Өзгерістер ілгерілеуге серпін береді

Біз, бүгінгі аға ұрпақ өкілдері, өткен ғасырдың 90-жылдарында Кеңес Одағы атты алып империя күйреп, ата-баба­ларымыз ар­ман­­даған Тәу­елсіздік қо­лы­мыз­ға тигеніне бөр­кі­міз­ді көкке ата қуан­ға­­ны­мыз­бен, экономи­касы тұ­ралап, ауыр дағ­да­рыс қыспағында қал­ған еліміздің ерте­ңі­не алаңдап, бар үмітімізді сол кез­­де үлкен саясат аренасында жұл­дызы жарқырай көрінген хал­қымыздың біртуар ұлы Нұр­сұл­тан Назарбаевтың есімімен бай­ла­ныс­ты­рған болатынбыз. Сол бір қиын-қыс­тау кезеңде басым көпшілігіміз ұлы Абайдың «Көп шуылдақ не табар, билемесе бір кемел?!» де­ген дана сөзіне тоқтап, 1995 жыл­ғы бүкілхалықтық референдумда елімізде күшті президенттік би­лік орнатуды қарастырған жаңа Кон­ституцияны жақтап дауыс бер­г­енбіз. Біз қателескен жоқпыз. Анты­на адалдық, сертіне беріктік та­ныт­қан Тұңғыш Президентіміз ті­рел­ген тұйықтан шығар жолды жаңылыспай тауып, халқымызды жоқшылықтан молшылыққа қарай жетелей білді. Кеше иы­ғымызға түскен зіл-батпан ауыр­т­­палық бүгінде көрген жаман түс­тей болып қана жадымызда қал­ды. Жұрт еңбекақысы мен зейнетақысын айлап ала алмай, кедейшілік зарын тартқан, қалалықтар жарық пен жылуға жарымай, суық пәтерлерінде бүр­сең қаққан, таратылған кеңшарлардағы тұрақты жұ­мыс­­тарынан айырылған ер аза­мат­тардың көбі екі қолдарына бір күрек таппай, жерге қараған, ал әйел-аналар қорадағы бір-екі сиырдан сауған сүті мен одан өндірген майын жинап, алыс-жақын қа­лаларға апарып сатып, шиеттей бала-ша­ғасын асырау­ды өз мойындарына жүктеген қилы заманды еске ал­сақ, тәубемізге келіп, Ел­ба­сының қадірін ерекше сезіне тү­семіз. Наполеонның: «Егер арыс­тан­дарға қойды басшы қылып қойсаң, онда олар қойша жуасиды, ал керісінше жасасаң, қой екеш қойға да арыстанның жүрегі бітеді», деген сөзі рас. Оған Нұрсұлтан Назарбаевтың сонау, еліміздегі экономикалық дағдарыс еңсемізді әлі де езіп-жаншып тұрған 1997 жылы қабылдаған «Қазақстан-2030» Стратегиясының ойдағыдай жү­зе­ге асырылуы айғақ. Басында оған күмәнмен қарағандар аз бол­маса да, қалың бұқара буыны қатып, бұғанасы бекімеген жас еліміз келешекте Тұңғыш Президентіміз айтқандай, барыс бейнелі, айбарлы да азулы мемлекетке айналатынына кәміл сенді және Елбасымыз биік мінберлерге шыққан сайын қайталап айтудан жалықпайтын басты құндылықтар – бірлік пен келісімнің арқасында асудан асуға көтеріліп, алға қой­ған айбынды мақсатына он бес жылдың ішін­­де қол жеткізді. Сөйтіп, әлем­­дегі бәсекеге қабілетті елу ел­дің қатарына қосылып, Айды ас­панға шығардық. Әуелден «Алдымен – экономика, содан соң – саясат» қағи­да­тын темірқазықтай бұлжытпай ұс­танып, жас елімізді ширек ғасыр уақыт ішінде бүкіл әлем таныған, беделді де қуатты мемлекетке айналдыра білген