Қандай жағдайда да адамдық, азаматтық келбетін жоғалтпаған, тоқтықта да, аштықта да, лауазымның биігінде де, зейнетке шыққаннан кейін де бір мінезінен айнымаған, табиғат берген өз қалпынан бір шегінбеген бір жанды білемін. Ол – бұл күнде жасы тоқсанға толып отырған белгілі мемлекет және қоғам қайраткері Сұлтан Сүлейменұлы Жиенбаев.
Ол еліміз тәуелсіздік алғанға дейін зейнеткерлікке шықты. Бүкіл саналы өмірін қоғамға, халыққа қызмет етуге арнады. Ол өмірдің бұралаң соқпағынан өтті. 1938 жылы КазГУ-ға түсті. Оқу бітірмей майданға аттанды. 1941-1944 жылдары неміс фашистерімен күресті. 100-атқыштар бригадасы құрамында соғысқа қатысты. Майдан даласында ерлік көрсетті. Орден-медальдармен марапатталды. 1944 жылы үшінші рет жараланып, елге оралды. Мұнда да жаралымын деп қарап жатпады. Түркісіб темір жолы басқармасында жұмысшыларды жабдықтау бөлімінде қызмет істеді. Қызметпен қоса сырттай оқуын да жалғастырды. 1953 жылы Мәскеудегі сауда институты арнайы дипломы бар сауда қызметкеріне бұл сала қатты зәру еді. Қазақ КСР Сауда министрлігінің өнеркәсіп тауарлары саудасы басқармасының бастығына тағайындалды.
Бұдан әрі жас жігіт өзін қызметте көрсете білді. Алматы қалалық партия комитетіне жұмысқа шақырылып, бөлім басқарды. Көп кешікпей қаладағы Фрунзе (Медеу ауданы) аудандық партия комитетінің бірінші хатшылығына сайланды. Бұл жұмыста ол өзінің іскерлігін танытты, 1960 жылы Орталық партия комитетінің сауда, қаржы бөлімінің меңгерушілігіне жоғарылатылды. Мұнда екі жыл жұмыс істеген соң республика сауда министрі болып тағайындалды. Бұл қызметті сегіз жыл атқарғаннан кейін, Қазақ КСР Министрлер Кеңесі Төрағасының орынбасары болып бекітілді. Осы қызметте ол 1984 жылы зейнеткерлікке шыққанға дейін жемісті еңбек етті. Бұл жылдары Орталық партия комитеті бюро мүшелігіне кандидат болды, әрі Республика Жоғарғы Кеңесінің депутаты болып төрт рет сайланды.
Сұлтан Сүлейменұлының қызметі сауда, қоғамдық тамақтану, олардың материалдық-техникалық базасын нығайтумен, сауда жүйесін жетілдіріп, оның мәдениетін жақсартумен, жеңіл, тамақ, тоқыма өнеркәсібін дамыту ісімен тікелей байланысты болды. Бұл салаға ұзақ жылдар іскерлікпен басшылық етті.
Сұлтан Сүлейменұлы сауда саласына келгенде, бұл кәсіптің ұнамды мамандық түріне саналмағаны белгілі. Сауда дегенді жұрт саудагерлікпен, алыпсатарлықпен шатыстырып жатты. Сауда ісінің әлеуметтік-экономикалық саясаттың маңызды саласы екендігін көп адам білмеді. Ол кезде соғыстан оралған жастар мұғалім, дәрігер, заңгер, ауылшаруашылық маманы болуға құмартып, жаппай осы оқу орындарына ағылды. Ал Сұлтан Сүлейменұлы болса, сауданы үлкен ғылым, оның өзінің заңдылықтары, теориясы, экономикалық тиімділіктері бар күрделі мамандық деп түсінді. Сөйтіп осы мамандықты таңдады. Өйткені ол сауда қызметін қоғамдық еңбек бөлінісінің өмірге қажетті бір саласы, ол ел қажетін өтейді, сұраныс пен өндірістің арасын қабыстырады.
