І.Омаров атындағы Қостанай облыстық қазақ драма театрына он жыл толды. Осыдан он жыл бұрын Елбасы Нұрсұлтан Назарбаевтың өзі Қостанайда тұңғыш ашылған қазақ драма театрының лентaсын қиып, сахнасында тұрып, қостанайлықтарды өнердің киелі отауымен құттықтаған болатын. Нұрсұлтан Әбішұлының театрға қазақтың дара ұлдарының бірі, мәдениет пен өнер жанашыры Ілияс Омаровтың атын беру туралы ұсынысын көрермендер ерекше ықыласпен қолдаған болатын. Он жыл ішінде қазақ драма театры көрермендер көңіліне руханият шырағын жақты. Таза өнерге тағзым жасалған салтанатты жиында облыс әкімі Сергей Кулагин өнер ұжымын торқалы тойымен құттықтады.
– Мен Қостанай облысына қызметке келгенде облыстық қазақ драма театрының ашылғанына үш-ақ жыл болған екен. Онда маған Арқалық қаласынан жақсы таныс белгілі актерлер келіп қызмет істеді. Содан бері бұл өнер ұжымымен бірге келеміз. Он жыл көп те уақыт емес, бірақ өнер ұжымы лайықты биікке көтерілді, – деді өңір басшысы. Сергей Кулагин той иелеріне тарту-таралғы жасады. Ол театр директорына қырық бес орындық HUNDAU автобусының кілтін табыс етті. Сонымен қатар актерлер Зәмзәгүл Балтабаева, Берікқан Төкенов, Айбол Шәкіржанов Мәдениет министрлігінің “Мәдениет қайраткері” төс белгісімен, бірқатар актерлер Мәдениет министрінің дипломымен, облыс әкімінің Мақтау қағазымен марапатталды.
Театр тойына Театр қайраткерлері одағының төрағасы Тұңғышбай Жаманқұлов, атақты режиссерлер Есмұқан Обаев, Жанат Хаджиев және І.Омаровтың немересі Ілияс Омаров келді.
– Қостанай театры – менің де театрым. Өйткені, осы театр ашылғанда оның табалдырығын алғаш аттаған, киелі сахнасында алғаш өнер көрсеткен менің шәкірттерім болатын, – деді Қостанай көрермендерінің алдында сөз сөйлеген Тұңғышбай Жаманқұлов.
Салтанат соңында он жылда осы театр сахнасында қойылған 53 спектакльдің таңдаулыларынан үзінділер көрсетілді.
Нәзира ЖӘРІМБЕТОВА, Қостанай.