Алғашқы айларда атқарылған жұмыстар жетекшіге түсетін жүктің жеті батпан салмағы бар екендігін көрсетті

Елбасының Жарлығымен Алматы об­лысының әкі­мі болып тағайындалған Аңсар Мұсахановтың қыз­метке кіріскеніне 100 күн болыпты. Орайы келгенде об­лыс басшысынан жауапты қызметтің ал­ғашқы­ ай­ларында атқарылған жұмыс­тар туралы әңгі­мелеуін өтінген едік. – Аңсар Тұрсынханұлы, «Егемен­нің» тұрақты оқырмандарына иыққа түсер салмағы зор жаңа жұмыстағы 100 күндегі алғашқы әсеріңіз жайлы ой бөліссеңіз. – Айтқаныңыз орынды. Жауапкершілік жүгі қашанда ауыр. Десем де, қарбалас жұмыспен жүз күннің қалай өтіп кеткенін байқамаппын. Үлкен сенім, жоғары жауап­кершілік жүгі иығымда тұратынын да жасырмаймын. Еліміздің аса маңызды өң­ір­лерінің қатарындағы Алматы облысын басқару оңай емес. Жер жәннаты Жетісу экономикасы дамыған, бай табиғатымен, қайраткер тұлғаларымен танымал өңір. Былайша айтсақ, Елбасы Нұрсұлтан На­зар­баевтың кіндік қаны тамған киелі жер. Халыққа адал қызмет ету мен сенім үде­сінен шығуда бар қажыр-қайратымды, білімім мен тәжірибемді жұмсаудамын. – Қоғам мен мемлекет тарапынан мемлекеттік қызметкерлерге ерекше сенім білдірілген. Олардың адамгершілік, моральдық қасиеттеріне де жоғары талап қойылады. Осының бәрі басқару тәсілінде ерекше назарда болуы тиіс. Бұл жөнінде не айтар едіңіз? – Қай кезде де жұмыстың табысты, жүйелі болуы кадрларға байланысты бол­ған. Қазір де солай. Бұған дейін осы өңір­де қызмет атқардым, елмен етене аралас­тым. Осыдан да істің жайын білетін тә­жі­рибелі әріптестеріме арқа сүйеймін. Ал, жастарға сенім арту, үйрету аға буынның абыройлы ісі ғой. Бастысы, басқару эко­но­миканы әртараптандыру мен өркендетуге, облыс халқының әл-ауқатын арттыруға ба­рынша мән берілуімен бағаланады. Соны­мен қатар қоғамдық келісімді нығайту, аза­маттық қоғамды дамыту, бәсекеге қа­білетті білім беру мәселелеріне бағыт­тал­ған қажетті­ліктерді қамтамасыз етуде деп ойлаймын. – Аудан әкімдіктері мен басқармалар құрамында кадрлық өзгерістер болып, ауыс-түйіс орын алды. Жаңа тағай­ын­дал­ған аудан, қала әкімдеріне, облыс­тық құрылымдар басшыларына жүк­те­лер міндет жайлы да айта отырсаңыз. – Кадрлық өзгеріс болды әрі оның болуы қалыпты үрдіс деп ойлаймын. Ең бастысы, кадр таңдау мен тағайындауда қа­­телеспеу керек. Сондықтан, алдымен, өзі­­ңіз айтқандай, әрбір мемлекеттік қыз­мет­шінің білімі мен біліктілігі, іскерлік қа­бі­леті, моральдық-этикалық бейнесі бас­­ты назарға алынатыны анық. Елбасының Қазақстан халқына арнаған жолдауларындағы «Қазақстан – 2030» Стратегиясындағы, мемлекеттік бағ­дар­ла­ма­­лардағы, Үкімет қаулыларындағы тап­сыр­­маларды орындау барлық деңгейдегі әкім­дерге міндеттеледі. Бұл тұрғыда тұр­ғын­дар­дың тұрмыс деңгейін тұрақты кө­теру, жаңа жұмыс орындарын ашу арқылы жұ­мыс­сыздықты