«Қазгидрометтің» Солтүстік Қазақстан филиалы бақылау бекеттерінің айтуына қарағанда, наурыздың аяғында Петропавл су қоймасындағы Есіл өзенінің деңгейі 52 см-ге көтерілген, Сергеев су қоймасындағы деңгей 3 см төмендеген. Сондай-ақ облыс орталығының іргесіндегі Борки, Долматов мекендерінде тиісінше 51, 59 см көтерілген.
Бұл көрсеткіштер қарғын судың артуы, көктемгі тасқынға сәйкес қауіпсіз саналады. Әзірге тек Есіл ауданындағы Үлкен Тораңғұл көлінің суы қауіпті деңгейге жетіп тұр. 31 наурыздағы мәліметке қарағанда, Петропавл қаласындағы жағажай аумағында «Учитель-1», «Учитель-2» саяжайларына баратын жолды 20-30 см тереңдікпен жалпы ұзындығы 40 метрдей аумақта қарғын су басып қалды. Дегенмен мұндағы тұрғын үйлерді су басу қаупі әзірге жоқ. ПД қызметкерлері осында тұрып жатқан 19 отбасын су басу қаупі жоқ аймақтарға көшіру жұмыстарын жүргізіп жатыр.
«Қазсушар» РМК облыстық филиалының директоры Шұғайып Ибатуллиннің айтуынша, биыл былтырғыдай қауіп жоқ. Есіл өзені ағынының негізгі реттеушісі – Сергеев су торабы. Биыл өзеннің осы тораптағы деңгейі 92 см-ге жетіп, қазір 3 см төмендеген. «Бұл былтырғы деңгейге қарағанда үш есе төмен. Сондықтан су тасқыны болар деген қауіп жоқ», деді ол.
Өткен жылғы алапат тасқыннан кейін Сергеев, Петропавл су тораптарында ағымдағы жөндеу жұмыстары, су тасқынына қарсы іс-шаралар жүргізілді. «Жұмыстың негізгі түрлері Сергеев, Петропавл су тораптарының жағалауын нығайту, беткейлерін көтеруге бағытталды. Қаңтар айында Сергеев гидроқұрылысы бөгетінің маңындағы төменгі бьефте түбін тереңдету жөнінде жұмыстар орындалып, 940 текше метр топырақ қоспасы алынып тасталды. Есіл өзенінің табиғи арнасын қалпына келтіру мақсатында өзеннің тірек құрылысының төменгі учаскесін таспен толтыру жүргізілді», деді Ш.Ибатуллин.
Наурыздан бастап филиал базасында, Сергеев, Петропавл су тораптарында тәулік бойы жұмысшылар кезекшілігі ұйымдастырылды. Кезекшілер мүдделі органдарды су қоймаларының суын толтыру, ағызу жөніндегі ақпараттармен хабардар етіп отырады. Қазір Сергеев, Петропавл су тораптары штаттық режімде жұмыс істеп тұр.
ТЖД баспасөз қызметінің басшысы Евгений Журавлев мәлімдегендей, Сергеев су қоймасының суы қалыптағы жылдардың сәйкес мерзіміне қарағанда 16%-ға артқан. Cу деңгейі – 802 млн текше метр, барлық сыйымдылық – 890 шаршы метр.
Облыста әзірге автомобиль жолдарына 24 рет су шыққан фактілер тіркелген. Кентішілік 2 469 суағар құбырлар тазаланған, 238 мың метр арықтар ашылған. Биыл елді мекендерге түскен қар көлемі былтырғыға қарағанда шағындау болса да, 1 млн 428 мың текше метр қар сыртқа шығарылған. Қала, ауыл-аудандарда қарғын судан пайда болған 113 мың текше метр су мотопомпа, сорғыштармен сыртқа айдалған. Өзеннің тасқын суларын бөгеуге арналған дамбаларды көтеру, нығайту мақсатында 170 мың дана қапшықтарға салынған инертті материалдар үйілген.
Сең кептелісін болдырмас мақсатында Есіл өзенінің бойындағы 50 учаскеде жарылыс жасалды. Оның 43-і Петропавл қаласының маңында, ал жетеуі Қызылжар, Есіл, Шал ақын, Ғ.Мүсірепов, Айыртау, Ақжар, Уәлиханов аудандарында жүргізілді. Жарылыс 23133 шаршы метр аумақты қамтыды.
Гидрометтің мәліметіне қарағанда, облыстағы шағын өзендер суының көтерілуі біршама жоғары. Мәселен, Гусаковка ауылының маңындағы Бабықбұрлықта – 46 см, Аққанбұрлықта – 62 см.
Қызылжар ауданына ТЖМ 28 237 әскери бөлімшесінен 45 жауынгер мен 5 арнаулы техника көмекке келді. Бүгінде су тасқынының жағдайы қалыпты.
Солтүстік Қазақстан облысы