Еліміздің 13 қаласында фестивальдің іріктеу кезеңі өтті. Жобаға қатысуға 6500 бала өтініш білдіріп, 2 мыңға жуығы алғашқы іріктеу кезеңінде өнер көрсетті.
Жас дарындарды іріктеу 6 аталым, яғни вокал, ымдау, аспаптық орындау, хореография, бейнелеу және сәндік-қолданбалы өнер бойынша өтуде. Мыңға жуық бала мини-футбол, үстел теннисі, жеңіл атлетика және «асық ату» сынды спорт түрлерінен жарысты.
Атырау қаласынан фестивальға қатысқан Бекзада Аскарова Ғабит Мүсірепов атындағы №5 мектептің 8-сыныбында оқиды. Ол «Жұлдызай» фестивалі туралы «Youngstars» ансамб-
лінің көркемдік жетекшісінен білген.
– Тыныш апайым «Туған жерім – тағдырым» әнімен байқауға қатысуға ұсыныс білдірді. Маған фестиваль ұнайды. Өйткені, мен осы жерде өзімді көрсетіп, жетістікке жете аламын, – дейді жас талант.
– Біздің бес қызымыз бар. Үлкендерінің дені сау. Егіз Бекзада мен Айзада ауыр дертпен туылды. Бекзаданың құлағының мүкісі бар, әрең сөйлейді, тамақ-
ты қиналып ішеді. Соған қарамастан ақылды, талантты. Суретті жақсы салады, ағылшын тілін үйренуде, компьютерді де меңгеріп алды. Біздің емханаларда оны емдейтін мамандар жоқ, ал шет елде емделуге қаражат жетпейді. Бірақ біз бұл қиындықтарды қалайда жеңіп шығатынымызға сенемін, – дейді анасы Лариса Асқарова.
Дәстүр бойынша фестивальді танымал әртістер қолдап отырады. Биыл Атырау мен Ақтау қалаларындағы аймақтық іріктеу кезеңінің қазылар алқасына әнші Ардақ Әлекешев қосылды. Фестиваль сахнасындағы әрбір бала – өз алдына бөлек әлем. Әрбір концерттік нөмір – жас бүлдіршіндердің, ата-аналары, ұстаздары, ұйымдастырушылары мен «BI-Жұлдызай» қорын қолдайтын құрылысшылардың үлкен жеңісі.
Фестиваль 2005 жылдан бастап облыстық білім беру басқармаларының қолдауымен Астана қаласында өтіп келді. Биыл алғаш рет Алматы қаласында ұйымдастырылмақ. Спартакиада 30-31 мамырда мәреге жетеді. 1 шілдеде Республика сарайында «BI-Жұлдызай» шығармашылық фестивалінің Гала-концерті болады. Еліміздің 16 қаласынан келген ерекше таланттар осы сахнада тоғысады.
Айнаш ЕСАЛИ,
«Егемен Қазақстан»
АЛМАТЫ