Сұлтан Жиенбаев көпшілік жете түсіне бермейтін бұл кәсіптің білгір маманы, көрнекті басшысы ретінде таныла бастады. Еңбек еткен қызмет орындарының бәрі осы саламен тікелей байланысты болды. Жұмыста өзінің іскер басшы, жаңашыл менеджер екенін танытты. Сөйтіп республика бірінші басшысының көзіне түсті. Ең алдымен ол өзінің іскерлігімен, мемлекеттің ала жібін аттамайтын тазалығымен танылды. Әдетте сауда саласында істейтіндер дүние-мүлікке қомағай, үстеме пайда табуға, көз қысты, бармақ басты жолсыздықтарға бір табан жақын тұрады деген жалған түсінік көпшілік арасында белең алып кеткені белгілі. Бірақ Сұлтан Сүлейменұлы дүниеқоңыздыққа, байлыққұмарлыққа бой алдырмады. Жасынан тазалықпен көзін ашқан ол мұндай ашкөздікке, арам табысқа ешқашан бармады. Өйткені өмірдің мәнін, шын бағасын терең сезіне білді.
Соғыста жүргенде өзіндей қыршын жастар болашақ өмір үшін оққа ұшты. Майдандас болған қазақтың батыр қызы Мәншүк Мәметова Сұлтан ағаның көз алдында жан тапсырды, жау оғынан көз жұмды. Мұны 100-атқыштар бригадасы жайлы естелік кітабында ол жақсылап жазды. Жау қолынан қаза тапқан боздақтардың ерлігін паш етті. Сол жастар өз өмірін тірі қалғандардың қоғам байлығын, халық ырысын ұрлап-жырлау үшін, теріс жолмен жеңіл өмір сүруі үшін құрбан етті ме екен? Сұлтан мұны қалай ұмытсын. Сондықтан да ол өмірде тазалықты, имандылықты, кісіге қиянат жасамауды өзіне мұрат тұтты. Әрі әрдайым осы ұстанымына сай өмір сүрді.
Сауда министрі болғаннан бастап, оның мемлекеттік дәрежедегі қызметі басталды. Үкімет басшысының орынбасары болды. Министрлер Кеңесінің төрағасы Бәйкен Әшімовпен, кейін қазіргі Президент Нұрсұлтан Назарбаевпен қоян-қолтық тізе қосып, түсіністікпен жұмыс істеді. Өз ісіне үлкен жауапкершілікпен қарады. Бұл қасиетін республика басшылығы жоғары бағалады. Жұмыс барысында ел мүддесіне қызмет етуге, республиканың өндіргіш күштерін дамытуға, сауда жүйесін, жеңіл, тамақ өнеркәсібін өркендетуге барынша атсалысты. Мәселе шешкенде бір күннің қамын ойламай, ертеңгі күнгі нәтижесін жете ойластырды, мемлекеттік дәрежеде ойлауға дағдыланды. Қандай жұмыс тапсырылса да, соны адал, жеріне жеткізе орындауға күш салды. Соның нәтижесінде Алматыда мақта-мата комбинаты іске қосылды, барлық қалаларда әмбебап дүкендер ашылды, халықтың сұранысы жете зерттеліп, соған тапсырыс берілді, жоспарға енгізілді. Елдің тұрмысы түзеле бастауына байланысты жаңа тауарларға, қымбат үй жиһаздарына сұраныстар көбейе түсті. Қазақстанның тікелей сыртқы сауда байланысына құзыреті шектеулі болатын, оны КСРО Сыртқы сауда министрлігі арқылы жүзеге асыруға күш салынды.
Рас, С.Жиенбаевтың соғыстағы ерлігі, елдегі мемлекеттік қызметтегі еңбегі туралы азды-көпті баспасөз беттерінде, жазушылардың жазбаларында жазылды. Ал оның адами қасиеттерін аша түсетін бір фактор жайында ешқашан жазылған жоқ. Адамның қалыптасуына екі – объективтік және субъективтік фактор әсер етеді. Біріншісі – адамның өзінің еңбегі, талпынысы, ақыл-ойының қызметі болса, екіншісі – қоршаған ортаның – адамның айналасының ықпалы жатады.
С.Жиенбаевтың өмір жолына ықпал еткен – еліміздің басшылығына жақын болуы – бұл екі факторға да жатпайды. Мұны кездейсоқ немесе қосымша фактор десек те болар. Өйткені жоғары лауазымды билік өкіліне сұранып та, жалынып та жақын бола алмайсың. Бұған талпынған кез келген жан бұл ортаға кіріге алмайды. Тағдырдың кездейсоқ жағы ғана себепші болады.