азайту, көмекке мұқтаж жан­дарға, әсіресе, ардагерлерге толық­қан­ды әлеуметтік қолдау көрсету, білім беру мен медициналық қызмет көрсетуді жақ­сар­ту, спорт пен туризмді, мәдениетті дам­ы­туға кө­­ңіл бөлу тәрізді бірқатар маңызды сала­лар­дағы түйінді жайларды атап өтуге болады. Мемлекеттік тіл мәртебесін көтеру, салт-дәстүр, ұлттық мәдениетіміздің мәйе­гін сақтау жұмыстары да осы қатарда. Жалпы, ортақ мақсатымыз Президенттің барлық тапсырмаларын қалтқысыз жүзеге асыру, нақты нәтиже шығаруда бар күш-жігерді жұмсау. Бұған қосарым еліміздегі мемлекеттік қызметкерлердің Ар-намыс кодексіндегі ережелерге аса байыппен қарау, міндетіне адал, еңбек тәртібін сақтау қажеттігі естен шықпауға тиісті. – Жауапты қызметіңіздегі негізгі мә­селелерді айқындап, басым бағытта­рын белгілеген боларсыз? – Әрине, қызметке кіріскеннен қолға алған алғашқы жұмыс та осы болды. Ха­лықтың жағдайынан асқан күрделі мәселе жоқ. Оларды шешу экономиканың өркен­де­уіне тәуелді екені белгілі. Оған басым­дық беріп, өндірістің дамуы мен шағын және орта кәсіпкерлікке, жаңасын ашқан­дарға қолдау көрсетуді алға қойдық. Десек те, шешімін күткен күрделі мәселе­лер жеткілікті. Ол үшін аймақтардағы жағ­дай­ды көзбен көріп, танысу мақсатымен бір­қа­тар аудандарды жұмыс сапарымен ара­ладым. Жұртшылықпен пікірлестім. Күрмеуі шешілмеген мәселелер қата­рын­да елді мекендерді ауыз сумен, үз­діксіз электр жарығымен, балабақшамен, тұрғын үймен қамтамасыз ету жайы бар. Автокөлік жолдарының сын көтермейтіні туралы өтініштер де айтылды. Өңірді дамытудың басым бағыттары жайлы айтсақ, алдымен, агроөнеркәсіптік кешенді, үдемелі индустриялық-иннова­ция­лық даму бағдарламасы аясындағы мақ­сатты жұ­мыстарды жүзеге асыруға, туризмді та­быс­ты салаға айналдыруға көңіл бөлу қажет. – Жетісу – аграрлы аймақ. Салаға жете көңіл бөлінетінін жоғарыда айт­тыңыз. Енді қандай нәтижелерге қол жеткізу көзделуде? – Қазіргі кезде жетекші салада қол жеткен табыстар атап айтарлық. Бүгінгі күні ел байлығы астыққа орақ түсті. Малға қажетті жем-шөп әзірлеу де қатар жүргізіліп келеді. Облыс бойынша 391,0 мың гектар масақты дәнді дақылдардың 82,1 мың гектары оры­лып, әр гектардан 20 центнерден өнім алынуда. Диқан қауымының көктемгі егіс және егін жинау жұмыстарына қажетті жанар-жағармай мен басқа да тауарлық құн­ды­лықтардың құнын арзандатуға 1289,2 млн. теңге субсидия бөлініп, қаражат кестеге сәйкес игеріліп келеді. Төрт түлікті өз төлі есебінен өсіру, асылдандыру бағытындағы жұмыс та нә­тижелі. Мемлекеттің жан-жақты қолдауы арқасында ауыл шаруашылығы қарқынды да­мып келеді. Жылдан-жыл­ға жиналған өнім көлемі мен сапасы өсіп, еңбек өнім­ділігі арта түскен. Сандық көр­сет­кіштерді тізбелеп айтпа­ғанның өзінде жақсы та­быс­тарға қол жеткізілгенін атап айтуға болады. Азық-түлік