Таяуда «Adyrna» ұлттық порталы әлеуметтік желі арқылы жалпыхалықтық дауыс беру сауалнамасын ұйымдастырды. Мақсат – жылдың үздік депутатын анықтау.
Сауалнама қорытындысы бойынша, халықтың ең көп дауысын жинаған «Ақ жол» партиясының депутаты Қазыбек Иса «Жылдың үздік депутаты» атағына лайық деп танылды. Қазыбек Жарылқасынұлы Мәжіліс мінберінен ұлттық құндылық, ел, жер және мемлекеттік тіл мәселесіне қатысты өткір де өзекті тақырыптарды қозғап келеді. Мысалы, биылдың өзінде депутаттың көтерген ауыз су, діни радикализмге қатысты сауалы көптің көкейіндегісін дөп басты.
Сауалнамаға белсенді қатысып, дауыс берген сайлаушыларына алғысын білдірген депутат: «Бұл жерде мәселе бәйге, атақ, жүлде алуда емес. Халық өзі таңдаған қалаулы депутатына ешқандай бұрмалаусыз дауыс беруінде болып тұр. Сондықтан еліміз бойынша жаппай дауыс беруге уақыттарын қиып, қалаулы тұлғасын жеңімпазға айналдыруда еңбек сіңірген сіздердің әрқайсыңызға да айтар алғысым шексіз.
Әділеттілік үшін тізе қосылған жерде жетістік, бірлік бар жерде – тірлік, ынтымақ түбі – ырыс болатынын көрсеткен халыққа, әрқайсыңызға құрметім зор», деп ақжарма тілегін білдірді.
Сауалнама нәтижесі бойынша 2-орынды «Amanat» партиясының депутаты Ринат Зайытов иеленсе, 3-орыннан «Respublica» партиясынан Руслан Берденов көрінді.