Елдік пен еркіндіктің белгісі

Биыл Қазақстан ел Тәуелсіздігінің 20 жыл­дық торқалы тойын атап өтуде. «Тәуелсіздік батыр бабаларымыз ғасырлар бойы армандап, біздің буын ғана жүзеге асыр­ған барша қазақстандықтар үшін ең қасиетті құндылық» деген Елбасының жү­рек тебірентерлік сөзі әрбір қазақ­стан­дықтың әрдайым жадында болуға тиіс. Біз небәрі жиырма жыл ішінде ғасырларға бергісіз жолдан өттік. Өз тарихымызда тұңғыш рет тәуелсіз мемлекет құрдық, барлық көршілерімізбен мемлекеттік шекарамызды мәңгілікке шегендедік, дамудың даңғылына бастаған қазақстандық жолды таптық, халықтар бірлігін сақ­тап, ел ырысын еселедік. Ең бас­тысы, әрбір қазақстандықтың жүрегіне өз Отанына, халқына, еліне, Елбасына деген мақтаныш сезімі мен патриоттық рухты сіңірдік. Осылайша қысқа мерзім аралығында жеткен жетістіктерін бүкіл әлем мой­ын­дап отырған біздің еліміз үшін Тәуел­сіз­діктің 20 жылдығын атап өтудің маңызы айрықша зор. Сондықтан да Елбасымыз еліміздің бүгіні мен келешегі үшін би­ыл­ғы жылдың маңызы ерекше екенін ескере отырып, 2010 жылғы 27 қаңтарда Тәу­елсіздіктің 20 жылдығын өткізу жөнін­де­гі жалпыұлттық іс-шаралар бағдарла­ма­сын бекіткен болатын. Ондағы әрбір шара халықтың тарихи танымын ұлғайтып, ынтымағын, бірлігін, Отанға деген сүйіс­пеншілігін арттыратындай болуы керектігін баса назарда ұстауды тапсырды.  Сонымен бірге Мемлекет басшысының Жарлығымен ел Тәуелсіздігінің 20 жыл­ды­ғын өткізу жөніндегі мемлекеттік комиссия  құрылды. Ал бұл комиссияның жұмыс органы қызметін Мәдениет министрлігі атқарады. Осыған орай министрліктің биылғы жылғы жұмыс жоспары негізінен Тәуел­сіз­діктің 20 жылдық торқалы тойымен ұштастырылды. Бұл жылдың әрбір айы белгілі бір мақсатқа арналды. Айталық, биылғы қаңтар спортты асқақтатқан ай атанды. Себебі, бұл айда Алматы және Астана қалаларында 7  Қысқы Азия ойын­дары дүркіреп өтті. Айдың басты оқиғасы Азиаданың алау шеруі және ойындардың салтанатты ашылу рәсімі болды. Сонымен қатар, осы аралықта елімізде қысқы спорттың 60-тан астам түрі бойынша жарыстар өткізілді, оқу орын­дарында 16 мыңнан астам тақырыптық іс-шаралар, сондай-ақ «Мәдени Азиада» жобасының шеңберінде 49-дан астам көрме, концерт және фестиваль ұйым­дас­тырылды. Ақпан айы Қазақстанды әлемге таныта түсетін жаңа шараларды дүниеге келтірумен ерекшеленді. Осы уақытта Президенттік мәдениет орталығында «Ел­басы», «Әлемдік аренадағы Қазақ­стан», «Қазақстанның алға өрлеуі», «Қазақстан­ның мәдениеті», «Қазақстанның таңға­жай­ып табиғаты» деген бес тақырып бойынша 200-ден астам жұмыстан құрал­ған «Әлемдік қоғамдастық мойындаған Қазақстан» атты фотоэкспозиция ұсы­нылды.  Бұдан кейін ұрпақтар сабақтас­тығына, ұлттық, дәстүрлі және отбасы­лық құндылықтарға құрмет көрсетуге арналған Наурыз айы келді. Көктемнің алғашқы айының басында, халықаралық әйелдер мерекесі қарсаңында Мемлекет басшысының қатысуымен өткен Қазақ­стан әйелдерінің съезі өтті. Бұл іс-шара­ның мерекелік ажарын Мария театрының атақты хореографы Сергей Вихаревтің қойылымындағы А.