қауіпсіздігі бағдарла­ма­сы шең­берінде жүзеге асырылған бір­­қатар жобалар осының жар­қын айғағы. Елбасының тапсыр­ма­сы­мен Алматы қаласы ма­ңында азық-түлік белдеуін құру мақсатында үш жылға жуық уақыттың іш­інде қала маңында 20 жоба іске қосылса, құны 29 млрд. теңге болатын 28 жоба жү­зеге асырылу үстінде. Бұл жобалар сүт жә­не ет, кондитерлік өнім шығаратын, майлы дақылдарды өңдеуге бағытталған кәсіп­ор­ын­дар қатарының кө­беюі­не мүмкіндік берді. Алматы қаласы мен облыс тұрғындарын жыл бойы кө­кө­ніспен үздіксіз қамтамасыз ету мәселесі жылыжайлар мен көкөніс сақтау қойма­ла­рын салу арқылы шешімін табуда. Облыс­та бүгінгі күні 454 жы­лыжай жұмыс істесе, 104 жылыжайдың құрылысы жалғасуда. Мал тұқымын асылдандыруға барын­ша көңіл бөлінген. «Сыбаға» мемлекеттік бағ­дар­ламасы шеңберінде етті бағыттағы ірі қара малын өсіруге ден қойылып, ірі қара етін экспорттау әлеуетін арттыру мақ­са­тын­дағы жұмыстар жалғасын тап­қан. Бүгінгі күні жоба қатысушысы болып 813 заңды тұлға белгіленсе, оларда 43,6 мың аналық бас ірі қара бағылуда. Балқаш ау­данындағы «Динар Ранчо» асыл тұқымды шаруашы­лы­ғы кана­да­лық 1350 бас герефорд тұқымын сатып алды. Және ша­руа­шылық осыншама қазақ­тың ақ бас сиыр­ларын өсіріп отыр. Еліміз тәуелсіздік алған алғашқы жыл­дардағы жекешелендіру кезінде әркім өзінің шағын шаруашылығының жайын ойлаған шақта ұмытылған малшылар слетін өткізу дәстүрін қайта жаңғырту қажет деп таптық. Қиыр қонып, шет жайлаған мал­шылардың тыныс-тіршілігін, жайы­лым жағдайын, жетістігі мен шешілуге тиісті қандай мәселелері бар екенін зерттеу үшін мұндай басқосу жайлау төсінде жалғасуда. Жетісу жері дәмі тіл үйірген алманың отаны, әлемдегі барлық алманың түп мекені деп тегін танылмаған. Қазіргі кезде «Alma Prodex» серіктестігі құны 158 млн. теңгеден асатын интенсивті технологиялы бақ құру жобасының бірінші кезеңін аяқ­тады. Италия, АҚШ, Голландия, Түркия елдерінің өнімділікті бау-бақша өсірудегі интенсивті озық тәжірибелері аталмыш жобаға негіз болды. Осылайша жеміс бақтарын қалпына келтіру тиянақты іске асырылу үстінде. Қабылданған шаралар өндірілген азық-түлікпен жергілікті халықты қамтамасыз етуге толық мүмкіндік береді. Енді ке­ңей­тілген ауылшаруашылық жәрмең­келе­рін жиі өткізу, жаңа коммуналдық және кө­тер­ме базарлар, тұрмысы төмен отбасы­ла­ры­на арналған әлеуметтік дүкендер ашу ар­қылы азық-түлік бағасының негізсіз өсуі­не жол бермеу, тауар өндірушілерге қажет­ті көмек көрсету жұмыстары жалғастырылуда. Статистикалық мәліметтерге сүйенсек, ауыл шаруашылығының қорытындысы өт­кен жылдың осы мерзімімен салыстырған­да біршама өскенін байқатты. Демек, жыл­ды жақсы жетістіктермен аяқтауға барлық алғышарттар бар деп нық сеніммен айтамыз. – Биылғы Жолдауда айтылған үде­мелі индустриялық-инновациялық даму