Кеше Орталық сайлау комиссиясы 2011 жылғы 3 сәуірге тағайындалған Қазақстан Республикасы Президентінің кезектен тыс сайлауын әзірлеу мен өткізу жөніндегі негізгі шаралардың күнтізбелік жоспарын бекітті.
Орталық сайлау комиссиясының төрағасы Қуандық Тұрғанқұлов Конституцияға сәйкес, ел Президенті Қазақстан Республикасының азаматтары жалпыға бiрдей, тең және төте сайлау құқығы негізінде жасырын дауыс беру арқылы бес жыл мерзімге сайланатынын хабарлады. Және заңға сәйкес ел президенті болуға тумысынан Қазақстан Республикасының азаматы болып табылатын қырық жасқа толған, мемлекеттік тілді еркін меңгерген және Қазақстанда соңғы он бес жыл бойы тұратын азамат сайлана алатындығын жеткізді. Президенттікке кандидаттарды ұсыну 2011 жылғы 5 ақпанда басталып, 20 ақпанда аяқталады, ал президенттiкке кандидаттар ұсынуға саяси партиялар мен республикалық қоғамдық бiрлестiктер құқылы. Сондай-ақ азаматтар өзін-өзі ұсына алады. Сайлаушылардың президенттiкке кандидатты қолдауы олардың қол жинауы арқылы расталады. Әрбір президенттiкке кандидат ең аз дегенде еліміздің 14 облысының кемінде 9-ынан, сондай-ақ Алматы және Астана қалаларынан теңдей өкілдік ететін 91 мың қол жинауы тиіс. Президенттікке кандидаттарды тіркеу кандидаттар барлық қажетті құжаттарды ұсынғаннан кейін басталады және 2011 жылғы 2 наурызда аяқталады, деді ОСК төрағасы. Президенттікке кандидат тіркелгенге дейін және оның Конституциямен және «Сайлау туралы» Заңмен қойылатын талаптарға сәйкес келуі тексеруден өткен соң, сондай-ақ оны қолдап жиналған қолдар тексерілгеннен кейін Орталық сайлау комиссиясының шотына 800 мың теңгеге жуық көлемде жарна аударуы тиістігін мәлім етті. Және заң бойынша президенттікке кандидат пен оның жұбайы (зайыбы) тiркеуге дейін тұрғылықты жерi бойынша салық органдарына 2011 жылғы 1 ақпандағы жағдай бойынша табысы мен мүлкі туралы декларациялар ұсынуы тиіс.
Сонымен, Қазақстан Республикасы президенттік сайлауының заңдық негізі толық қаланды, ал президенттікке кандидаттардың сайлауалды үгіті 3 наурызда басталып, 1 сәуірде 24.00 сағатта аяқталады. Яғни, дауыс беретін күннің алдындағы күні және дауыс беретін күні үгіт жүргізуге тыйым салынады.
Комиссия отырысында тағы да бір мәлім етілген маңызды жағдай – ол шетелдіктердiң, азаматтығы жоқ адамдардың, шетелдік заңды тұлғалардың және халықаралық ұйымдардың сайлауда белгiлi бір нәтижеге қол жеткiзуге кедергі болатын немесе демеп жіберетін қызметті жүзеге асыруына тыйым салынуы.
Президенттік сайлау республикалық бюджеттен қаржыландырылады. Сондай-ақ үміткерлердің бұқаралық сайлауалды шараларын өткізуге және кандидаттардың сайлау заңнамасымен көзделген үгіт материалдарын шығаруға байланысты шығындары, кандидаттардың көліктік шығындары Орталық сайлау комиссиясы белгілеген мөлшерде бюджеттік қаражат есебінен өтелетіндігі және үгіт науқанын жүргізу үшін президенттікке кандидаттар сайлау қорларын құруға құқылы екендігі де мәлім етілді. Ал президенттікке кандидаттың сайлау қорының шекті мөлшері 431 млн. 973 мың теңгені құрап, бұл қорлардың қаражат көздеріне және жұмсалуына заңнамаға сәйкес қаржылық мониторинг жүргізілетін болады. Сайлаушылардың толық және дәл тізімдерін жергілікті атқарушы органдар тиісті сайлау комиссияларына 13 наурыздан кешіктірмей жолдауы тиіс, ал 18 наурыздан бастап тізімдер азаматтардың танысуы үшін ұсынылуы керек.
Азаматты сайлаушылар тізіміне енгізуге оның тұрғылықты жері бойынша нақтылы сайлау учаскесінің аумағында тіркелуі негіз болады.
Азамат өзінің тұрақты тіркелу орнынан тысқары кететіндей болса, 18 наурыз бен 2 сәуір күнгі 18.00-ге дейінгі аралықта өз учаскелік сайлау комиссиясына барып, дауыс беру құқығын беретін есептен шығару куәлігін беру туралы өтініш білдіруіне болады. Дауыс беру 3 сәуір күні жергілікті уақыт бойынша таңғы сағат 7.00-ден кешкі сағат 20.00-ге дейін жүргізіледі. Сайлау өткеннен кейін Орталық сайлау комиссиясы президенттік сайлаудың қорытындысын 9 сәуірден кешіктірмей шығаруы және тиісті қаулы қабылдауы керек.
Отырыстан кейін журналистерге арналған брифингте Ортсайлауком төрағасы сайлау науқаны барысында сайлау комиссияларының сайлауды ұйымдастыру, әзірлеу мен өткізуінің негізгі ұстанымдары ашықтық, жариялылық екенін айта келіп, аталған мәселелердің сақталуына айрықша көңіл бөлінуі тиістігін атап көрсетті. «Бұған сайлауды әзірлеу мен өткізу барысын байқауға отандық және шетелдік байқаушылардың қатысуы да ықпал ететін болады», деді Қ.Тұрғанқұлов. Ол, сонымен қатар, журналистерге алдағы сайлауда осыған дейін қағазбен қатар пайдаланылып келген электронды дауыс беру жүйесінің қолданылмайтындығын да жеткізді. Өйткені, өткен сайлауларда оларды пайдаланушылар қатары өсу орнына кеміп отыруына байланысты алдағы сайлауда «Сайлау» ААЖ-сы пайдаланылмайды деген пікірге тоқтадық, деген төраға сайлауды әзірлеу мен өткізу кезеңінде тұрақты жұмыс істейтін баспасөз орталығының ашылғандығынан да хабардар етті.
Анар ТӨЛЕУХАНҚЫЗЫ.