Сұлтан Сүлейменұлы 60-жылдардан бастап республика басшысы Дінмұхамед Ахметұлы Қонаевтың назарына іліге бастады. Бірақ ол бірден жақын нөкерлерінің санатына қосылмады. Кейін өзінің мінезімен, адами қасиетімен, тектілігімен бірінші басшының сеніміне ие бола білді. 30 жыл бойы оның жақын серіктерінің, сенімді адамдарының бірі болды. Ал зайыбы Нұрания Әділшина болса, отағасы республика басшысының жақын адамы деп тұмсығын көтеруді білмеді. Қызметтен қол үзбеді, қызметін адал, аса зор жауапкершілікпен атқарды. Жиенбаевтар отбасы Димекеңмен бір үйде тұрды, аяқ-табағы араласты. Нұрания болса Зухра Шәріпқызының қолқанаттарының бірі ретінде қатты сыйласты, апалы-сіңлідей болды. Зухра Шәріпқызы талғампаз, оқығаны, өмірден тоқығаны көп, мәдениеті жоғары жан еді. Оған Нұрания Герейқызының тәрбиелігі, әйелдік ұяңдығы, бекзаттығы ұнаған болуы керек. Зухра жеңгей оны өзіне өте жақын ұстады, туған сіңлісіндей көрді. Мұны бүкіл Алматы білді.
Бұл жақындық Жиенбаевтар отбасына үлкен биік мәртебе еді, абырой-атаққа тікелей жол ашатын еді. Жиенбаевтар отбасы бұл мүмкіндікті пайдаланған жоқ, мұны өздеріне мұрат-мақсат тұтпады, қолда барын қанағат тұтты. Сұлтан Сүлейменұлы Үкімет басшысының орынбасары, кейін бірінші орынбасары, Орталық партия комитетінің бюро мүшелігіне ұзақ жылдар бойы кандидат болды. Бұл лауазым оның қызметіне саяси сипат көтерді. Мемлекеттік қызметші ғана емес, партиялық қайраткер мәртебесін көтерді. Облыстарға барғанда партия комитеттерінің де жұмысына араласуға, ықпал етуге жағдай жасады.
Қонаев болса, оны жайдан-жай жақын тартпағаны аян. Оны талай сынақтан өткізген болуы керек. Жиенбаев кейбір жандар секілді басқаларға дөңайбат көрсетуге, Димекеңмен жақындығынан олжа табуға тырыспады. Ұсақ әңгімеге бой алдырған жоқ. Мұны қатар жүрген әріптестері анық сезінді. Сондықтан да олар Сұлтан Сүлейменұлына қатты сенді әрі жақсы көрді. Оны азамат ретінде, мемлекет қайраткері ретінде, саяси жетекші ретінде жоғары бағалады.
Сұлтекең қызметте өзін қалай ұстаса, зейнеткерлікке шыққаннан соң да достарының бетіне тура, ашық-жарқын қарады. Өзіне деген көпшілік ілтипатын, құрметін сезінумен болды. Ол бүкпесіз сөйлейтін, таза, ашық адам. Сол мінезбен әлі де достарының сый-құрметіне бөленуде. Адам үшін бұдан асқан бақыт жоқ-ау, сірә.
Сұлтан Сүлейменұлының өмір жолына, еңбек жолына көз жүгірте отырып, онымен бірге республика басшылығында істеген тағы бір адам туралы да айта кеткім келеді. Бұл өзі соғысқа қатысқан, халыққа, қоғамға барынша адал еңбек еткен адам. Көзі тірісінде еш сөзге қалмаған. Қазақ өнері мен мәдениетіне, рухани өміріне ұзақ жылдар еңбек сіңірген Саттар Нұрмашұлы Имашев. Соғыстан қайтысымен партия комитетінде жұмыс істеді, партия тарихи институтын басқарды. Тың өлкелік партия комитетінің хатшысы болды, Орталық партия комитетінде 15 жылдай хатшысы, кейін Қазақ КСР Жоғары Кеңесі Төралқасының төрағасы болып істеді.
