Ауыр атлетика
Түрікменстан астанасы Ашхабадта ауыр атлетикадан Азия чемпионаты өтіп жатыр. Бүгінге дейін төрт зілтеміршіміз өнер көрсетті. Үш күннің қорытындысы бойынша, Қазақстан Ұлттық құрамасының қоржынында бір алтын медаль бар. Жалғыз жүлденің иегері – 69 кило салмақта сынға түскен Альберт Линдер.
Енді жарыс тұғырына тағы үш қазақстандық спортшы шығады. Азия чемпионаты 30 сәуір күні аяқталады.
Хоккей
Хоккейден Қазақстан Ұлттық құрамасы Киевте өтіп жатқан әлем чемпионатының бірінші дивизион командалары арасындағы додасына қатысуда. Хоккейшілеріміз осыған дейін мұз айдында төрт кездесу өткізіп, үшеуінде жеңіске жетіп, бір рет ұтылып қалды. Төрт ойын қорытындысы бойынша, жерлестеріміз сегіз ұпаймен өз тобында екінші орында келеді. Топтағы соңғы ойынды Қазақстан құрамасы бүгін Венгрия хоккейшілерімен өткізеді.
Айта кетейік, әлем чемпионатының элиталық дивизионына өз тобында бірінші және екінші орын алған командалар ғана шығады.
Футбол
Қазақстан Футбол федерациясы Шымкенттің «Ордабасы» клубына өз алаңында ойын өткізуге шектеу қойды. ҚФФ өкілдерінің айтуынша, Қажымұқан Мұңайтпасов атындағы орталық стадионның жарығы ФИФА талаптарына сай келмейді.
Еске салсақ, Қазақстан Футбол федерациясы осыған дейін «Атырау» және «Ақтөбе» клубтарына да өз алаңында ойын өткізуге шектеу қойған болатын.
Бокс
Геннадий Головкиннің маусым айында жекпе-жек өткізбейтіні белгілі болды. Бұл туралы боксшының промоутері Том Леффлер мәлімдеді. Оның айтуынша, Джейкобсқа қарсы жекпе-жектен кейін Головкин үшін британдық боксшы Сондерспен кездесу өткізуге уақыт тым аздық етеді. Сондықтан, ол жекпе-жектен Головкиннің командасы бас тартқан.
Леффлер 6 мамырда өтетін Альварес («Канело») – Чавес кездесуінің жеңімпазы Головкиннің келесі қарсыласы болуы ықтимал екенін айтады.
Әзірлеген
Әли БИТӨРЕ,
«Егемен Қазақстан»
