Ардагерін ардақтаған

«ҚазМұнайГаз» Барлау Өндіру» АҚ-тың игі істері Қазақта «жақсының жақсы­лығын айт, нұры тасысын» деген әдемі сөз бар. Әдетте, бұл сөз жақсы адамның игі істерін мадақтап, оған деген ел-жұрт­тың құрметін арттыру мақса­тында айтылатын болса керек. Дегенмен, қазіргі кезде қазақ­тың бұл әдемі сөзін бизнестің әлеуметтік жауапкершілігін сезіне білген, бұқараның әл-ауқа­тын арттырып, денсаулық сақ­тауына, білім алуына, түрлі си­паттағы тұрмыстық мәселе­лерін шешуге мүмкіндік жасап жатқан компанияларға қарата да айтуға болатын сияқты. Сондай игі істерімен көзге түсіп жүрген компаниялардың бірі де бірегейі «ҚазМұнайГаз» Бар­лау Өндіру» АҚ болса керек. Бәл­кім, компанияның қа­ра­пайым еңбек адамдары үшін, компания қызмет жасап жатқан өңір­лердің тұрғындары үшін жасап жатқан жақсылықта­ры­нан өзге аймақтардың тұр­ғын­дары хабардар емес те шығар, алайда Маңғыстау облысының, соның ішінде Жаңаөзен қаласы мен оның төңірегіндегі елді ме­кендердің тұрғындары ком­па­нияның игі істерін жыр қы­лып айтады. Оған осы өңірге жа­са­ған сапарымыз барысында куә болдық. Егер «ҚазМұнайГаз» Барлау Өндіру» АҚ-тың әлеуметтік салаға бөліп отырған қаржы­сын, халықтың тұрмысын жақ­сартуға, денсаулықтарын түзеп, саламатты өмір салтын сақтау­ға, азаматтардың білім алуы мен демалысына бөлген шы­ғыс­тарын есептесек, шамасы, қазақы салтты бұзып, «байдың асын байғұс қызғаныптының» кебі болар еді. Сондықтан, біз­дің назар салған бетте жасалған игі істерге, атқарылған жұмыс­тардың нәтижесіне ауды. Мәсе­лен, «ҚазМұнайГаз» Барлау Өн­діру» АҚ Жаңаөзен қаласы­ның іргесінде, дәлірек айтсақ 20 шақырым жерде орналасқан Қызылсай ауылына ардагерлер үйін салып беріпті. Бес мыңға жуық тұрғыны бар бұл елді мекендегі ардагерлер үйі еліміздің өзге өңірлерінде, әсіресе ауыл­дық жерлерде жиі кездеседі десек, қателескен болар едік. Өткен жылы пайдалануға берілген бұл ардагерлер үйі ауыл ақсақалда­рының бас қосатын, ардагерлер кеңесінің әртүрлі мә­селелерді талқылайтын орнына ай­налыпты. Ауылдың ақсақал­дар алқасының және ардагерлер кеңесінің төр­аға­сы Жақсылық Көңілқос­ұлы­ның айтуына қара­ған­да, осы Қы­зылсай ауылы Маң­­ғыстау мұ­найының қараша­ңы­рағы санала­ды екен. Өйткені, 1958 жылы алғашқы мұнай бар­лаушылары осында ат басын тірепті. Сөйтіп, бұл ауыл Өзен кен орнынан мұнай өндірудің алғаш­қы қадам­дары жасалған, Маң­ғыс­­тау өңірі­нің атын әлемге мұнай арқылы паш еткен аза­маттардың мекеніне айналыпты. Бүгінде бұл ауылда да мұнай өндірісінің ардагерлері, кенішті алғаш игерген мұнайшы­лар тұ­рады екен. Қызылсай елді мекені, сөз жоқ, Кеңес Одағы кезінде гүлденіп, іргесі кеңейе түссе керек. Алайда, Қазақстан тәуел­сіз­дік алған соң, еліміз нарықтық қатынастарға көшкен тұста қазақ даласының барлық түпкіріндегі елді мекендер сияқ­ты бұл ауыл да тоқырауды бастан өткізіпті. Дегенмен, 2000 жылдан басталатын экономи­ка­лық өсу кезеңінде Қызылсай ауылы да қайтадан түлей бас­тапты. «Қазір Қызылсай ауылы­ның әлеуметтік жағдайы жақса­рып келеді» дейді Жақсылық Көңілқосұлы. Ел мен жердің түлеуіне «ҚазМұнайГаз» Барлау Өндіру» АҚ және осы мекеменің «Өзенмұнайгаз» өнді­рістік фи­лиа­лы да азды-көпті