Осыдан бір жыл бұрын Сыртқы істер министрлігі Ресей нарығынан кеткен 362 ірі шетелдік компаниямен релокация бойынша келіссөз жүргізіп жатқанын хабарлаған еді. Былтыр жыл соңында 62 компания оң жауап берді деп, сәл кейінірек 20-сының Қазақстанға орныққанын мәлімдеген. Биыл оған тағы 4 компания қосылды. Жақында «Egemen Qazaqstan» сауалына жауап берген ведомство қазіргі уақытта әлемнің 38 елінен 401 ірі компанияның тізімі құрылғанын, соның ішінде 66 компания бойынша нақты келіссөздер жүргізіліп жатқанын айтты.
«Компанияларға еліміздегі инвестициялық ахуал туралы нысаналы мақсаттағы шақыру хаттар мен презентациялық материалдар жолданды. Қазақстанның шетелдердегі мекемелерінің басшылары қызығушылық танытқан компаниялардың топ-менеджментімен жеке кездесулер өткізіп жатыр. Сонымен қатар қазіргі уақытта шетелдік компаниялардың басым бөлігі аймақтағы ахуалдың одан арғы беталысын күтіп отырғандарын атап өткен жөн», деп мәлімдеді Инвестиция комитетінің төрағасы Ардақ Зебешев.
Биыл елімізге 4 компания көшіп келген. Электр қуаты жабдықтарын шығарумен және сол саладағы инновациялық шешімдерді әзірлеумен айналысатын франциялық компанияның технологиялары елімізге трансферленіп, Атырау облысында тренинг орталығы құрылмақ. Сондай-ақ германиялық компания тарапынан Солтүстік Қазақстан облысында ауыл шаруашылығы саласында қолданылатын тіркеме техникасын өндіретін зауыт салу жоспарланып отыр. Ресейлік компания тарапынан Қостанай облысында серіппе жасайтын зауыт ашылмақ. Тағы бір ресейлік компания Астана қаласында логистикалық парк салуға ниетті көрінеді.
Министрліктің хабарлауынша, релокация жасап жатқан шетелдік компаниялар еліміздің заңнамалары мен талаптарын толық орындап жатыр. Олар үшін қандай да бір арнайы жағдай жасалмайды, олардың кеңселері мен өндірістері біздің елге жалпы ережелерге сәйкес көшіріліп жатыр деп түсіндірді ведомство өкілі.
Сонымен қатар министрлік өкілі шетелдік инвестиция тарту бойынша еліміздің Орталық Азияда көшбасшы екенін және инвесторлардың біздің елді таңдауы тартымды инвестициялық климаттың тиімділігі арқасында мүмкін болып отырғанын жеткізді.
«Геосаяси жағдайларға байланысты Еуразия кеңістігінен кетуге мәжбүр болып отырған шетелдік компанияларға Қазақстанға қоныс аудару тиімді бола отырып, еліміздің халықаралық аренадағы сыртқы беделінің өсуіне айтарлықтай септігін тигізіп жатыр», дейді ол.
2022 жылдың қорытындысы бойынша елімізге тартылған тікелей шетелдік инвестицияның жалпы көлемі 28 млрд доллар болған. Бұл 2021 жылғы көрсеткіштен 17,7 пайызға артық. 2022 жылы шетелдік инвесторлардың қатысуымен 46 инвестициялық жоба іске қосылды. Жалпы, 1,74 трлн теңге инвестиция тартылып, 6,2 мың жұмыс орны ашылған.