Қыз-келіншек араласпайтын сала жоқ

Ақтөбе қаласында «Стратегия- 2020: әйелдерге арналған жаңа мүм­кіндіктер» атты облыстық конференция өтті. Конференция мақ­са­ты – Еліміздің Тәуелсіздігінің 20 жыл­ды­ғына орай, қоғамдық саяси және әлеуметтік-эконо­мика­лық да­муындағы әйелдердің рөлін кү­шейту, Қазақстанның стратегия­лық даму курсын іске асыруға әйел­дердің атсалысуын арттыру механизмдерін әзірлеу болып та­былады. Оған қатысқан мемлекеттік орган­дар­дың, саяси партия­лар­дың, үкі­мет­тік емес, кәсіподақ ұйым­да­ры­ның, БАҚ өкілдері мен депутаттар, білім, денсаулық сақ­тау, мәдениет және спорт ұйым­да­рының жетекші мамандары өңір­дегі гендерлік және отбасылық-демографиялық саясат­тың ағым­да­ғы проблемаларын жә­не 2006-2016 жылдарға арналған ҚР Гендерлік теңдік стратегиясын жүзеге асыру процесін талқылады. Конференцияда Қобда ауданы­ның әкімі Любовь Исмағамбетова еліміздің қоғамдық-саяси және әл­еуметтік-экономикалық дамуын­да­ғы әйелдердің рөлі туралы баяндаса, Ойыл ауданынан келген жеке кәсіпкер Гүлжамал Әліп шағын бизнестегі әйелдердің құқықтары мен мүмкіндіктеріне тоқталды. Темір ауданындағы Шұбарқұдық гим­назиясының мұғалімі, «Жас Отан» ЖҚ көшбасшысы Назгүл Қа­жымұқан қазіргі заманғы Қазақ­стан әйелінің жаңару жолы ха­қын­да ой өрбітті. Одан кейін сөйл­еу­шілер мемлекетіміздің гендерлік саясатын жандандыруда саяси пар­тиялардың рөлін күшейтуге, құн­дылықтарды қалыптастырудағы от­басы рөліне, отанды сүюдің от­ба­сынан басталатынына, гендерлік саясаттағы жастардың рөліне қа­тысты ой-пікірлерін ортаға салды. Конференцияға қатысқан об­лыс әкімі Елеусін Сағындықов қысқа­ша сөз сөйлеп, облыстың экономи­калық-әлеуметтік даму бағытта­ры­мен таныстырды. Өңірде Елбасы Нұрсұлтан Назарбаевтың «Бола­шақ­тың іргесін бірге қалаймыз» атты Қазақстан халқына арнаған биылғы Жолдауынан туындайтын міндеттер мен межелі жұмыстар­ды орындауға мүмкіндік толық екенін атап өтті. Облыстағы әйел адам­дарға көрсетіліп отырған қам­қор­лықтарды тілге тиек ете келіп, қыз-келіншектер араласпайтын қо­ғам­дық өмірдің бірді-бір саласы жоқ екенін алға тартты. Әсіресе, қыз-келіншектер мемлекеттік қыз­мет, бизнес және банк, бюджеттік салада белсенді еңбек ететінін жеткізді. Оның айтуынша, гендерлік саясат­тағы ұлағатты ұстаным қыз-ке­лін­шектердің қай салада да өз қабілет-қарымын толық ашу­ла­рына жағ­дай жасап отырған кө­рі­неді. Оның да жаны бар. Облыс әкімінің екі орынбасары, бір ау­данның әкімі нәзік жанды әйел адамдар. Ал, аудан әкімдерінің ор­ынбасарлары, бас­қарма бастықта­ры, ауылдық ок­руг әкімдері болып табысты еңбек етіп жүрген қыз-келіншектер қан­шама. Бұл жәй ғана пайыз қуу­шы­лық емес, өң­ірдегі қыз-келін­шек­тердің тапсы­рыл­ған іске үлкен жауапкершілікпен келе­тіндігі, іскерлігі деу әбден орынды. Сатыбалды СӘУІРБАЙ. Ақтөбе облысы.