• 16 Ақпан, 2017

Қазақстан-Германия: Дипломатиялық қатынастарға - 25 жыл

421 рет

көрсетілді

2 мин

оқу үшін

Egemen Qazaqstan

Биыл Қазақстан мен Германия арасындағы дипломатиялық қатынастардың орнағанына 25 жыл толды. Осы датаға орай, еліміздің Германиядағы Төтенше және өкілетті елшісі Болат Нүсіпов Германия Федеративтік Республикасы Сыртқы істер министрлігінің Шығыс Еуропа, Кавказ және Орталық Азия елдері бойынша өкілі Андреас Пешкемен кездесті. Бұл туралы Сыртқы істер министрлігінің баспасөз қызметі хабарлады. Кездесу барысында тараптар екі мемлекет басшыларының ынта-ықыласының арқасында 25 жыл ішінде Қазақстан мен Германия сенімді саяси үнқатысуға қол жеткізіп, өзара тиімді сауда-экономикалық қатынастардың аясын кеңейткені туралы айтты. Бүгінгі таңда екі ел арасындағы қатынастар табыстылығы шикізат пен технология саласындағы әріптестікте, Қазақстанда дуалды білім беруді дамыту жөніндегі «Назарбаев-Меркель» бастамасында, Берлин Еуразия клубы және басқа да екіжақты жобаларда көрініс тапқаны мәлім. Дипломатиялық қатынастардың мерейтойлық датасына орай жүздесу қазақ-герман байланыстарының стратегиялық сипатқа ие екендігін аңғартады. Дүние жүзінде болып жатқан маңызды геосаяси өзгерістер мен жаһандық қаржы-экономикалық дағдарыс кезінде Қазақстанның аймақтағы «тұрақтылық зәкірі» ретіндегі рөлінің күшейіп келе жатқанын назарға алып, Германия тарабы Қазақстанмен арада сындарлы қатынастарды сақтауға және нығайтуға маңыз беріп отыр. Қазақстан елшісі осы кездесуде А.Пешкеге Қазақстан Республикасының Президенті Нұрсұлтан Назарбаевтың қазақ-герман дипломатиялық қатынастарының орнағанына 25 жыл толуына орай Германияның Федералдық канцлері Ангела Меркельге жолдаған құттықтау сәлемін жеткізді. Сонымен қатар, ол германиялық дипломатты Қазақстан Президенті ұсынған конституциялық реформалар туралы хабардар етіп, Мемлекет басшысының «Қазақстанның Үшінші жаңғыруы: жаһандық бәсекеге қабілеттілік» атты ел халқына арнаған Жолдауының негізгі тұстарымен таныстырды.