Кеше Қасым-Жомарт Тоқаевтың төрағалық етуімен болған Парламент Сенаты бюросының отырысында Парламент Мәжілісі мақұлдаған заң жобалары палата комитеттеріне бөлініп берілді, деп хабарлады Сенаттың баспасөз қызметі.
Атап айтқанда, “2006 жылғы 5 мамырдағы Қазақстан Республикасының Үкіметі және АҚШ Үкіметі арасындағы Экономикалық даму жөніндегі Қазақстан-Америка бағдарламасы бойынша өзара түсіністік туралы меморандумға Қосымша келісімді ратификациялау туралы” заң жобасын Экономикалық және өңірлік саясат комитеті зерделейтін болды.
Бюро отырысында сондай-ақ палатаның 12 қарашада болатын кезекті отырысының күн тәртібіне қалыптастыру үшін палата комитеттерінің ұсыныстары да қаралды.
Палата отырысында қаржы мәселелеріне қатысты бірқатар жобаларды қарау жоспарланды. Олар: “2011-2013 жылдарға арналған республикалық бюджет туралы”, “Қазақстан Республикасының Ұлттық қорынан 2011-2013 жылдарға арналған кепілдендірілген трансферт туралы”, “Республикалық және облыстық бюджеттер, республикалық маңызы бар қала, астана бюджеттері арасындағы 2011-2013 жылдарға арналған жалпы сипаттағы трансферттердің көлемі туралы” заң жобалары.
Сонымен қатар, депутаттар талқысына бірқатар халықаралық сипаттағы заң жобалары ұсынылатын болды.
Отырыста “Қазақстан Республикасының кейбір заңнамалық актілеріне норма шығармашылық қызметті жетілдіру мәселелері бойынша өзгерістер мен толықтырулар енгізу туралы” заң жобасы екінші оқылымда қаралады. Сондай-ақ “Қазақстан Республикасының кейбір заңнамалық актілеріне азаматтық заңнаманы жетілдіру мәселелері бойынша өзгерістер мен толықтырулар енгізу туралы” заң жобасы бойынша Парламент палаталары арасындағы келіспеушіліктерді қарау және еңсеру үшін келісу комиссиясының құрамына депутаттар сайланады.