Партия бағдарламасы: арман емес, ақиқат

«Нұр Отан» ХДП ХІІІ съезі тек партияның ғана емес, еліміздің қоғамдық-саяси өміріндегі маңызды оқиғаның біріне айналды. Съезд тұтас он жылға арналған ұзақ мерзімді жаңа партиялық бағ­дар­ламаны қабылдады. Бұл – Қазақстанның болашаққа жасаған жаңа серпілісі мен өркениетті өсу кепілі. Осыдан жиырма жыл бұрын еліміз дербес даму жолына түсті. Бұл жол ел тарихындағы жаңа дәуірдің бастауы болды. Қазақстанның қоғамдық-саяси және әлеуметтік-экономикалық өмірінде ұлы өзгерістер легі жыл сайын арта түсуде. Бүгінгі таңда еліміз батыс пен шығыс елдерінің басын қосқан, мәдениеттері тоғысқан өркениет орталығына айналды. Тәуелсіздік жылдарында жеткен жетістіктеріміз аз емес. Өткен ғасырдың соңғы онжылдығынан бері ел экономикасы қазіргі заман талаптарына сай дамыту шаралары, нарықтық шаруашылық құру­дың ұлттық жобасы оң нәтиже берді. Ұлттық әл-ауқат деңгейі жөнінен әлем мемлекеттерінің рейтингінде Қазақстан өткен жылы 26 сатыға ілгерілеп, 110 ел арасында 50-ші орынға көтерілді. Атап айтсақ, 2008 жылғы дағдарыс кезінде еліміздің резерві бар-жоғы 43 млрд. долларды құраған еді. Бүкіл әлемді дағдарыс лебі шарпыған кезде осы қаржының 10 млрд.-ы дағдарыспен күресуге бөлін­гендіктен, біз қиыншылықты аса сезінген жоқпыз. Елбасының Ұлттық қор жинақтау жөніндегі ұтымды шешімі өз нәтижесін беріп, дағдарыстан дамудың даңғыл жолына түстік. Бүгінгі таңда еліміздің резерві Ұлттық қорды қоса алғанда 63 млрд. АҚШ долларын құрайды. Қазақстан халық­аралық резерв деңгейі бойынша 50 мемлекеттің қатарына енді. Еліміздің экономикалық әлеуеті жыл сайын артып, нығаюда. Мемлекет басшысы Нұрсұлтан Назарбаев мем­лекетіміздің осындай қарқынды дамуын қамтама­сыз ету мақсатында «Нұр Отан» ХДП мен Үкімет алдына бірқатар міндеттерді жүктеді. Онда білім беру, денсаулық сақтау және халықты жұмыспен қамтудың жаңа стратегиясы, тұрғын үй құрылысын қолдаудың және ипотеканы ынталандыру, кәсіп­орындарды және қаржы жүйесін дағдарыстан кейін қалпына келтіру, «Самұрық-Қазына» қорына қарас­ты компаниялардың акцияларын халық арасына тарату бағдарламасын дайындау сипатын­дағы халық­тың әл-ауқатын нығайту мен өмір сапасын жақ­сартуға бағытталған іргелі мәселелерді қамтыды. Өткен жылдың 7 желтоқсанында Мемлекет бас­шы­сы өз Жарлығымен Білім беруді дамытудың 2011-2020 жылдарға арналған жаңа мемлекеттік бағдарламасын бекітті. Оны жүзеге асыру екі кезеңге: 2011-2015 жылдар және 2016-2020 жыл­дарға жоспарланды. Бағдарламаның тек қана бірінші кезеңіне республикалық бюджеттен бөлінетін қаржыландырудың қосымша көлемі  461,1 млрд. теңгені құрайды. Мұндай мол қаржы білім беру саласына бұрын-соңды бөлінбеген болатын. Бағ­дарламаны іске асыру барысында Қазақстанның білім беру жүйесі құрылымы, мазмұны, басқару мен қаржыландыру тетіктері бойынша дамыған елдер моделіне сәйкес келетін болады. Білім беру жүйе­сінің дамуы бойынша Қазақстан ТМД елдері ара­сынан көшбасшылық орындарға шығады.  Елбасы жүктеген міндеттерді жүзеге асыруда Білім және ғылым министрі Бақытжан Жұмағұлов батыл қадамдар жасауда. Бүгінгі таңда Қазақстанда 4,5 млн.