Ол өз жұмысын жақсы білді. Бұл кезеңде идеология саласына басшылық ету оңай шаруа емес еді. Мәскеу бәрін бақылап, жолға салып, бағытты көрсетіп отыратын. Одан тым ауытқып, мәселені өзінше жүргізе бастасаң, жоғарыдан қоңырау сарт ете қалатын. Соған қарамастан Саттар Нұрмашұлы Мәскеу алдында ел саясатын, республика рухани өмірінің мүддесін сыналап, білгірлікпен, мәмілегерлікпен жүзеге асыра білетін. Логикасы күшті болатын. Идеология саласында одақтағы білгір мамандардың, басшылардың бірінен саналатын. Сондықтан Мәскеу онымен санасты.
Бұл кезеңнің қыр-сырын жақсы түсінген ол Мәскеумен тікелей ашық қарсылыққа бармай, тіл тауып, мәмілеге келіп, ұстамдылықпен, біліммен, жүйелі дәйек келтірумен Қазақстан мүддесін орталықта шеберлікпен жүзеге асырып отырды. Оны түсінбеген кейбір осы күнгі либерал-демократтар, ұлтшыл патриоттар неге ол батыл қимыл жасамады, қорқақтыққа ұрынды деп сынайды. Бұл тоталитарлық жүйенің жойқын күшін түсінбегендік болып табылады. Тоталитарлық жүйенің қырағы көзінен құтылып кетуге болатындай көреді. Бұл ол кезде мүмкін емес еді. Орталықтың жазалау шаралары қатал әрі мейірімсіз болатын. Сондықтан ол осыны түсініп, Қонаевтың басшылығымен сабырлы саясат жүргізді.
Сұлтан Сүлейменұлының азаматтық адами қасиетіне өз замандастары да, кейінгі інілері де дән риза. Өйткені, оның мінезінде жасандылық жоқ, шын мәнінде кішіпейіл жан. Оған Мәскеуде іссапарға бірге барғанда анық көзім жетті. Әскери-патриоттық тәрбие, жастар, физкультура-спорт проблемаларына арналған одақтық кеңес болды. Оған Жиенбаев бастап, комсомол және спорт салаларының басшылары мен орталық комитеттен бөлім меңгерушісінің бірінші орынбасары болып істейтін мен де қатыстым. Сапарлас болған төртеуіміздің арасындағы жасы да, қызметі де үлкен Жиенбаев еді.
Сонда сапарлас болған үш адамнан үш түрлі мінез байқадым. Біреуі жас, албырт, дүниені қолында ұстап тұрғандай өзін еркін сезінеді. Екіншісі сәл ересек, ол да өз кәсібінің мэтрі сезінеді. Екеуі өмірге құштар, ешнәрседен аяғын жияр емес. Еркін сөйлеп, еркін байлам жасай береді, ойланып әуре болып жатпайды, кесіп түседі. Үлкеніміз Сұлтан Сүлейменұлы бұларға тіпті ұқсамайды, ең қарапайымымыз, кішіпейіліміз осы кісі болып шықты. Жымиып күле сөйлеп, ешкімді бетінен алмайды. Біз жастарға үлкендік жасап, ақыл айтып, мезі етпейді. Өз байламын, өз бағамын бұйрық ретінде емес, ұсыныс ретінде сездіреді. Қонақ үйге жиыннан соң оралғанда, жаңағы кеңесте айтылған сындардың бізге де қатысы бар-ау, бізде де ақсап жатқан жайлар жеткілікті, барған соң қолға алмасақ болмас, дегендей емеурін білдірді.
Ол үкімет тарапынан осы салаларға кураторлық ететін. Сол жолғы іссапарда ойға түйгенім: Сұлтан Сүлейменұлы адамдармен қарым-қатынаста өте қарапайым, кішіпейіл, менмендігі жоқ, өзім білемге салынбайтын демократ басшы екендігі. Ал сапарлас екі жас басшыдан байқағаным: бастықтықтың ызғары сезіледі, жастарына қарамастан ширатыла сөйлеп, біз де қара жаяу емеспіз дегендей, маңғаздығы айтпаса да сыртқа теуіп тұрды.
Біреу тойып секіреді, біреу тоңып секіреді. Жиенбаев тойып та, тоңып та секірген жоқ. Өйткені, ол жоқшылықты да, тоқшылықты да көрді. Дегенмен, таршылық көрдім деп мұңайған жоқ, еңсесі түсіп, мойыған жоқ. Өзіне бекем болды.
