Өмірге келген әр адамның соңынан жалықпай қуып жүретін, оның әлсіреген сәтін аңдитын, түбі алмай қоймайтын бір тажал бар. Оның аты – ажал. Осы ажал Жамбыл облысы, Қордай ауданы, Алға ауылының үлкен ақсақалы Назыке Қарамолдаевты 1994 жылдың 11 желтоқсаны күні Мерке санаторийінде қуып жетті. 1928-1937 жылдардағы қуғын-сүргінді көріп, одан әупірімдеп аман қалған, одан кейін Ұлы Отан соғысының қан кешу, қасап шайқастарын бастан кешіріп, бір Алланың медетімен одан да аман өткен ардагер қарт сарбаз әрі үлкен жүректі ұстаз осы арада өзінің 85 жасқа қараған шағында, өмірдің қызығын шуақтап, ұрпақтың қызығын тамашалап жүрген сәтінде ешбір ауырып сырқамаған ың-шыңсыз қалпында сәл ғана мызғып алу үшін ұйықтап кеткен адамның кейпімен мәңгілікке көз жұмды.
“Сағаттың шықылдағы емес ермек,
Һәмишә өмір өтпек – ол білдірмек.
Бір минут бір кісінің өміріне ұқсас,
Өтті, өлді, тағдыр жоқ қайта келмек”, – деген ғой Абай атамыз.
Назыке Қарамолдаев өз өмірінде Абайдың өлеңдерін жанындай жақсы көрген, қырық жылдық ұстаздық қызметінде Абай өлеңдерін шәкірттеріне жалықпай жаттатумен өткен, әуелі Алла деп, сонан кейін Абай деп өмір сүрген адам екен. Өлгенде де жастығының басынан Абай өлеңдері жазылған блокноты, содан кейін өз ұрпақтарына арнап жазған хаты табылған. Осыған қарап-ақ Назыке ақсақалдың Абай өлеңдері мен қара сөздерінің мағынасын ұғып қана қоймай, оның философиялық тұңғиығы мен дәстүріне мейлінше бой ұрғандығын, мына өмірдің өткінші екендігін ұғып, оның алды-артын болжап жүретін өте ұқыпты, ұсынықты адам болғандығын аңғаруға болады. Хатында ақсақал өзінің азан шақырып қойған шын аты-жөні Назаралы Құлманбет баласы екендігін жазып, “жаман айтпай жақсы жоқ” дегендей, егер алда-жалда олай-бұлай болып кететін болса, қабірінің басына шын аты-жөнін қоса жазуды табыстаған екен. Кім біледі, өмірді мейлінше жақсы көрген, сол үшін күрескен, оның мейілінше мағынаға толы болуын ұрпақтарына, шәкірттеріне жалықпай үндеумен өткен ақсақал соңынан қуып келе жатқан ажалдың есіктен кірер сәтін сезініп үлгерді ме, қайдам?..
Жоғарыдағы сөз арасында біз Назыке ақсақалдың 30-шы жылғы аштық пен 37-нің қуғын-сүргініндегі ажал тырнағынан аман құтылғанын айтқан едік. 41-дің қаһарлы күндерінде де бұл кісінің не өліммен бетпе-бет келген сәттері аз болған жоқ.
Сондағы от кешулерде де талай рет ажал тырнағынан аман қалды. Соның бір-екеуі туралы баяндай кетейік.
Назыке Қарамолдаев Смоленск – Рославль бағытын жаудан азат ету шайқасына қатысады. Мұндағы ұрыстардан соғысушы екі жақтан да көп адам шығын болды. Мәселен, тарихи деректер бойынша Смоленск бағытын азат ету жөніндегі операцияға кеңес жағынан 1,2 миллион адам қатысып, оның 107 мыңнан астамы қаза тапты және тұтқынға алынды, 350 мыңнан астамы жаралы болды. Ал неміс жағынан 850 мыңнан астам адам қатысып, 250 мыңы оққа ұшып, жараланды. “Қырық жыл қырғын болса да, ажалды өледі”, дегендей Назыке ағамыз жан беріп, жан алысқан бұл ұрыстардан да аман өтті. Осы арада жауынгер бастан кешірген мына бір жайды баяндай кетейік.
Өзі мұсылман баласы болғандықтан, әрі жастайынан басынан қауып-қатерлерді көп өткізіп жүргендіктен күн сайын ұйықтар алдында Құдайға жалбарынып, елінің амандығын, денінің саулығын күбірлеп сұрап жатады екен. Қасындағы орыс жолдастары онысын ұқпай: “Не деп әндетіп жатырсың, айтсаң қаттырақ айтпайсың ба?” дейтін көрінеді. Бірақ, қазақ сарбазы өзінің Аллаға сенетіндігін, күн сайын одан медет тілейтіндігін, мақсаты бір болса да діні бөлек достарынан жасырады. Өйткені, түсінбестік пайда болуы да мүмкін еді. Бір түні кезекті шайқастан кейін әбден шаршаған бұлар орман жиегінің ашық алаңқайындағы жалғыз еменнің түбінде 4-5 жауынгермен бірге ұйықтап жатады. Сонда: “Өй, неғып жатырсың? Тез тұр!” деген дауысты естіп, басын көтеріп алады. Жан-жағына қараса, ағаш түбінде бірге түнеп жатқан жолдастарынан басқа көзге ешкім шалынбайды. Әрі бұған мұндай сөзді айта қоятындай маңайында өзінен басқа қазақ та жоқ. Содан жай елес болар деп қайтадан қалғуға көшеді. Осы сәтте тағы да біреу құлағына: “Тез тұр да, суға бар”, деп ап-анық сыбырлайды. Қайтадан селт етіп оянып кетеді. Аспан алакеуімдене бастаған таң алдындағы сәт екен. “Қой, бұл бекер дыбыс болмады. Әлде әке-шешем аян беріп жатыр ма екен?!” деп ойлайды. Оның үстіне өзінің шөлдеңкіреп жатқандығын сезінеді де не де болса орнымнан қозғалайын деген оймен әудем жердегі бұта-бұтаны қуалап, сылдырай ағып жатқан бұлақ суына орнынан тұрмастан еңбектеген күйі жетеді. Судан қанып ішіп, артына бұрылғаны сол еді, жаңа ғана өзі жатқан еменнің түбіне жаудың атқан бір снаряды ышқынып келіп бұрқ етіп жарылып, теректі төңкеріп тастайды. Осыдан кейін-ақ айналаны азан-қазан қылған оқ нөсері басталып жүре берді. Бұл немістердің шабуылға шығар алдындағы әрекеті еді. Ауыр артиллерияның күшімен күрт басталған шабуылдан көптеген адам шығын болады. Мұнымен бір еменнің астында бірге ұйықтаған жауынгерлердің барлығы алғашқы снарядтың жарылысынан-ақ түгелдей опат болып кеткендігін ұрыс аяқталған соң барып бір-ақ біледі.
