Біздің елдегі қоғамымыздағы ең басты құндылық – адам бостандығы болса, адамның және адамзаттың құқықтары мен бас бостандықтарын қамтамасыз ету және қорғау – конституциялық заңдылықтың басты талабы дейміз. Соның ішінде саламатты өмір салтына қол жеткізуде, денсаулықты сақтау мен нығайтудағы басты міндеттің бірі бала құқығын қорғау, зорлық-зомбылыққа қарсы күрес жүргізу болып табылады. Бұл орайда, осы талаптарға сай «Зорлық-зомбылыққа қарсы күрес» атты айлық жүргізу барысында Алматы қаласы, Наурызбай ауданы, №157 жалпы білім беретін мектепте Наурызбай аудандық прокурорының орынбасары М.Айқымбеков, Наурызбай аудандық Білім бөлімінің жетекшісі Г.Жомартбай, мектеп директоры С.Ахметова және мектеп әкімшілігі мен психологтары, сонымен қатар, ата-аналардың қатысуымен «Балалар мен жасөспірімдерге қатысты зорлық-зомбылықты болдырмау және оның алдын алу» тақырыбында дөңгелек үстел өтті.
Онда бүгінгі таңдағы өзекті мәселелердің бірі – балалар мен жасөспірімдерге қатысты зорлық-зомбылық және оның алдын алу амалдары талқыланды. Осы мәселе бойынша сөз алған Наурызбай ауданы прокурорының орынбасары М.Айқымбеков, аудан прокурорының көмекшісі О.Нұрғазиев осы тақырып аясында бейнетүсірілім көрсете отырып, «Ата көрген оқ жонар, шеше көрген тон пішер» демекші, балаға отбасы тәрбиесінің әсері мол екендігін, отбасындағы ата-ананың мінез құлқы – баланың көз алдындағы үлгі, өнеге алатын, оған қарап өсетін нысаны екендігін жеткізді. Олар балаларды үнемі бақылауда ұстауымыз керектігін, әсіресе, қолайсыз отбасындағы балалармен жұмыс жасап, мектеп педагогтарымен, психологтарымен тығыз байланыста болу, баланың жеке басына мән берудің маңыздылығын айтты.
Мектеп психологтары А.Жылқыбаева мен А.Бопиева ата-аналармен «Өмірді қалай түсінесіз?» атты тренинг өткізді. Кездесу барысында ата-аналардың ойында жүрген көптеген сұрақтарға жауап берілді. «Қыз балалар үшін гинеколог маманын шақырып іс-шара өткізу дұрыс па?» деген сұраққа М.Айқымбеков мұндай іс-шаралардың қыздарымыз үшін маңызы зор екендігін атап өтті.
«Егемен-ақпарат».