Сертке лайық серпін

Елбасымыз Нұр­сұлтан На­зар­баевтың Қызылжар өңіріне жұмыс са­пары облыс диқан­да­рын биік белестерге ұмтыл­ды­рып, егін орағын ұйым­шыл­дық­пен өт­кі­зуге ерекше дем берді. Мемлекет басш­ы­сы солтүстік­қа­зақ­стан­дық­тар­дың жауапты нау­қанды ұйым­дастырудағы біліктілігін атап көрсетіп, мол астықты ысы­рап­сыз жинап ала­тынымызға үлкен сенім білдірді. Тәуелсіздігіміздің мерейлі ме­рекесі қарсаңында сертке сай серпін көрсетуді ақ­жарлықтар да үлкен абырой са­найды. Қа­зір­дің өзінде бірқатар шаруа­шылықтар астық жинауды бітіріп, келесі жылдың қамына кірісіп кеткен. Мәселен, облыстық мәсли­хат­тың депутаты Мұхамеджан Лұқ­па­нов басқаратын «Лұқ­па­нов» ЖШС 2300 гектар ал­қа­п­тың егінін ысырапсыз қам­балап алды. Гектар берекелілігі 17,5 центнерге жетті. Г. Митина жетекшілік ететін «Митин» ШҚ шығымды­лық­ты 18 центнерден айналдырды. «Нан» шаруа қо­жа­лығы да биік табыстарға қол жеткізді. «Агротехника Ақжар», «Мен­жін», «Киевское Север» секілді серіктестіктер мәреге таяу. «Бұлан­бай» ШҚ әр гектардан 25 центнер дән жинап, жарыс көшін бастады. Ақжар – астықты аудан­дар­дың бірі. Соңғы 5 жылдың ішін­де тың және тыңайған жерлерді игеру есебінен егіс алқаптары 320 мың гектарға дейін ұл­ғай­ды. Дән­ді дақылдар негізінен жа­зық далаларда өсірілетін­дік­тен, сапа­сы жоғары, балуызы 23-тен кем емес. Былтыр қуаң­шылыққа қа­ра­мастан, түсім­ді­лік 12 центнер болса, биыл 17,5 центнерден алуда­мыз. Жыл өт­кен сайын мемлекеттің аграр­лық салаға деген қаржылық қол­дауы артып келеді. Бұрын­да­ры шет ел­дер­дің техника­ла­рын сатып алуға инвесторлар ғана қауқарлы болса, қазір машина-трактор паркін серіктестіктер мен шаруа қожа­лық­тары да жаңарта бастады. Соңғы 5 жылда 6,7 миллиард тең­геге 400-ден астам шет ел­дердің қуат­ты техникалары әкелінді. Көктемгі, күзгі дала жұмыс­та­ры­ның 75-80 пайызы осындай алымды техникалармен атқарылады. Ғылым жетістіктері мен озық технологиялар да кеңінен қолданылады. Президент осы жолғы жұмыс сапарында ылғал сақтаудың нөлдік технологиясын кеңінен игеруге тапсырма берді. Ауданда ылғал сақтаудың, топырақтың құнарлылығын ке­мітпейтін тәсілді қолданатын агроқұ­ры­лымдар баршылық. Жұмысты талапқа сай ұйымдастырудың арқасында күн сай­ын 11-13 мың гектар алқаптың астығы бас­тырылуда. Ораққа 400-ге жуық комбайн тартылған. Жанар-жағар майдан тапшылық жоқ. Тасымалдау жұмысы екі ауысымда атқарылып, қырмандар мен элеваторларда да жұмыс қызу өріс алған. Сөз арасында Елбасының «Жаңа он­жыл­дық – жаңа экономикалық өрлеу – Қа­зақстанның жаңа мүмкіндіктері» Жол­дауынан туындайтын талаптарға сәйкес ұшқыр жобалардың іске асырылғанын айта кеткен жөн. Солардың бірі – Ащыкөл ауылында бой көтерген 60 мың тонналық астық қабылдау кәсіпорны. Оның құры­лыс жұмыстары мен жабдықтау қон­дыр­ғыларына 600 миллион теңге жұмсалды. Астық қабылдау, кептіру, тазалау және сақтау компьютер арқылы атқарылады. Әр­қайсысы 10 мың тонналық 6 сыйым­дылық, астық өңдейтін және кептіретін қондырғылар, қозғалтқыш тасымалда­ғыш­тар, жүк вагондары мен автомобильдерге арналған электронды таразылар шетелдердің озық технологиясына негізделген. Биыл астықтың күткендегіден де мол болатынын ескеріп, оны сақтау мәсе­лесіне айрықша назар аударып отырмыз. Астық өндірісі саласындағы биік белесіміз ел Тәуелсіздігінің 20 жылдығы мерекесіне арналған торқалы тартуымыз болмақ. Ағзам ТАСТЕМІРОВ, Ақжар ауданының әкімі. Солтүстік Қазақстан облысы.