Қазақстан тәжірибесін негізге алады

Кеше Қазақстан Республикасының ШЫҰ-дағы төрағалығы шеңберінде еліміз Сыртқы істер министрі Ержан Қазыхановтың ШЫҰ ұлттық үйлестіруші­лері­мен және тұрақты қызмет органдары басшыларымен кездесуі өтті. Кездесу барысында Ұлттық үйлес­тіру­шілер Қазақстан сыртқы саясат ведомствосының басшысын Астанада 10-12 маусымда өткен Ұлттық үйлес­ті­ру­шілер кеңесі отырысының қорытын­дыларымен таныстырды және алдағы болатын Астанадағы ШЫҰ Саммитіндегі құжаттарға қол қою дайындығы туралы хабарлады. Кездесуден шығып, журналистерге сұхбат берген Шанхай Ынтымақтастық Ұйымындағы Қытайдың ұлттық үйлес­тірушісі Цзи Яньчи: «Біз Шанхай Ынты­мақтастық Ұйымына кейінгі төраға­лығымыз барысында Қазақстанның тәжірибесі негізінде жұмыс істейтін боламыз. Меніңше, Қазақстан Шанхай Ынтымақтастық Ұйымындағы төраға­лы­ғы барысында біраз жетістіктерге жетті. Қазақстан ұйымның дамуына үлкен үлес қосып, оның ынтымақтастығын кү­шейтуге қызмет етті. Ұйым аясында қол­ға алынған бағдарламалардың арқасында аймақтық қауіпсіздік мәселесіне ерекше назар аударылып, біздің көркейіп-өсуі­мізге қажетті жағдай жасалды. Осы үшін біз Қазақстанға өз ризашылығымызды білдіреміз»,  деді. Осы орайда келесі төрағалық қызметі Қытай Халық Республикасына көшетін­ді­гіне тоқталған Цзи Яньчи: «Қа­зақ­станнан кейін ұйымға төрағалық ететін Қытай Халық Республикасы осы елдің салып кеткен ізі негізінде жұмыс жасап, Шанхай Ынтымақтастық Ұйымын дамы­туға барынша күш салатын болады. Ол үшін біз нақты бағдарламалар мен іс-шаралар жоспарын ұсынамыз», деп атап өтті. Анар ТӨЛЕУХАНҚЫЗЫ.