Аданның «Жизель» балеті ашты. Аталған іс-шарадағы басты партияны Париждің «GRAND OPERA» театрының солист-этуалдары орындады. Сондай-ақ, айдың әлеуметтік блогын «Нұр Отан» партиясымен бірлесіп өт­кі­зілген іс-шаралар толықтырды. 18 нау­рызда Мемлекет басшысының қаты­суы­мен Ақтөбе қаласында «Ауылдың гүл­денуі – Қазақстанның гүлденуі» акциясы басталуының салтанатты рәсімі өтті. Акцияның шеңберінде елді мекендерді абаттандыру жөніндегі жұмыстар қолға алынды. 22 наурызда Мемлекет басшы­сының жүлдесі үшін күрестен «Қазақ­стан барысы»  жарысы өтті. Сәуір айының басында еліміздің ауыз бірлігін танытқан, ел тарихында мәңгі қалатын президенттік сайлау өтті. Сайлау ел мен Елбасы ұғымының біртұтас­тығын дәлелдеді. Әлемнің ең дамыған елдері бүкілдүниежүзілік дағдарыс қыс­па­ғына ұшырап, дамушы елдері тұралап қалған шақта Қазақстан Нұрсұлтан Әбіш­ұлының дара да дана басшылығы арқасында дағдарысты еркін еңсеріп қана қоймай, өсіп-өркендеудің өзіндік өр­некті жолына түсті. Ел ішінде еңбекақы, зейнетақы және жәрдемақы түрлері еселеп өсуде. Астананың жайнап, жарқы­рауы өзге өңірлерге де ерекше серпін беріп, Қазақстанның барлық облыстары жасарып, жаңара түсті. Бүкіл Еуропа мен Азияны көктей өтетін газ, мұнай құ­бырлары, темір жол, трансұлттық автомобиль жолдарын салу қызу қолға алынып, үдемелі индустриялық-инновациялық бағ­дар­ла­масы бойынша атқарылатын жұ­мыстар табысты жүзеге асырылуда. Осы­ның бәрі Елбасының бас жылнамашысы, профессор Махмұт Қасымбеков тауып айт­қандай, «елі сүйген, елін сүйген Ел­ба­сы» атанған Мемлекет басшысының ке­мең­гер басшылық қызметінің арқасында мүмкін болды. Осыны әлдеқашан-ақ анық тү­сінген халық тарихи таңдауын мүлтіксіз жасады және оны бүкіл әлем қауым­дастығы ашық мойындады. Тәуелсіздіктің 20 жылдығын атап өту­де «Бірлік» деп аталған мамыр айының рөлі де ерекше болды. Қазақстан халқы­ның бірлігі, Ұлы Жеңіс және Саяси қуғын-сүргін құрбандарын еске алу күн­дерінің біздің еліміз үшін алатын орны қаншалықты маңызды екені айтпаса да түсінікті. Аталған күндері, Астана қала­сын қоспағанның өзінде, барлық аймақ­тар мен аудандарда, ауылдар мен бекеттерде айтулы шаралар өтіп, олардың барысында тарихқа тағзым ету, тәуел­сіздікті бағалай білу, Отанды сүю, дос­тық пен ынтымақтастықты насихаттау та­қырыптарын қозғайтын жанды жұмыс­тар жүргізілді. Бізде маусым айы патриотизмді на­сихаттауға арналды. Бұл ай биыл Мемлекеттік рәміздер күні мен Патриоттар форумын өткізу арқылы ұлықталды. «Мемлекеттік рәміздер – халқымыздың рухын, ұлттық салт-санасын, қаһарман­дығы мен даналығын, болашаққа үмітін, арман-тілегін жеткізетін ерекше құнды белгілер», деп Елбасымыз Н.Ә. Назарбаев айрықша атап көрсеткендей, шын мәнінде де рәміздер бүкіл бір ұлттың айнасы болып табылады. Өз ұлтын, туған жерін, Отанын сүйетін жан, ең алдымен өз мемлекетінің рәміздерін сыйлай білуі тиіс. Елге, жерге құрмет оның тіліне, діліне және рәміздерін қошеметтеуден арна тартады. Тәуелсіз елдің дербестігін айқындайтын белгілер де осылар. Демек, әрбір азаматтың патриоттық сезімі де аталған құнды белгілерді құрметтеуден басталса керек. Биыл сонымен қатар Тәуелсіз Қа­зақстанның әлем мойындаған, құжатпен бекітілген  рәміздерінің пайда болғанына 19 жыл болып отыр. 