бағдарламасының орындалуына да тоқтала кетсеңіз. – Әлеуметтік жаңғырту мәселелеріне екпін берген құнды құжатта үдемелі эконо­ми­ка­лық даму міндеті алға қойылды. Осы ор­айда биыл облыста құны 8,1 млрд. теңге бо­ла­тын 8 инвестициялық жоба пайда­ла­ну­ға бе­рілуі тиіс. Сонымен қатар, респуб­ли­ка­лық жоба ретінде Мойнақ ГЭС-і мен Жетіген – Қорғас темір жол желісінің құры­лы­сын да атап өтуге болады. Осы екі жоба өң­ір­­дегі индустриялық серпіліске негіз болады. Биылғы бірінші жартыжылдықта құны 4,3 млрд. теңгелік 5 нысан іске қосылды. Олар – премикстер мен концентраттар шығаратын, «Хундай» кәсіпорнының жүк көліктері мен автобустар құрастыратын, асфальт дайындайтын, «Байсерке Агро» сүт өнімдерін өндіретін жаңа кәсіпорындар. Биылғы 4 шілде күні Мемлекет басшы­сы Нұрсұлтан Назарбаевпен тікелей теле­кө­пір байланысында «Соник Компания­сы» серіктестігінің профильді құбырлар шығаратын зауыты іске қосылғанын білесіз. Екінші жартыжылдықта құны 3,8 млрд. теңгелік 3 жобаны жүзеге асыру жоспарланған. Олар Қазақстанда бұрын-соңды өндірілмеген қорғасын-қышқылды аккумулятор батареяларын шығару, көлемі 3,65 гектарлық жылыжай құрылысы және ірі ет өңдеу кешені. Барлық 10 жоба іске қосылғанда аймақта 3 мыңнан астам адам жұмыс орнымен қамтылады. Жұмыссыздық деңгейін төмендету мақ­­сатында облыста «Жұмыс­пен қамту – 2020» бағ­дар­ламасы да жүзеге асырыла бастады. Халықпен жұ­мыс­ты жандандыру үшін атал­ған бағдарлама аясында 1 шілдеден облыста 19 жұ­мыс­пен қамту орталық­та­ры ашылды. Оған республи­ка­лық бюджеттен 229,2 млн. теңге бөлініп, 221 штаттық бірлік берілді. Өңірде «Бизнестің жол картасы - 2020» бағдарла­ма­сы бойынша белсенді жұ­мыс жүр­гізілуде. Бүгінгі күні құны 10,1 млрд. теңге болатын 31 жоба қарас­ты­ры­лып, қол­дау тапқаны да оң іс­тердің жал­ғасы деген жөн. – Әңгімеңізде халықты ауыз сумен, қуат көзімен қамтамасыз ету жайлы ай­тып өттіңіз. Осы мә­селелерді түбе­гейлі шешу жайын білсек. – Ауыз су – адам ден­саулығының бірден-бір кепілі. Жарықсыз тұрмысты да көзге елестете алмаймыз. Жалпы, облыс бойынша 770 елді мекеннің 510-ы немесе 66 пайызы орталықтанды­рыл­­ған сапалы ауыз су жүйе­сімен қамта­масыз етілген. Ал 251 елді мекенде орта­лықтандырылмаған жүйе және 9 елді мекенге ауыз су тасы­малданып жеткізілуде. Сумен қамту ісін бұдан әрі дамыту Үкімет қаулысы­мен бекітілген «Ақбұлақ» бағдарламасында қарастырылған. Жаңа бағ­дарлама ауылдық жердегі 196 елді мекен мен 5 қаланы сапалы ауыз сумен қам­ту жә­не 120 ауылды орта­лық­тандырылған су жү­йе­­сіне қосу мен ор­та­лықтанд­ырыл­ған су жүйе­сін пайдалана­тын халық санын 170 мың адамға жеткізуді көздейді. Қазіргі кезде 48 нысанның сумен қамту жүйеле­рін қай­та жабдықтау құры­лысы жүргізіл­се, құ­ны 6,1 млрд. теңгелік жобалық-сме­талық құ­жаттар дайындалу