Өзбекстан халықаралық көрмеге қатысады

Жақында «ЭКСПО-2017» комиссары Рәпіл Жошыбаевтың Өзбекстан Республикасына жұмыс сапары болды. Сапар аясында Р.Жошыбаев Өзбекстан Сыртқы экономикалық байланыстар, инвестиция және сау­да министрі Элёр Ганиевпен және «ӨзЭКСПОорталық» АҚ басқарма төрағасы – Өзбекстан ұлттық сек­ция­сының комиссары Иброхим Эр­гашевпен кездесу өткізді. ЭКСПО-2017 комиссарының Өзбекстан Сыртқы экономикалық байланыстар, инвестиция және сауда министрі Э.Ганиевпен кездесуінде тараптар екіжақты өзара ықпалдастық мәселелерін және оның алдағы даму болашағын талқылады. Р.Жошы­баев өз кезегінде Қазақстан Президенті Нұрсұлтан Назарбаевтың әлемдік қоғам­дастықтан қолдау тапқан әлем­­дік бастамалары туралы және соң­ғы кездері Мемлекет басшысы тара­пы­нан күн тәртібіне шығарылған ішкі реформалар жайында әңгімеледі. Сон­дай-ақ, ЭКСПО-2017 комиссары елор­даның әлемдік ауқымдағы аса маңыз­ды шараларды өткізетін саяси орталыққа айналғанын атап өтті. Өзбекстан Сыртқы экономикалық байланыстар, инвестиция және сауда министрі кездесу барысында әлемде көмірсутек шикізатының қоры азайып келе жатқанын, сондықтан жаһанның орнықты дамуы үшін баламалы энергия көзін тауып, оны пайдалануда бәсекелестікті арттырудың өзектілігін сөз етті. Сондай-ақ, ол Астанада өте­тін ЭКСПО-2017 көрмесінде өз елінде шы­­ға­­ры­латын күн панельдері, шағын гид­ро­энергоқұрылғылар саласындағы өзбек­стандық мамандардың жұмыс­тары көрсетілетінін және Самарқанд облысында тұрғызылып жатқан күн электр стансасының макеті ұсыны­латынын жеткізді. Кездесу қорытындысында, ЭКСПО-2017 комиссары Р.Жошы­баев пен «ӨзЭКСПОорталық» АҚ бас­­қар­ма төрағасы – Өзбекстан ұлт­тық сек­циясының комиссары И.Эргашев ЭКСПО-2017 халық­аралық көрме­сіне өзбекстандық жағының қатысуы туралы шартқа қол қойды. Дайындаған Жолдыбай БАЗАР, «Егемен Қазақстан»