1991 жылы егемендікке қол жеткізгеннен кейін мемлекеттік рәміздерге байқау жарияланғаны белгілі. Сол байқаудың қорытындысында талқы­лауға түскен жүздеген жобалардың ішінен аяғын апыл-тапыл басқан жас мем­лекетіміздің Туы, Елтаңбасы, Әнұраны таңдап алынды. Сол оқиғаларға куәгер адам ретінде мен «Егемен Қазақ­стан­ның» қалың оқырмандары есіне тө­мендегі жәйтті сала кеткім келеді. Мемлекеттік тудың ашық аспан түстес көк болуы, онда бейбітшіліктің символы – алтын күн мен тәуелсіздіктің қорғаны іспеттес алтын қыранның орын алуы ту­ралы идеяны конкурс кезінде әлденеше рет қадап-қадап тұрып айтқан Елба­сымыз Нұрсұлтан Назарбаев болатын. Елтаңбаның тағдыры таласқа түскенде де, бірлігіміздің белгісі – шаңырақ пен тарихымыздың тереңдігін көрсететін қанатты тұлпарларды қорғап қалған тағы да Нұрсұлтан Әбішұлының өзі болды. Президентіміз кейін композитор Шәмші Қалдаяқовтың «Менің Қазақстаным» әні­не ақын Жұмекен Нәжімеденов жазған өлең жолдарын өз қолымен жетілдіріп, оны бүгін бәріміз қолымызды жүрегі­міздің тұсына қойып айтатын асқақ Әнұран дәрежесіне дейін жеткізді. Соны­мен қатар, халықтың нағыз сүйіп айтатын әні болып келген осы әуенді мемлеке­тіміздің Әнұранына айнал­дыруда да Елбасының таңдауы бәрін оң шешіп берді. Бүгінгі және болашақ ұрпақ мұны ешқашан естерінен шығар­маулары тиіс. Министрлік жыл сайын мемлекеттік рә­міздерді кеңінен насихаттау, жұмыс­тарды алға жылжыту мақсатында әртүрлі әлеуметтік жобаларды жүзеге асырып келеді. Олардың ішінде патриоттық жобалармен айналысатын  Қазақстанның Аза­маттық альянсы, Қазақстанның Студенттер альянсы мен Жастар конгресі, Қазақ­станның Дизайнерлер одағы секілді қо­ғамдық ұйымдар да бар. Үкіметтік емес ұйым­дармен бірге іске асырылған ауқым­ды жобалардың қатарына 2010 жылы өткізілген «Бірлігіміз жарасқан» акция­сын да жатқызуға болады. Жыл ішінде бұл акцияға 3 миллионнан астам қазақ­стандық қатысып, еліміз халықтарының татулығы мен ынтымақтастығы жайын кеңінен паш етті. 2007 жылдан бері Мемлекеттік рәміздер күніне арналған Патриоттар форумын ұйымдастыру өнегелі дәс­­түр­ге айналды. Ол 2008 жылы Түр­кіс­тан, 2009 жылы Семей, 2010 жылы Павлодар қалаларында өтсе, соңғысы жақын­да ғана Қостанай қаласында өткізілді. Кез келген мемлекетке деген құрмет мемлекеттік рәмізге деген құрметтен басталады. Бүгінде қазақтың асқақтығы­ның белгісіндей болған аспанкөк Туымыз әлемнің ең іргелі мемлекеттерінің төрін­де желбірейді. Оған Елбасымызбен бірге дүние жүзінің ең алып мемлекеттерінің басшылары басын иіп, құрмет көрсетуде. Қазақтың Әнұраны жер шарының түкпір-түкпірінде алуан түрлі музыка аспап­тарының орындалуында шырқалып жүр. Қасиетті Елтаңбамыз бедерленген Ақор­даның салтанатты залдарында әлемдік саясаттың бағыт-бағдарын айқындайтын талай халықаралық құжаттарға қол қойылды. Осының бәрі өзін қазақпын деп сезінген, жүрегі қазақ деп соғатын кез келген азаматты елі мен Елбасына деген мақтаныш сезіміне бөлеуге тиіс. Ендеше, азат Қазақстанымыздың Туы әр­дайым биіктерде желбіреп, Әнұранымыз асқақтата шырқалып, Елтаңбамыз жайнап, жарқырай берсін деп тілейміз. Мұхтар ҚҰЛ-МҰХАММЕД, Мәдениет министрі.