Халқымыздың кең пейіліне, ақжарма ниетіне құдай берген ғой, қазақ жерінің қойнауы толған кеніш дерсіз. Еліміз минералдық шикізат қорына өте бай, ал бірқатар металдар бойынша барланған қорлардың көлемі жөнінен көшбасшылар ондығына кіреді. Сөйте тұра осы металдардың әлемдік қазып алынуында республиканың үлесі аса үлкен емес: елдегі барланған қорларды игеру көлемі 10-15 пайыз ғана. Олай болса, Қазақстан Республикасының кен-металлургия саласын дамытудың 2010-2014 жылдарға арналған бағдарламасында атап айтылғандай, мұның өзі индустриямызды одан әрі өрлетудің көптеген өрелі мүмкіндіктерін алға тартады. Демек, аса маңызды бұл істің тізгіні соңғы жылдар бедерінде қолда барды ұқсата білетін «Самұрық-Қазына» қорының қолына берілуі де үлкен мақсат көздеп, осы орайдағы бірталай келелі міндеттердің сәтті шешілуін меңзесе керек. Қазақстанның бәсекеге қабілеттілік танытушы салаларының бірі бола отырып, 2009 жылдың қорытындылары бойынша кен-металлургиялық кешен елдің өнеркәсіп өнімінің 16,9 пайызын өндіргенін, экспорттың жалпы көлеміндегі оның үлесі 19,6 пайыз болғандығын қаперге алсақ, биыл бұл көрсеткіштер едәуір өсе түскен. Қазақстан халқына арнаған Жолдауында Мемлекет басшысы 2015 жылға қарай кен-металлургия кешенін өнімнің өндірілуі мен экспортын екі еселей отырып дамыту міндетін қойды.
Шикізат рыноктарындағы қазіргі үрдістер 2010-2020 жылдар аралығындағы таяу келешекте жағдайдың тұрақтануын болжалдап, кен-металлургия кешенінің өнімдеріне сұраныстың өсу мүмкіндігін паш етуде. Қытайдың және басқа дамушы елдер экономикасының өсуі, сондай-ақ дамыған елдер экономикасының қалпына келтірілуі металдардың барлық түрлерінің тұтыну көлемі өсуін қамтамасыз етпек. Алайда неғұрлым жоғары бөліністегі өнімдер негізінен мемлекеттен тысқары жерлерде өндірілуде. Мұндай үрдіс экономиканың кемшін жағын күшейтеді, қосымша құнның елеулі бөлігінен айырады, экологиялық ластанудың ұлғаюына және елдегі шикізат қорының азаюына әкеліп соғады. Міне, осы жағымсыз үрдісті ауыздықтау және саланы кешенді дамытуды қамтамасыз ету мақсатында өткен жылдың басында Үкімет қаулысымен «Самұрық-Қазына» ұлттық әл-ауқат қоры» АҚ компаниялар тобына кіретін «Тау-Кен Самұрық» ұлттық кен компаниясы құрылған. Компания алдына үлкен міндеттер қойылды. Солардың бір парасы мемлекеттік активтерді топтастыру, жер қойнауы байлықтарын пайдалану тиімділігін арттыру, кен активтерінің құнын өсіру болып табылады. Қазір компания аталған міндеттер үдесінен табылу мақсатында Қазақстанның кен-металлургия секторына инвестиция салу және жаңа технологияларды енгізу үшін шетелдік стратегиялық әріптестер тарту жөнінде белсенді жұмыстар жүргізуде. Мысалы, Rio Tinto, POSCO, Vale (CVRD), Antofagasta ArcelorMittal Temirtau сияқты компаниялармен келіссөз жүргізіліп, ұйғарымдық ниеттер туралы меморандумдарға, басқа да келісімдерге қол қойылды.