-ға жуық адам білім алуда. Білім және ғылым саласында 500 мыңға жуық педагог пен ғалым еңбек етуде. Бұл ел тұрғындарының 30%-ы білім және ғылым жүйесі­мен қамтылғандығын көрсетеді. Елімізде білім беру жүйесін ұйымдастыру қазіргі заман талабына сай, нарық сұранысын қамтамасыз етуге негізделген. Қазақстандықтар қолжетімді және сапалы әлемдік стандартқа сай білім алатын болады. Сапалы білім беру Қазақ­стан­ның индустрияландырылуының және иннова­ция­лық дамуының негізін құрауға бағытталады. Осы мақсатта Қазақстанда кемінде 2 жоғары оқу орнына үздік әлемдік университеттер рейтингісіне ену міндеті жүктелген. Мұнда білім алушы жастарға интеллектуалды тұлға ретінде қалыптасуға жағдай жасалса, ата-аналар өз балаларын таңдаған оқу орнында оқыту мүмкіндігі мен сапалы білімнің қолжетімділігі қарастырылған. Ең бастысы, педагог мәртебесін көтерудің қолға алынғаны қуантады. Біздің елімізде жастар саясатының мақсаты, ата-аналардың міндеті  өскелең ұрпақ, қазақстан­дықтарды толыққанды тұлға ретінде тәрбиелеу. Елбасы жастарды қалыптасқан тұлға, кәсіпқой маман және өз елінің патриоты болып, елін сүюге шақырды. Өзінің де өмір бойы осы формуланы ұс­танғаны және өзгелерге де осы жолды ұсына­тынын жеткізді. Қазіргі кезеңде жас ұрпақтың азаматтық ұстанымы айқын, саяси белсенді, бірнеше тіл меңгерген жоғары білімді маман болуы шарт. Жаңа буын өзгерістерден қаймықпай өршіл, серпінді жобалар ұсынуы тиіс. Елбасы осы мақсатта жастарды біріктіретін «Жас ұлан», «Жас қыран» жастар ұйым­дарының жаңа жүйесін құру жөнінде пар­тияға тапсырма берді. Осы жүргізілетін іс-ша­ра­лар­дың негізінде 2020 жылға қарай өкілді орган­дарға сайланушы жастардың үлесі 15%-ға жетеді. Жастар ұйымдарының қызметіне жастар­дың 29%-ы қатысатын болады. Ал мемлекеттік әлеуметтік тапсырыс шеңберінде әлеуметтік маңызды жоба­ларды іске асыруға тартылған жастар ұйымдары­ның үлесін 29%-ға жеткізу көзделген. Біздің ұрпақ еліміздің өркендеуіне өз үлестерін қосып, дамудың стратегиялық іргетасын қалауда. Бүгінгі таңда Елбасы  Нұрсұлтан Назарбаевтың Қазақстан халқына жасаған жолдауларындағы жос­парлары толығымен іске асуда. Біз осы бағдар­ламалардың арман емес, ақиқат екендігіне көзіміз жетіп отыр. Біз алға биік мақсаттар қойып, оларға қол жеткізе алатынымызды өзімізге де, өзгеге де дәлелдей білдік. Мемлекет басшысы алға Қазақ­станның одан әрі даму векторын айқын­дайтын жаңа өршіл міндеттер қойды. Онда 2030 жылға дейінгі даму стратегиясын лайықты орындау үшін елдің алдағы 20 жылдағы болаша­ғын жобалау және мақсаттарды белгілеу қолға алынды. Бұл даму стратегиясы Қазақстанның әрбір өңірін қамтитын ең перспективалы және инновациялы жобалардан тұратын болады. Елімізде бейбітшілік пен тыныш­тықты және қауіпсіздікті қамтамасыз ету мақ­сатын­да  саяси жаңғыру, демократиялық дамуды нығайту жүзеге асырылуда. Өркениетті бастамаларды жүзеге асыруда халқымыздың мақсаты – Ұлт Көшбасшысымен бірге жаңа әлемдегі жаңа Қазақстан құру. Отаны­мыздың әлемдік қоғамдастықта мәртебесін өсіріп, мерейімізді асырған еліміздегі бейбіт өмір мен бақытты болашақ үшін қалтқысыз қызмет еткен Елбасы – халық қалаулысы. Біз еліміздің жеткен осы жетістіктері болашақта да жалғасын табады деп сенеміз. Сондықтан да, біз басталған ұлы істерді жал­ғастырып, ел игілігі үшін қызмет еткен Н.Ә.Назарбаевты қолдаймыз, біз өз болаша­ғымыздың іргесін бірге қалаймыз! Асқар ӘБДУӘЛІ, Тараз мемлекеттік педагогикалық институтының ректоры, тарих ғылымдарының докторы, профессор. Жамбыл облысы.