Шараға қанды соғыстың зұлматын көрген ардагерлер Әбдірахман Сапаров, Әубәкір Уәлиев, тыл еңбеккері Амантай Бекниязова, майданда қаза тапқан Қайыржан Қапажановтың қызы Бәткен әжей, Астана қаласы қорғаныс істері жөніндегі басқармасының өкілдері қатысты.
– Ұрысқа Мәскеу маңындағы Волоколамск жерінде кірдім. Қазақстаннан келген жастар көп болды. Бәріміз асқан қаһармандықпен жауға қарсы тұрдық. Қырғын шайқастың әрбір сәті көз алдымда. Талай боздақ елін, жерін қорғап шейіт болды. Бір құдай қолдап, аман қалдық. Ал соғыстан кейін 43 жыл бойы мектепте математика, физика, химия пәндерінен сабақ бердім, – деп тебірене сөйледі Әбдірахман ақсақал.
Кездесуді ұйымдастырушылар Екінші дүниежүзілік соғыс жайлы арнайы әзірлеген бейнефильм көрсетті. Сондай-ақ, №30 орта мектептің оқушылары сол бір қиын кезеңді еске түсіретін мұңлы әндер шырқады.
– Соғыс басталғанда он жасар қыз едім. Майданға әкем, әкемнің інісі және ағам үшеуі кетті. Бір үйдің арқа сүйер азаматтары толығымен аттанды. Өкінішке қарай, ешқайсысы оралмады. Шешем таң атқаннан күн батқанға дейін жұмыс істейтін. Біз балалықтың не екенін білмедік. Қой да қырықтық, егін де шаптық, оның масағын да тердік. Киерге киіміміз жоқ. Қарнымыз тойып тамақ ішкен күніміз болған емес. Біздің көргенімізді Жаратқан ешкімге көрсетпесін, – деп көзіне жас алды Амантай әжей.
Жиында Бәткен әжей қанды соғыста қаза тапқан әкесінен қалған құнды заттарды Мемлекеттік мұрағатқа арнайы аманаттады.
Шара соңында «Ұлы Жеңістің кезеңдері» атты көрме ұйымдастырылды. Көрмеге Астана қаласының мұрағаты мен Қазақстан Республикасы Президенті Архивінің қорынан алынған түпнұсқа құжаттар қойылды.
Құжаттар арасында 1945 жылы шыққан «Акмолинская правда» газеті, 1941 жылы 22 маусымда КСРО Сыртқы істері халық комиссары
В.М.Молотовтың радиода сөйлеген сөздері жазылған қағаз, саяси эмигранттарды, жаудың тұтқынында болған адамдарды Қазақстанға жер аудару туралы И.В.Сталиннің жеделхаты бар. Сондай-ақ, майданға киім-кешек, азық-түлік жіберіп жатқан еңбекшілердің суреттері, сол кезден қалған заттар, тіпті соғысқа барып келген шабадан да көпшілік назарына ұсынылды.
Аян ӘБДУӘЛИ,
«Егемен Қазақстан»
