Шаңғымен тұғырдан секіру
Қысқы Азия ойындарында шаңғымен тұғырдан секіру бұқаралық сипат ала қоймаған спорт түрінің бірі. Оған, сірә, онымен айналысу үшін де арнайы спорт құрылыс нысаны керектігінен шығар. Ондай спорт құрылыстары көп елде тапшы, тіпті жоқ десе де болады. Біздің елімізде де арнайы шаңғымен тұғырдан секіру кешені де осы Қысқы Азия ойындарын өткізуге байланысты салынып, пайдалануға берілді. Енді бұл спорт түрінің дамуына елімізде жақсы негіз қаланды деп нық айтуымызға болғандай.
Содан да, «ұшатын шаңғышылар» Алматыға көп келе қойған жоқ. Жапония, Корея Республикасы, Қытай сияқты елдерден ғана келсе, оған біздің жігіттеріміз қосылды. Бір жағы алаң иелері болғандықтан да ең көбі біздікі болды. Олардың да атын атап кетейік: Радик Жапаров, Николай Карпенко, Алексей Королев, Евгений Левкин, Константин Соколенко. Оларды елімізде осы спорт түрі қарлығаштарының бірі болған Қайрат Биекенов жаттықтырды.
Тағы бір атап айтатын жай: спорттың бұл түрі Жапонияда айрықша күшті дамыған. Жапон жігіттері әлемдік ауқымда ең мықтылармен иық тірестіріп жүреді. Биылғы Азия ойындарында да олар сол мықтылығын көрсетті. Үлкен тұғырдан (К125) секіруден олар алтын мен күмісті олжалады.
Екі секірудің алғашқысында 124 метрге, екіншісінде 130,5 метрге «ұшқан» Казуя Йошиока 233,1 балл жинап, бірінші орынға шықты. Ал Наганодағы Олимпия ойындарының чемпионы Казуоши Фунаки одан 16 балл ұтылып, екінші орынға қанағаттанды. Ал оған бар-жоғы 0,6 балл ғана ұтылған біздің Николай Карпенко қола медальді иеленді.
Николайдың жеңісі – үлкен жетістік. Оңтүстік Кореяның жігіттері де мұндай медальдан үміткер еді.
Алда әлі екі күндік жарыс бар. Кіші тұғырдан (К95) секіру мен командалық жарыста да жігіттеріміз қоржынға олжа салар деп үміттенеміз.
Мамадияр ЖАҚЫП.
Алматы.