Бұл күндері Душанбеде Қазақстан мен Тәжікстан жастарының форумы өтіп жатыр. Тараптар жастар саясатының негізгі мәселелерін талқылады.
Қатысушылар қатарында жастар қозғалысының көшбасшылары, мемлекеттік құрылымдардың өкілдері, екі мемлекеттің кәсіпкерлері бар. Қазақстан делегациясын Мәдениет және ақпарат министрлігі Жастар және отбасы істері комитетінің төрағасы Қайрат Қамбаров бастап барды.
«Қазақстан мен Тәжікстанды ғасырлар бойғы тарих, мәдени және экономикалық қатынастар байланыстырады. Дегенмен еліміздің болашағы көп жағдайда жастарды қалай қолдап, дамытуымызға байланысты болатыны белгілі. Өңіріміздегі өзгерістердің, жаңашылдықтың, ілгерілеудің қозғаушы күші – дәл осы өскелең ұрпақ», деп атап өтті Қ.Қамбаров.
Кездесудің негізгі мақсаты – екі елдің жастар ұйымдары арасындағы өзара іс-қимылды дамыту және жастардың өзекті мәселелерін шешу үшін бірлескен стратегияларды әзірлеу. Атап айтқанда, форумда волонтерлік қозғалысын, жастар кәсіпкерлігін дамыту және стартаптарды қолдау тетігі талқыланып жатыр.
Форум қорытындысы бойынша тараптар ынтымақтастық туралы қарарға қол қойылады деп жоспарланып отыр.