үс­тінде. Атал­ған шаралар ау­қымында өңір тұр­ғын­д­а­рын қа­жетті мөл­шер­де сапалы ау­ыз сумен қамта­ма­сыз етуге мүмкіндік беретінін айтқан жөн. Электр жарығы мәселесіне келетін бол­сақ, облыстағы тұтыну деңгейінің өсуі электр қуаттарын арттыру қажеттілігін ал­ға қойып отыр. Бұл күрмеуі қиын мәселе инвестициялық бағдарламалар арқылы бір­неше жылдан кейін шешімін тапты, яғни облыста жұмыс істеп тұрған электр жүйесі компаниялары бұл проблеманы шығындарын электр тасымалы тарифінің құрамына енгізу арқылы шешті. Енді ал­дағы үш жылда аталмыш жүйені дамытуға 4 млрд. теңге инвестиция тарту көзделген. Оларға коммуналдық меншіктегі және иесіз қалған электр желілерін өткізіп беру жұмыстары жүріп жатыр. Облыста рес­пуб­ликалық бюджет есебінен ұлттық эл­ектр желілерін модернизациялау бағдарла­ма­сымен құны 8,0 млрд. теңге болатын екінші кезеңді жүзеге асыру, сол сияқты 54,3 млрд. теңгелік екі ірі подстансаның құрылысын жүргізу жоспарланған. Өңірдегі электр энергиясын тұтыну қа­жеттілігінің өсуіне байланысты 300 мега­ват­тық Мойнақ ГЭС-інің құрылысы аяқта­лу­ға жақын. Бұл ел Тәуелсіздігінің 20 жыл­дығына деген қомақты тарту. Соны­мен қатар Балқаш жылу электр стансасы­ның құрылысы басталды. Электр энергиясын өндірудің дәстүрлі тәсілдерінен басқа күн және жел энер­ге­тикасын дамытуға көңіл бөлінуде. Бұл жұ­мыстар энергетикалық тәуелділіктен құт­қа­рып, электр қуатына деген сұранысты 2016 жылға қарай толық өтеуге мүмкіндік береді деп отырмыз. – Өткен күз бен қыста жылыту жүйесінде тосын жағдай, жылу, ыстық су мен басқа да қажеттіліктерде кемістік болмады. Жетісулықтар алдағы қыс­та осындай қызметпен қамтыла­ты­нына сенімді бола ала ма? – Халықтың амандығы, отбасының береке-бірлігі жұмысымыздың басты бағы­ты ғой. Қысқа дайындық ерте көктемнен басталғаны осыдан. Бюджеттік сала мен коммуналдық шаруашылық нысандары­ның қысқы жылыту маусымына әзірлігін облыс әкімдігі қатаң бақылауда ұстап отыр. Бұл мақсатқа бюджеттен 16,7 млрд. теңге бөлініп, мақсатты түрде игерілуде. Арнайы құрылған комиссия оны бақылау үстінде. Біріншіден, қазандықтарды жөндеу қол­ға алынды. Талдықорған қаласындағы біраз уақыт жұмыс істемей тұрған № 3 қазандық қайта жөнделіп, іске қосылады. Ескелді ауданы, Қарабұлақ кентіндегі ор­талық қазандықтың құрылысы жүріп жа­тыр. Тозығы жеткен жылу, су, кәріз желілері ауыстырылып, сұйық отынның, көмір мен мазуттың жеткілікті қоры жинақ­талу­да. Демек, облыс тұрғындарын қыста жы­лумен қамтамасыз етуде қиындық бол­майды деуге толық негіз бар. – Халыққа көрсетілетін қызмет са­пасы көбіне мектеп, аурухана, басқа да маңызды нысандармен толық қамты­луына байла­нысты. Бұл жөнінде не айтар едіңіз? – Бұл бағытта да бірқатар шаралар ат­қа­рылуда. Мәселен, облыста республика бой­ынша алғашқылардың бірі болып «100 мек­теп, 100 