Тілдері жатық, ойлары орамды

Мемлекеттік тілді енгізу үде­рісі телекоммуникация компа­ния­­лары жүйесінде кеңінен қол­дау тауып, бүгінгі күні белсенділікпен жалғасып келеді. 2007 жылы қазақ тілінің қолдану ая­сын кеңейту мақсатымен осы сала бойынша бірінші респуб­ли­ка­лық Тілдер фестивалінің ұй­ым­дастырылуы іске жаңаша сипат берді. Содан бері жыл сайын елі­міздің әр өңірінде осындай та­ғылымды басқосу өткізу дәс­түр­ге айналды. 5-ші Тілдер фес­тивалінің шымылдығы «Тіл тұ­тастығы – ел тұтастығы» деген атпен Қызылжар өңірінде ашы­лып, Қазақстан Республикасы Тәуелсіздігінің 20 жылдығына арналды. Игі шара Парламент Мә­жілісі депутаттарының, Ба­й­ла­ныс және ақпарат министр­лі­гінің, Солтүстік Қазақстан об­лы­сы әкімдігінің қолдауына ие болып, ұйымдастыру жұмыста­рын «АЛТЕЛ» АҚ ойдағыдай атқарып шықты. Фестивальге 6 ірі телекомму­никациялық компаниялар, атап айт­қанда, «Қазақтелеком» АҚ, Қаз­пошта» АҚ, «GSM Қазақ­стан» ЖШС, «Кар-Тел» ЖШС, «КазТрансКом» АҚ және «АЛТЕЛ» АҚ қатысып, «түрі басқа – тілегі бір, жүзі басқа – жүрегі бір» деген ұранмен өзге ұлттар­дың өк­іл­дері бақ сынасты. Фес­тиваль­дің ашылу салтанатында Ақпа­рат және байланыс министрлігі ақпа­рат және мұрағат комитеті төр­аға­сының орынб­а­са­ры, белгілі пуб­лицист, ақын Ербол Шаймерденов сөз сөйлеп, Қызылжар өңі­рінде мемлекеттік тілді да­мы­ту аясы кеңейе түс­ке­нін, бүгінгі шара соның бір кө­рінісі екенін айта келіп, сайысқа қатысу­шы­лар­ға ақ жол тіледі. «АЛТЕЛ» АҚ-тың департамент директоры Ринат Си­сембаев бә­секелі додаға еліміз­дің әр өңі­рі­нен қазақ тілі­нің май­талман­да­ры мен жүйрік­тері жи­налғанын жеткізді. Шара тақы­рып аясы­ның кеңдігімен ерек­ше­леніп, мем­лекеттік тілмен қатар қазақ халқының салт-дәс­түрле­рін, әдет-ғұрыптарын, мәде­ниетін жан-жақты насихаттау мақсатын көз­дегені аңғарылды. Жасыра­ты­ны жоқ, көптеген мекемелер мен ұй­ымдарда кеңселік іс-қағаз­дар­ды жүргізу мемлекеттік тілге көш­кенімен, экономика, банк, бай­ланыс салаларында про­бле­ма­лардың қордаланып қал­ғаны жа­сырын емес. Осы жолғы бай­қау көңілдегі күдік­терді сейілтіп, жан-жақты ізденісімен, білмекке құмарлығымен әсер етті. Бай­ла­ныс саласы қыз­меткерлері мен мамандарының қазақ тілінде еркін сөйлеп, ой­ларын анық жеткізіп, ыңғайына қарай, әдемі әзілді де, ойнақы қалжыңды да ара­лас­тырып оты­руы көкейге қонды. Мәселен, құ­рамы көп ұлтты «алтелдіктер» бар­лық кезең сында­ры­нан мүдірмей өтіп, қа­зақ тілін жап-жатық меңгеріп ал­ғандарын байқатты. Олардан тілдері жатық, ойлары ора­лым­ды «қазақтелеком­дықтар» да қа­лыспады. Бірі өзін «ұлтым татар, жүрегім – қазақ» деп таныс­тыр­са, екіншісі «ана тілін білмейтін қазақтардың алды­на үлгі болуға шықтым» деп іліп әкетіп, бой­дағы намысты қам­шы­лап жатты. Басқа командалар да жақсы дайындықпен келгендерін білдіріп бақты. «Қазақтелеком» АҚ ұйымдастыру-бақылау депар­та­­мен­тінің жетекшісі Нағима Сма­­ғұлованың сөзіне қарағанда, бас дирекцияда 19 қазақ тілін үй­ре­ну үйірмесі құрылған. Тыңдау­шы­ларға арнап арнайы сөздік­тер, тілашарлар құрастырылған. Демек, байланыс салаларында да мем­лекеттік тілдің маңызы мен қажеттілігі барған сайын артып келеді деген сөз. Мұндай көз­қа­рас алдымен тілді құрмет­теу­ден бастау алары анық. «Қаз­Транс­Ком» АҚ командасы аты­нан келген Ирина Пак та қазақ тілін үй­рену ешқандай қиын­дық­қа соқ­пағанын алға тартты. Қазылар алқасы ақылдаса келіп, бірінші орынға «АЛТЕЛ» АҚ пен «Қазақтелеком» АҚ құра­ма командаларын лайық деп тап­ты. Екінші орынды «Қазпош­та» АҚ, үшінші орынды «GSM Қазақ­стан» ЖШС жеңіп алды. Жеңім­паздар мен жүлдегерлерге ауыс­па­лы кубок, бағалы сый­лық­тар мен Байланыс және ақ­парат ми­нистрлігінің құрмет дип­ломдары табыс етілді. Жеке сайысшылар арасында І, ІІ ор­ын­дарды «Қа­зақ­телеком» АҚ-тың қызмет­кер­лері Элина Иванова мен Елена Косенкова, ІІІ орынды «АЛТЕЛ» АҚ өкілі Николай Соботович иеленді. Жеті аталым бойынша же­ңімпаздар анықталды. «АЛТЕЛ» АҚ балалар үйіне арнайы сый-сияпаттар тарту етті. Өмір ЕСҚАЛИ. Солтүстік Қазақстан облысы.