Жиенбаевтың майдандас достарының бірі марқұм Мағзұм Көшеков деген ағамен бірге қызметтес болғаным бар. Ол соғыста бір көзін берген, зеңбірек оғынан жараланып, контузия болған жан екен. Шайқастағы ерлігі туралы майдандық газеттерде көп жазылыпты. Туған ағасы журналист Қажым Көшековпен соғысқа бірге аттанып, соғыстан мүгедек болып жалғыз оралған.
Мағзұм Көшеков жаудың екі танкісін жайратқан дегенді оқыған жас қызметкерлер: «Мәке, мына түріңізбен (бұл кісі шағын денелі, жұқа адам болатын) екі танкіні қалай жайраттыңыз?» дегендерге даусын көтеріп: «Ол үшін жуан білек емес, үлкен жүрек керек, сонда бәрі де қолыңнан келеді. Мұны неге сұрап отырсыңдар, сенбей отырсыңдар ма, онда анау министр Сұлтан Жиенбаевтан, мынау Жекен Жұмақанов пен Әзілхан Нұршайықовтан сұраңдар, өңкей сарауыз балапандар. Сендер не көрдім дейсіңдер, ал біз болсақ, от пен суды белшесінен кешіп жүрдік, сендер бұл қылжақтарыңды қойыңдар, әйтпесе таяқ жейсіңдер», деп ренжитін. Еріккен жастарға Мәкеңді сөйлету керек. Соғыстың салқыны болар, ол кісі тез ашуланып, тез қайтатын. Жайшылықта өте әділ, шыншыл, өтірік дегенді білмейтін, бірбеткей жан еді. Мекеменің іс-қағаздарын басқаратын, ішкі тәртіпке бақылау жасайтын. Осы қызметті шын пейілімен, асқан педанттықпен жүзеге асыратын.
Сұлтан Сүлейменұлы майдандас достарына жылда Жеңіс күні сайын құттықтау хаттар жолдап тұратын. Оны Мәкең мақтанып, әріптестеріне оқып беретін. Мәкеңнің мінезі шақар, соғыс жайын сөз еткенде бейнебір сұрланып, көзінен өшпенділік оты сыртқа теуіп тұратын. Соғыстан жарымжан болып қайтқан Мәкеңді майдангер достары қатты құрметтеді. Бала мінезді аңқаулығын ескеріп, оны қолпаштап еркелететін. Сұлтан Сүлейменұлы мүсіркеу сезімін білдірмей: «Біздің Мәкең ішіміздегі ең батыр, ең жүректі жауынгер еді. 100-атқыштар бригадасының таңдаулы пулеметшісі болды», деп көпшілік көзінше көтермелеп қоятын. Бұған Мәкең мәз болып: «Біздің Сұлтан Сүлейменұлы тамаша офицер, ең сұлу жігіт еді», деп мақтай жөнелетін.
С.Жиенбаев өзінің естелік кітабында майдандас достары полковник Сақтаған Бәйішев, старшина Ыбырайым Сүлейменов, кіші лейтенант Ахметқазы Болатов, взвод командирі Рымбек Байсейітов, лейтенант Қали Біләлов, майдандық газеттің редакторы Қасым Шәріпов, полковник Әбілқайыр Баймолдин туралы жақсы жазды. Оның ішінде 280 неміс жауынгерін оққа ұшырған мерген Ыбырайым Сүлейменовтің қарындасы Айткүлдің жолдасы Жатай Жұмаділовтің алдынан дәріс алған едім. Ол кейін маған С.Жиенбаевтың кітабын оқып риза болғанын айтты.
Сұлтан Сүлейменұлы өз кітабында Мәскеудің саяси-соғыс академиясының түлегі, атақты әскербасы болған Әбілқайыр Баймолдин туралы қызғылықты жайларды жақсы баяндайды. Кәсіби офицер Ә.Баймолдиннің бойынан командирге қажетті барлық қасиеттерді табуға болатын еді. Әскери шеберлікті тамаша игерді, соғыс техникасының тілін жақсы білді, ұрыстарда өжет, қайсар мінез әрі тапқырлық таныта білді. Оның соғыстағы жауынгерлік ерлігі қазақ әскерлері арасында аңыз боп тарады, Невель майданында болған ұрыста қазақ командирі 36 жасында дүние салды. Әттең, жас өмірі қыршын кетті, деп жазды С.Жиенбаев өз кітабында.