аурухана» бағдарламасы ая­сын­да 10 мектеп жас ұрпақ игілігіне ұсы­нылса, 4 аурухананың құрылысы аяқтал­ды. Алайда, бұл екі саладағы құрылыс осымен бітті деген сөз емес. Тек, биылғы жылдың өзінде 270 әлеуметтік нысан тұрғызылып жатыр. Жыл соңына дейін соның 170-тен астамы пайдалануға беріледі деп межеленген ны­сан­дар қатарында білім және денсаулық сақтау, мәдениет және спорт кешендері де бар. Құрылысы бас­талған 34 білім беру мекемесінің биылғы жылы 16-сын іске қосу көзделген. Оның алтауы тамыз айының со­ңын­да аяқталуы тиіс. Сонымен қатар об­лыс­та жыл соңына дейін 20 ауылдық аурухана мен дәрігерлік амбулатория халыққа сапалы медици­налық қызмет көрсететін болады. – Жан-жақты жетілген, саналы ұр­пақ тәрбиелеуде «Балапан» бағдарла­ма­сының алатын орны ерекше. Осы орайда бүлдіршіндерді балабақшамен қамту жайы қалай? – Қайта құру кезіндегі оңтайландыру барысында мектепке дейінгі мекемелер қыс­­қарғанын білесіз. Оның орнын тол­ты­ру соңғы жылдары батыл қолға алынды. Бұл бағытта оң үрдіс байқалады. Ағым­дағы жыл­дың бірінші жартыжылдығында об­лыс­та 7 балабақша ашылып, мыңға тарта балалар тәлімді тәрбиемен қамтылды. Ж­а­ңа балабақша салу, иесіз қалған бала­бақша ғимараттарын және кезінде жекешеленіп кеткен, бірақ меншік иелерінің ұсынуымен мемлекетке қайтарылған мектепке дейінгі 27 мекеме ғимараттарын күр­делі жөндеу арқылы жыл соңына дейін қатарға қоссақ деп отырмыз. Жеке меншік балабақшалар ашу үрдісі кең тарала бас­тады. Көптеген аудандардағы осындай тәрбие орындары жұмысын жалғастыр­ға­ны осының дәлелі. Облыс бойынша мектепке дейінгі мекемелерде 18 мыңнан астам бала кезекте тұр. Бүгінгі күнге мектеп жасына дейінгі бала­лар­дың балабақшамен қамтылуы 39 пайыз, бұл республикалық көрсеткіштен төмен. Сон­дықтан, бұл бағытта әлі атқа­ра­тын ау­қым­ды жұмыс жеткілікті. Өңірде 158 бала­бақша, 445 жалпы білім беретін мектеп жа­нын­дағы шағын орталық жұмыс істейді. Олар 37 мың жас ұрпақты өмірі­міз­ге лай­ық­ты өрендер қатарында тәрбие­леп, оқытып отыр. Биыл «Балапан» бағдарламасы аясын­да балаларды мектепке дейінгі тәрбиемен қамту көрсеткішін 43 пайызға жеткізуді ме­желеп отырмыз. Осылайша, балабақ­ша­мен қамту ісі жүйелі жолға қойылатын болады. – Жер жәннаты атанған өңір арқалы ақын, қаламы жүйрік жазушыла­ры­мен, мәдениет, өнер қайраткерлерінің молды­ғы­мен мақтана алады. Руханият өкілде­рі­мен байланыс орнатудағы жақ­сы бастама өзгелерге үлгі боларлық еді. Осы үр­діс­тің ендігі жалғастығы қалай болар екен? – Қоғамға жақсылық әкелетін, ұлтты ұйытатын, мүддесін көздейтін пайдалы жұмыстан кім шет қалады. Елдің игілігі үшін қолға алынған қандай да бір ұтымды үрдістер ұмытылмайды. Қасиетті мекенде өмірге келіп, жасымнан ұлттық тәрбиенің нәрімен сусындап өстім. Қазақ халқының мәдениетін, салт-дәстүрлерін, халық