«Тау-Кен Самұрық» АҚ-тың әзірге дайын металл өндіру жөніндегі жобалары болмаса да, болашақта дайын металдар ғана емес, сонымен бірге одан бұйымдар шығаруға бағдарланған бірқатар қара және түсті металдар кен орындарын игеруге шетел инвесторларын тартуды ойластыруда. Айтар болсақ, металдық вольфрам және одан бұйым өндіруге негіз болып табылатын ферровольфрам, ферромолибден және вольфрам карбиді тектес қорытпаларды өндіру мақсатында вольфрам-молибденді төмен сапалы кен жыныстарын игеру жөніндегі жоба әзірлену үстінде. Елімізде вольфрам мен оның қорытпаларының өндірісі жоқ болғандықтан да, аталмыш жобаның металлургияны ғана емес, соған қоса осынау өнім бастапқы шикізат саналатын жоғары технологиялы салаларды дамыту үшін де маңызы зор. «Тау-Кен Самұрық» АҚ-тың алдына қойылған келелі міндет елдің кен-металлургия өнеркәсібінің тұрақты дамуын қамтамасыз етуге қатысу арқылы Қазақстанның экономикасы мен оның бәсекеге қабілеттілігін арттыруға көмектесу болып табылады. Олай болса, бұл стратегиялық дамудың бірнеше кезеңі көзделген. Соның ішінде инвестиция тарту кезеңі 2010-2013, пайдалану кезеңі 2013-2018 жылдар және құнның өсу кезеңі 2015-2020 жылдар аралығын қамтиды. Инвестициялық кезеңдегі стратегияға сәйкес Компания тартымды кен орындарын дайындауды іске асырып, өндірістік нысандардың, соның ішінде кеніштердің, кен байыту фабрикалары мен металлургиялық кәсіпорындардың құрылыстарын бастайды. Пайдалану кезеңінде тиімділігі жоғары инновациялық технологияларды қолдана отырып, шикізатты қазып алу және өңдеу орайындағы жобалық қуаттарға шығу жоспарланған.
Ал, жаңа бөліністерге шығуды компания дамудың үшінші кезеңіне ыңғайластырып отыр. Бұл кезде өнеркәсіптің әртүрлі металдық салалары үшін шикізатты тереңдеп өңдеудің және жоғары технологиялы өнім өндірудің технологиясы енгізілмек. Сонымен қатар Компания бірінші кезеңде жаңа бөліністерді игеру және қосылған құны жоғары өнімдер шығару ескерілген жобаларды да ойластыруда. Осы мақсатта «Тау-Кен Самұрық» АҚ өздерін әлемдік нарықта жаңа технологиялардың жаршылары ретінде танытқан Outetec, Bateman, Hatch, NBL Gold және басқа халықаралық инжинирингті компаниялармен ынтымақтастықты өрістете түсуде. Сондай-ақ «Қазақстан Республикасы Минералдық шикізаттарды кешенді өңдеу жөніндегі ұлттық орталығы» кәсіпорнымен, Ж.Әбішев атындағы химия-металлургиялық институтымен, «Жер, металлургия және кен байыту туралы ғылымдар орталығы» АҚ-пен және басқалармен бірлесе, отандық ғылым әлеуетін пайдалану жөнінде ықтиятты жұмыстар жүргізілуде.
Қазіргі уақытта «Тау-Кен Самұрық» АҚ жаңа бөліністерді игеруді және қосылған құны жоғары өнімдер өндіруді көздейтін жобаларды әзірлеуде. Осы реттегі инвестициялық жобалар аясында кен жыныстарынан металдарды кешенді түрде алуға баса назар аударылуда. Сонымен қатар бүгін таңда техногенді минералдық түзілімдерді барлау және олардан металл алу жөніндегі жобалар да әзірленуде. Бұл өз кезегінде еліміздегі экологиялық жағдайды жақсартуға септігін тигізбек. Кен-металлургиялық активтерді тиімді басқарудың да маңызы зор. Ендеше, нақ осы мақсатта еліміздегі кен және металлургия активтерін біріктіретін жоғарылы-төменді интеграцияланған холдинг құру ұйғарылып отырғандығы көңілге үміт ұялатады. Демек, алдағы жылдарда саланы дамытудың негізгі міндеті металлургия өнеркәсібінің жаңа өңдеуші өндірістерін кезең-кезеңімен құру болуы тиіс. Бұл кәсіпорындарда жоғары технологиялы өндірісті ұлғайтуды және сыртқы рыноктарға экспорттың кеңейтілуін қамтамасыз ететін, сондай-ақ ішкі рынок сұранысын да қанағаттандыратын, қосылған құны жоғары өнім шығарылуы керек. Кен-металлургия саласының түйткілдерін шешіп, жұмысын өрге бастырып, өрісін кеңейтуді «Самұрық-Қазына» өз қолына алғалы бірталай игілікті істер атқарылып, келешек сұлбасы жақсы қырынан көрінгендей. Мемлекеттік қолдауға ие болған жобалық шаралармен қанаттанған кешеннің келешегі кемел болатындығына, оның кереметтерге бейімділігіне біз де сенеміз.
Қорғанбек АМАНЖОЛ.