттеуі 2030 жылға қарай 5G технологиялары жалпы ішкі өнімге және әлеуметтік-экономикалық жағдайға оң әсерін тигізетінін бағалаған.
Халықаралық талдау негізінде C-band диапазонында 5G технологиясын енгізу 2030 жылы әлемдік ІЖӨ-нің 610 млрд доллардан асуына (өсуіне) әкеледі. Бұл 5G технологиясының жалпы әлеуметтік-экономикалық әсерінің 65 пайызын құрайды.
5G технологиялары мен қызметтерінің әлеуметтік-экономикалық әсерінен басқа, денсаулық сақтау мен білімге қолжетімділікті жақсарту, қоғамдық қауіпсіздікті арттыру және қоршаған ортаның ластануын азайту сияқты қосымша артықшылықтары күтілуде. Жоғарыда аталған зерттеу бойынша ТМД елдерінде 5G-ді қолданысқа енгізу арқылы ІЖӨ-нің 14 млрд долларға өсуі болжанады, оның ішінде Қазақстанның үлесі – 12 пайыз. 2020-2030 жылдары әлем бойынша 5G технологиясын енгізудің артықшылықтарын ескере отырып, C-band 5G диапазонына басымдық беретін Қазақстан Республикасы мемлекеттік саясаты және құрылған инфрақұрылым алдағы жылдары экономикалық дамуға ықпал етеді», делінген министрлік хабарламасында.
Сала мәліметі бойынша, дамыған елдерде 5G жиіліктерін сату аукциондарында қомақты қаражат бөлінген. Мысалы, Швейцарияда – 378 млн доллар, Италияда – 6,5 млрд еуро, Испанияда – 437,6 млн еуро, Аустрияда – 188 млн еуро, Ұлыбританияда – 1,35 млрд еуро, Германияда – 6.5 млрд еуро, Оңтүстік Кореяда – 3,3 млрд доллар.