еңбек сіңір­се керек. Қазір ауыл ақсақалдары осындағы бұқа­ра­ның көбін жұ­мыспен қамтамасыз етіп отырған аталған мекемеге дән риза екендіктерін жасырған жоқ. «Қаз­МұнайГаз» Барлау Өн­діру» АҚ осы ауылға тек қана ардагерлер үйін салып берумен ғана шектелмесе керек, жалпы бұл компания өңірдегі 3 мыңға жуық зейнеткерге әлеуметтік қол­дау көрсетіп отыр. Ал Жақ­сылық Көңілқос­ұлы өзінің «Қаз­МұнайГаз» Барлау Өндіру» АҚ пен «Өзенмұ­найгаз» өндірістік филиалының басшыларына ау­ыл­дың әлеу­меттік жағдайын жақ­сарту, ардагерлерге қамқорлық көрсету және басқа да өзекті мәселелер жайлы талай хат жа­з­ғанын, сол хаттардың барлығына тиісті жауап беріліп, компания тарапынан көптеген істердің ат­қарылған­дығын айтады. Мәсе­лен, өткен жылы пайдалануға берілген ардагерлер үйінің барлық керек-жарағын, техникасын компания беріпті. Тіпті, ардагерлер үйіне жеке көлік те ұсынған екен, бірақ ақсақалдар оны қажет деп таппаса керек. Өйткені, компания бас­шылары ақсақалдардың қала­ған жерлеріне баруына, қалаған ша­руасына пайдалануға ұдайы түр­де көлік бөліп, техникалармен көмектесіп тұрады екен. Жақсы­лық Көңілқосұлы «Былтыр «Қаз­МұнайГаз» Барлау Өндіру» АҚ сол кездегі басшысы Кенжебек Ибрашевпен кездесудің сәті түсті. Сонда біз осы Қызылсайға ардагерлер үйі қажет екендігін айтып едік. Кенжебек Ниязұлы бұл мәселенің шешілетіндігін айтты. Сөйтіп, арада көп уақыт өтпестен, біздің ауылға Ардагерлер үйі салынды. Мұның өзі компания басшыларының бізге, ардагерлерге, тіпті қарапайым қа­лың бұқараға жасап жатқан игі істе­рі­нің бірі ғана. Біз компания басшыларының бұл игі істерін кейінгі буынның ардагерлерге, қарияларға көрсеткен құрметі деп бағалаймыз. Міне, ұрпақ­тар сабақтастығы деген осы. Осыдан елу үш жыл бұрын алғашқы мұнай барлаушылары Өзен кенішін игеруді бастаса, қазіргі мұнайшылар сол істі жалғас­тырып қана қоймай, бізге де құрмет көрсетуде. Мұндай азаматтарға қалай разы болмай­сың?! Біз компанияның басшы­ларына, қызметкерлеріне әрқа­шан ризамыз» дейді. Біз­діңше, бұл қарапайым бұқара­ның атқамінер азаматтарға деген шынайы ықыласы болса керек. Қазіргі таңда компания ардагерлерге жылына бір рет емдеу-сауықтыру кешендерінде де­малуға жолдама да береді екен. Әрине, Сарыағаш пен Жаңақор­ғандағы санаторийлерге берілетін бұл жолдамалар зей­нет­кер­лердің денсаулығын түзе­уіне көп ықпал ететіні сөзсіз. Дегенмен, ардагерлерге көр­сетіліп жатқан бұл құрмет пен қызмет жалынды жастық шақ­тарында қар жастанып, мұз төсене жү­ріп, Маңғыстау мұ­найын өнді­руді бастап берген қариялар үшін үлкен мо­раль­дық көмек екені анық. Әдетте, ғұмырлары­ның екіндісі ауып, ақшамы жа­қындап қалған ардагерлер үшін ірі компа­ния­лар­дың қам­қор болатын кездері, ұдайы қол­дау көрсетіп тұ­ратын сәт­тері біздің қоғамда аса көп емес. Бірақ, «Қаз­Мұ­найГаз» Барлау Өнді­ру» АҚ қарияларға құрмет көр­сетіп, оларға жәрдем жасайтын екі компания болса біреуі, ал жал­ғыз мекеме болса, онда дәл соның өзі деуге де бо­ла­ды. Қы­зылсай ауы­лында атқары­лып жатқан игі істерге куә болған соң, біз осын­дай батыл тұжы­рым жасадық. Сөздің ба­сын «жақсының жақ­сылығын айт...» деп бас­тауымыздың себебі де осы. Зарина АМРАЕВА.