Қазақ сарбазы Назыке Қарамолдаев соғыста осындай жағдайларды көп бастан кешіп, ерлікпен шайқасып, 1943 жылғы қарсы шабуылдардың бірінде қол-аяғынан жаралы болды да, екі саусағын майдан даласына қалдырып еліне оралды. Бейбіт еңбекке араласты. Жар сүйіп, тоғыз бала тәрбиелеп өсірді. Жеті перзентіне жоғары білім әперді, екі баласы орта арнаулы оқу орнын бітірді.
1946 жылы Қордайдың Қызылсай, Сортөбе ауылдарында, ал 1947 жылдан бастап Алға ауылындағы орта мектепке директор болып тағайындалып, әрі қазақ тілі мен әдебиеті пәнінен сабақ берді. Алматыдағы Абай атындағы қазақ педагогикалық институтын бітірді. Өз ауылында тапжылмастан 1969 жылы зейнеткерлікке шыққанша мектеп басқарып, ұстаздардың ұстазы атанып жұмыс істеді.
Алға ауылындағылар Назыке ақсақалды үлкен-кішісі бірдей тегіс құрметтеді. Адамгершілікке берік, ісіне таза, қатал мінезіне бас иетін. Өйткені, ұстаз бүкіл ауылға тәрбие көрсетіп, шәкірттері үшін жанын салды. Осы адам болады-ау деген шәкірттерді Алматыға өзі апарып, оқуға сүйреді. Жалықпай ағаш ектірді. Шекісіп қалғандарын татуластырды. Жас отбасылардың тәлім-тәрбиесіне дейін араласып, өнеге көрсетіп отырды.
Назыке ақсақалдың шәкірттерінің бірі Далбай Омаров бүгіндері Алға ауылынан үлкен мешіт ашып, елді имандылыққа шақырып, сауапты іс атқарып жатқан, ел сыйлаған қадірлі азамат. Ал Әбдірахман Мамашев Жамбыл облыстық білім басқармасының бастығы болып ұзақ жыл қызмет атқарған жан. Педагогика ғылымдарының докторы ол Назыке ұстазы жайлы естеліктер жариялап, кейінгі жастарға өмірін өнеге етіп отырады.
Назыке ақсақалдың балалары ата-ана тәрбиесіне сай бойлып өсті. Бүгінгі таңда өмірдің әр саласында қоғамға игілікті қызмет етуде. Қыздарының бірі Баян өзі туған Қордай ауданындағы халықты еңбекпен қамту және әлеуметтік бағдарламалар бөлімін басқарып, мемлекеттің әлеуметтік саладағы саясатының жергілікті жерде дұрыс орындалуына, ел жағдайының жақсаруына барынша үлес қосуда. Балаларының бірқатары әке жолын таңдады. Аналары Зәмзе әжейді алақандарына салып, аялап отыр.
– Өзі де өңді, бойшаң әкеміз әр нәрсеге эстетикалық талғаммен, ал өмірге үлкен ой көзімен қарайтын. Абай өлеңдері мен қара сөздерін халыққа үлгі етіп айтып отырушы еді. Үстіне шаң жуытпайтын. Балаларынан 30-дан астам немере, 15 шөбере көріп кетті. Бір тісі түспестен, белі бүгілместен 85 жасында ешбір ауырып-сырқап қиналмастан дүниеден өтті, – дейді бұл күндері Қазақстан Ұлттық Банкінде бас маман болып жемісті қызмет істеп жүрген қыздарының бірі Бақыт Назыкеқызы.
Жаратушының өзі “сақтансаң сақтаймын” деген ғой. Өмірде көп қатерді бастан кешіргенімен, қиындықтың бәрін қайыспай көтеріп, өзін сақтай білу, өмірді ардақтай білу арқылы соңында рулы елге лайық ұрпақ қалдырған, қоғам үшін көптеген шәкірт тәрбиелеген, сөйтіп, өмірін мағынаға толтырып, айналасын гүл-бақшаға айналдырған қарт сарбаздың, үлкен жүректі ұстаздың жүріп өткен жолы осынысымен ардақты да өнегелі демекпіз.
Сұңғат ӘЛІПБАЙ.
Жамбыл облысы, Қордай ауданы.