Мұның өзі кітап авторының азаматтық қасиетін көрсетеді. Майдан даласында көз жұмған әріптестерін ұмытпай, бүгінгі жастарға жеткізуі – өнегелі іс. Бұл ерлер есімі ұмыт болмасын деген тілектен туған майдан жазбалары еді.
Сұлтан Сүлейменұлы майданда болсын, бейбіт еңбекте болсын аянбай қызмет етті. Елдің экономикасы мен әлеуметтік ахуалын жақсартуға, қоғамдағы түсіністік пен бірлікке, халықтың мәдени және интеллектуалдық ілгерілеуіне барынша атсалысты. Бұл жолда ол күш-жігерін, жастық жалынын да, білімі мен қайратын да аяған жоқ. Еңбегі босқа кеткен жоқ, лауазымы өсті, мемлекеттік деңгейдегі қызметте болды, түрлі деңгейдегі наградалардан да кенде емес.
Ешқашан ол болдым, толдым демеді. Үнемі ізденіс үстінде жүрді, оқыды, үйренді, білімін жетілдірді. Оларды күнделікті істе пайдалануға тырысты. Қарауындағы қызметкерлердің бабын таба білді. Оларға шені, лауазымы кіші деп қарамады, ет пен сүйектен жаралған, жүрегі бар, сезімі бар, намыс пен ар-ожданы бар азамат деп қарады. Өйткені сен лауазым жағынан биік болғаныңмен, адам ретінде олармен бірдейсің. Сондықтан да оларды сыйлауға, бірігіп, ақылдасып мәселе шешуге міндеттісің, деген ой әрдайым оның жадында тұрды.
Сұлтан Сүлейменұлы егде тартқанына қарамастан қоғамдық жұмыстардан сырт қалған емес. Соғыс ардагерлері арасында жиі болып, оларды жастарға патриоттық тәрбие беру ісіне тарту арқылы үлкен іс атқарып жүр. Мәскеудегі Жеңістің мерейтойларына барып, әскери шеруге бірнеше рет қатысып қайтты. Дубосеководағы панфиловшылардың ерлік көрсеткен жерлерінде болып, тағзым етуді де ұмытпады. Тәуелсіздіктің елімізде берік орнығуына өз үлесін қосып келеді. Еліміздің Тұңғыш Президенті Н.Назарбаевтың сындарлы саясатына қолдау көрсетіп, өзінің ризашылығын әрдайым білдіріп отырады. Көпшілік арасында Елбасы саясатын түсіндіруге, оның мән-мазмұнын тереңнен ашып көрсетуге күш салады. Елімізде болып жатқан қоғамдық-саяси оқиғаларды жіті бақылап отырады.
Сұлтан Сүлейменұлы үлкен өмір жолынан өтті. Бірақ оның жолы бірыңғай жеңіс пен жеміске толы болды десек, қателесер едік. Адам ретінде ол біраз қиыншылықтарды басынан кешірді. Алғашында тұңғыш немересі Айнұры мезгілсіз дүние салды. Ал өткен жылы қызы – Райхан өмірден озды. Сүйікті қызының өмірден ерте кетуі ағамызды қатты күйзелтті. Ол тағдырдың жазғанына шыдамдылық танытты. Қайғырса да қайыспады, қалған екі ұлы мен өсіп келе жатқан немере-шөберелерін тәубе етті. Зайыбы Нұрания екеуі ауыртпашылықты бірігіп көтерді, біріне-бірі тоқтау айтып, демеу болды. Жан жарасы қаншама ауыр болса да сырт көзге сыр бермеді. Тағдырдың жазғанына кім дау айтады, іштей егіліп, қайғырды, қалған тұяқтарына амандық тіледі. Жиенбаевтар отбасынан қайғысына бәріміз де қиналдық, күйзелдік.
Ел сеніміне ие болып, соны таза еңбекпен ақтауға ұмтылу – нағыз азаматтықтың белгісі. Осы күндері тоқсанға толып отырған Сұлтекеңе бұл тән қасиет. Ақылы озық, парасаты биік, шашар шуағы мол абзал азаматымыз, абыз ағамыз Сұлтан Сүлейменұлына зор денсаулық тілейміз.
Әбдеш ҚАЛМЫРЗАЕВ, философия ғылымдарының докторы, профессор. Алматы.