да­на­лығын, әдебиет пен өнерді тануыма мол мүмкіндік болғанын да айтқан жөн. Сон­дықтан егемен еліміздің өркендеуіне қол­таң­ба қалдыру, жетісулықтарды осы жақсылыққа жұмылдыру мен үшін аса маңызды әрі парызым деп білемін. Мұзарт шыңның мұзбалағы, поэзия пірі Мұқағали Мақатаевтың 80 жылдық мерейі апта соңында ақынның туған жері Райымбек ауданы, Қарасаз ауылында өт­кізіледі. Мерейтойға дайындық барысын­да ақын мұражайы қайта жасалып, жаңар­тылды. Мектеп пен мәдениет үйі күрделі жөндеуден өтті. Ауылдың ішкі-сыртқы жолдары қалпына келтірілді. Тіпті, ауыл қайта түледі десем де болады. Облыстағы басқа мәдени нысандар да назардан тыс қалмайды. Қала мен аудан, ауыл халқының рухани байланысын жа­қындастыратын аудан, қалалардың мәдени күндерін өткізу 5 тамыздан бастап жал­ғасады. Әр апта сайын екі аудан өздерінің мәдени бағдарламаларын талдықорған­дық­тар мен шаһар қонақтарына ұсынады. – Қысқа мерзімде есіңізде қалған елеулі оқиғалар қандай? – Мен үшін Елбасының алдында өзге де азаматтармен қатар Қазақстан халқы мен Президентке адал болуға ант берген сәтім мәңгі есімде қалатынын айтар едім. Салтанаттан кейін мемлекеттік биліктің беделін көтеру, ел алдындағы парызды адал атқару, тапсырылған істі орындау ту­ра­лы Елбасының тапсырмалары жадымда жатталып қалды. Бұдан кейін арқаны кеңге салып, бұрауды босатып көр. Тағы бір жай Астана қаласындағы «Көр­ме» ұлттық залында Мемлекет бас­шы­сы Нұрсұлтан Назарбаевтың алдында облыстағы индустрияландыру картасымен жүзеге асқан нысандардың таныстырылуы да санамнан шыққан емес. Жетісулықтар кездесулердегі тәжірбелі аға ұрпақтың тәлімі де мен үшін қымбат қазына. Аудандарға сапарым кезінде тұрғын­дар­мен кездесуім, «Айналайын» балалар үйі­нің тәрбиеленушілерімен жүздескен сә­тім­нен алған әсерім, ақсақалдардың ақ ба­тасы, елдің тілек-лебізі де қанат бітірді. Же­тісулықтар үшін де, мен үшін де ма­ңызды, есте қаларлық қуанышты жаңа­лық­тардың алда да көп болатынына кәміл сенемін. Облыс әкімі қызметі жоғары лауазым ғана емес, тұрғындардың әлеуметтік-тұр­мыс­тық жағдайын көтеруге, аймақтың гүл­денуіне бағытталған қиын да жауапты жұ­мыс екеніне көз жетті. Құжаттармен жұ­мыс, түрлі тақырыпта талқыланатын жи­ындар, іссапарлардың бәрі елеусіз кө­рін­генімен оның артында кадрлардың тап­сырылған қызметіне деген іскерлігін шыңдау, бағдар беру, тағысын-тағы батпандай жүк бар. Оған халықтың сенімі мен тағдырын қосыңыз. Демек, жұмыстың ірілі-ұсағы жоқ. Қай-қайсысына да жауапкершілікпен қараймын. Тоқсан ауыз сөздің тобықтай түйіні, Же­тісу халқы береке-бірлікте, «бір жаға­дан бас, бір жеңнен қол шығарып», іске жұ­мыла кірісуі нәтижесінде қандай қиын­дықты болмасын жеңіп, елдің әл-ауқатын жақсарту жолында нәтижелі жұмыс атқа­ра­мыз деп ойлаймын. – Әңгімеңізге рахмет. Әңгімелескен Күмісжан БАЙЖАН.