Қандасымыздың кезекті рөлі

Санкт-Петербургтегі Шерхан Әбілев туралы бұрын да жазған болатынбыз. Еске сала кетсек, осынау кентаулық азамат Ресейдің солтүстік астан­а­сында ұзақ жылдардан бері тұрады. Тумысынан өнерге жа­қын жан мамандығы тау-кен инженері болса да осы жерде шығарылған бірнеше фильмдерге түскен. Қазір оның кинода ойнаған рөлде­рінің саны тіпті 90-ға жетіп қалыпты. Соның ішінде орыс­тың «Особенности национальной политики», «Улицы раз­би­тых фонарей», «Бандитский Петербург» және т.б. атақты фильмдерінде де ол бірнеше образдарды сомдады. 2007 жылы «Ленфильм» түсірген «Джамбул» атты фильмде ол басты рөлді ойнап, экранда жыр алыбының бейнесін жасады. Шекең жуырда тағы бір фильмге түсе бастапты. «Мостелефильм» телекомпаниясы 1991 жылғы тамыз оқиғасына арнап «Ельцин. Три дня в августе» (жұмыстағы атауы) атты фильм түсіруді қолға алып, онда Қазақстан Президенті Н.Назарбаевтың рөлін ойнауға Шерхан Әбілевті ша­қыр­ған екен. Фильм сцена­рийі­нің авторы – О.Антонов, ал режиссері – А.Мохов. Екеуі де Ресейдің кино өнеріне та­ны­мал есімдер. Мәселен, А.Мо­ховтың «Учитель в законе», «Кукла для невесты», «Воришка» және басқа фильм­дері бар. Ал О.Антонов драма, комедия, мелодрама жанр­ларында та­нымал сценарийші. Осы күнге дейін 12 фильмнің сценарийін жазған. Соның ішінде «Свободная женщина», «Новогодний детектив», «Сирота казанская» деген фильмдері кеңінен танымал. Ал «Смер­тельный номер» атты пьесасы 1994 жылы «Хрус­тальный Турандот» сыйлығын алған. Бірақ екі автор да осы уақытқа дейін саяси тақы­рыпқа барып көр­меген екен, бұл алғашқы тал­пыныстары көрінеді. Фильмнің оқиғасы 1991 жылғы тамыз бүлігіне арнал­ған. Президент Н.Назарбаев­тың бейнесі бүліктің алдын­дағы Ново-Огаревода Ельцин, Назарбаев және Горбачев үшеуі­нің оңаша кездескендегі сәтін­де көрінеді. Осындағы құ­пия әңгімелер артынан барша әлемге белгілі болып қалғаны белгілі. Онда Ельцин мен Назарбаев Горбачевтен жаңа одақ­та ескі басшылардың өз тақтарында қалмауын талап еткен болатын. Фильмде сол ұсыныс бүліктің ұйымдасты­рылуына негіз болған деген ой меңзеледі. Шерхан Әбілев киноға түсумен қатар, кітап жазумен де айналысады. Ол соңғы жылдары «Из С-Петербурга с любовью», «Кино стало моей жизнью», «Мы сыны казахских степей» және т.б. жи­нақтар құрастырған. Жақсыбай САМРАТ.