Елбасы 25 қаңтарда халқымызға Үндеу жолдап, енді өз бастамасы бойынша қолға алынған бес институттық реформаны іске асыруға арналған «100 нақты қадам» Ұлт жоспары аясында елімізде елеулі саяси өзгерістер болатындығын мәлімдеді. «Біз ұсынып отырған реформа ең алдымен өз тәжірибемізге және Қазақстанның өзінің қажет­тілік­те­ріне арқа сүйейді. Рефор­ма­лар бағдарламасы – ол Қазақ­стан қай бағытта жүреді деген сауалға біз­дің жауабымыз. Жау­ап айқын жә­не дәйекті – де­мократиялық даму жа­ғына қарай», деді Мемлекет басшысы. Елбасы өзінің «Қазақ­ст­ан­-­2050» Стра­те­гия­­­сында ай­қын­­даған ұлы мақсат – әлемдегі ең дамыған мемлекеттердің озық отыздығына ену үшін осын­­дай батыл да аса маңызды сая­­си қадамдар жасап, өзінің бір­қа­тар өкілеттігін Парламент пен Үкі­метке бергелі отыр. Ал, би­лік тармақтары арасында өкі­лет­тіктерді қайта бөлу – Пар­ла­­­мент пен Үкіметтің еліміздің әлеу­­меттік-экономикалық дамуы үшін жауапкершілігін барынша күшейтетіндігі сөзсіз. Біз алдағы уақытта парламенттік сайлауда жеңіске жеткен партия Үкіметті жасақтауға шешуші түрде ықпал етуі, Үкіметтің өз өкілеттігін бұ­рынғыдай Президенттің емес, жа­ңадан сайланған Мәжілістің алдында тоқтатуы, Үкімет мү­ше­леріне Парламент палатала­ры тарапынан сенімсіздік біл­ді­ру тәртібін оңайлату, сөйтіп би­ліктің заң шығарушы тар­ма­ғының атқарушы тармаққа ба­қылау жасауын күшейту, жер­гілікті атқарушы билікке қа­тысты да Парламенттің рөлін арттыру жөніндегі ұсыныстар еліміздің заң шығару қызметін жүзеге асыратын ең жоғары өкілді органының мәртебесін ай­тарлықтай көтеріп қана қой­май, депутаттарға жүктелген жау­ап­кершілікті де еселеп ауыр­ла­та­ты­нын санамызбен сал­мақ­тап, ұғы­нып отырмыз. Соған орай әр­қайсымыз өзіміздің ат­қа­рып жүр­ген депутаттық қыз­ме­ті­міз­ді сыни тұрғыдан талдап, оны жа­ңа да жоғары талаптарға сай же­тілдіре түсуіміз қажет. Елбасының өз билігінің елеу­лі бөлігін Парламентке өз ер­кімен беру жөніндегі кемел де бірегей шешімі елімізде пар­ла­ментаризмді дамытуға үл­кен үлес болып қосылары дау­сыз. Түптеп келгенде, Пар­ла­менттің өкілеттіктерінің кеңей­ті­­луі іске асырылып жатқан мем­­лекеттік бағдарламалардың тиім­­ділігін арттырып, бюджет қар­жысының үнемді де ұтымды жұм­салуына, сондай-ақ сыбайлас жем­қорлыққа қарсы іс-қимылды одан әрі күшейтуге оң ықпалын ти­гізіп, еліміздің әлеуметтік-эко­но­микалық дамуына соны серпін бе­рері анық. Елбасы ұсынған қисынды де­мократиялық өзгерістер уа­қыт сынынан өткен күшті пре­зи­денттік билікті сақтай отырып, беделді Парламент пен ашық Үкіметті қалыптастыру ар­қылы елімізді Мәңгілік Ел болу жолы­мен одан әрі өрлеуге бас­тай­тындығына сенімдіміз. Кәрібай МҰСЫРМАН, Парламент Мәжілісінің депутаты, «Нұр Отан» партиясы фракциясының мүшесі