Қош, Алаштың Әзағасы!

Жақсылық жағдай бола қалса, Әзағаң әр уақыт сүйіншілеп «Еге­меннің» Алматы бөлімшесіне телефон соғатын. Қуанышын бөлі­сіп, балаша мәз болатын. Елбасы хабарласып, халін сұрағанда: «Шал­дарша шапқылап жүріп жатыр­мын», деп айттым деп сонша­лық­ты бір риясыз көңілмен ағынан жарылатын. Жақында ғана Азиа­даның құрметті алаугері ретінде Өскеменге барып келген жолы: «Несін айтасың, мына ағаларың шал болса да желе жортып жү­гір­генде алаугер жастардың бәрінен озып кетті ғой», деп шаттанған болатын. Ағаның көңілі жас еді, өмірге құштар еді, жүрегі тұнып тұрған ізгілікті махаббат еді. Махаббаттың жыршысы. Ізгі­ліктің жыршысы. Ерліктің жыр­шысы. Халыққа мейлінше кең та­раған, оқырманы ең көп жазушы. Бір ғана «Махаббат, қы­зық мол жылдар» мен «Ақиқат пен аңыз» осыған анық айғақ. Ана бір жылдары туған халқына «қазақ ұлтшылдығын» таңғаны үшін бас хатшы Горбачевқа нара­зылық хатын жолдаған ұлтжанды қай­раткер. Екі ай бұрын ғана ел Президентінің қолынан «Отан» орденін алған отаншыл абыз. Өзі де қазақ қыздары сайлап қойған Махаббат Президенті. Қазақстанның халық жазу­шы­сы, Мемлекеттік сыйлықтың лау­реаты Әзілхан Нұршайықовты ақ­ырғы сапарға аттандырған М.Әуе­зов атындағы академиялық дра­­ма театры алдында болған қара­лы жи­ында айтылған сөздердің ой тұжырымы осыған сайды. Әде­бие­тіміз бен мәдениетімізді ауыр шығынға ұшыратқан қазаға бай­ланысты Елбасының көңіл айту жеделхатын көпшілікке Алматы қаласының әкімі Ахметжан Есімов жеткізді. Қарт қаламгердің өмір бойы елге қызмет еткен өнеге-үлгісін айта келе, Қазақстан Жазушылар одағы басқарма­сы­ның төрағасы Нұрлан Оразалин көңіл айту жеделхаттарын жол­дағандар қатарында Премьер-Министр К.Мәсімов, Сенат пен Мә­жіліс Төрағалары Қ.Тоқаев пен О.Мұхамеджанов, Мемлекеттік хат­шы – Сыртқы істер министрі Қ.Сау­дабаев, ақиық ақын, ЮНЕСКО-дағы Қазақстанның өкілі О.Сү­лейменов, министрлер М.Құл-Мұ­хаммед, Б.Жұмағұлов, А.Жұма­ға­лиев есімдерін, Мәскеудің бір топ қаламгерлерін атап өтті. Алма­ты, Шығыс Қазақстан және Оң­түстік Қазақстан облыстарынан халқы сүйген, халқын сүйген ең ха­лық­шыл жазушымызбен қош­та­суға арнайы делегациялар келіпті. Қаралы жиында Мәжіліс депу­таты Н.Сабильянов, әдебиеті­міз­дің ақсақалы Т.Кәкішұлы, халық жазушысы Т.Молдағалиев, Әл-Фа­раби атындағы Қазақ ұлттық уни­верситетінің ректоры, академик Ғ.Мұтанов, жазушы С.Досанов сөз сөйлеп, Әзағаңның майдан­да­ғы, журналистикадағы, жазушы­лық жолдағы және өмір тірлігіндегі өшпес із қалдырған тағы­лым-ғибраттарына кеңінен тоқталды. Әзағаң Кеңсайдағы өзінің сүй­ікті жары, мәңгілік махаббатының жырын маздатқан Халима апай­дың қасына қойылып, аруағына Құран бағышталып, ас  берілді. Қорғанбек АМАНЖОЛ.