Ілкімділік танытса үлкен күш

Үкіметтік емес ұйымдар қоғам­да­ғы әлеуметтік-экономикалық дамуға сер­пін беретін үлкен үйлестіруші күш ретінде танылып отыр. Олардың аза­мат­тық қоғам құрудағы алатын орны мен рөлі қандай? Еліміздегі бірлік пен татулықты, тұрақтылық пен бейбітшілікті қалыптастыруда үкі­мет­тік емес ұйымдар қаншалықты тиімді пайда­ла­нылып жүр? ҮЕҰ-лар­дың мемлекеттік тапсырыспен жұмыс істеуі қай дең­гейде? Оларды қар­жы­лан­дыру жайы кө­ңіл көншіте ме? Үкі­меттік емес ұй­ымдар толық қай­та­рыммен жұмыс істеуі үшін не қажет? Мемлекеттік ор­ган­дардың, үкіметтік ұйымдардың жә­не бизнестің өзара байланысы уақыт та­лабына сай ма? Міне, облыстың үкі­меттік емес ұй­ым­дарының «Тәуел­сіз­дік пен әріп­тестікке-20 жыл» атты V конфе­рен­ция­сында ҮЕҰ-ға қатысты осы және басқа мәселелер күн тәр­ті­біне шы­ға­рылып, кеңінен талқыланды. Конференцияда облыс әкімі Архимед Мұхамбетов сөз алып, еліміз Тәуелсіздігінің 20 жылдығы қарса­ңын­да атқарылып жатқан ауқымды қоғамдық саяси, әлеуметтік-мәдени шараларға тоқталды. – Тәуелсіздік-мемлекетіміздің атри­­бу­ты, ұлтымыздың арманы мен мақ­саты. Еліміздің егемендігін баянды ету біздің замандастарымызға жүк­тел­ген қасиетті міндет. Осы орайда біз азаматтық қоғам институттарын дамытуға жаңаша сипат беруіміз керек. Бизнестің, үкіметтік емес ұйым­дар мен билік өкілдерінің өңірдің әл­еуметік-экономикалық дамуына бірдей атсалысуына жетуіміз қажет. Ел­басы Нұрсұлтан Назарбаев «Бо­ла­шақ­тың іргесін бірге қалаймыз» атты биылғы Қазақстан халқына Жол­дау­ында нақ осындай тапсырма берді. Ал ол мүлтіксіз орындалуы тиіс, – дей келіп әкім облыстың үстіміздегі жылдың жеті айындағы экономи­ка­лық көрсеткіштеріне шолу жасады. Ол сондай-ақ, үкіметтік емес ұй­ымдар басшыларының әр түрлі ко­мисиялардың мүшелері екенін еске сала келіп, оларды ұлттық саясатты жүзеге асыруда, әлеуметтік мәсе­ле­лер­ді шешуде және қылмыспен кү­рес­те белсенді жұмыс істеуге ша­қыр­ды. Әсіресе, жастарды отансүй­гіш­тік­ке, патриотизмге тәрбиелеуде, өң­ір­дегі жағдайды тұрақсыздандыруға қарсы күресте бірлесе іс-әрекет ету­дің қайтарымдылығын қадап айтты. Облыстық ішкі саясат басқар­ма­сы­ның бастығы Ахат Мырзалин негізінен үкіметтік емес ұйымдардың жұ­мысына, олардың мемлекеттік органдармен өзара байланысы пробле­ма­ла­ры мен перспективаларына тоқталды. Қазір облыста белсенді жұмыс істейтін 100-ге жуық үкіметтік емес ұйым бар екен. Олардың ішінде балаларды, жастарды және әйелдерді қолдау, адам құқықтарын қорғау, білім беру, денсаулық сақтау, рухани-мәдени мұ­раны қоғау, саламатты өмір салтын насихаттауды жетілдіру бағытында жұмыс істейтін үкіметтік емес ұйым­дардың өзіндік қолтаңбасы қалып­та­сып, жақсы дамыған. Жарыссөзге шыққандар үкіметтік емес ұйымдардың тәуелсіз мемлеке­ті­міздің тұғырын бекітудегі рөлі, олар­ды қаржыландыруға байланысты ой­ла­рын да ортаға салды. Мәдениет ми­нистрлігінің қоғамдық-саяси жұмыс­тар департаментінің директоры Бану Нұрғазиева қатысып, сөз сөйледі. Ол үкіметтік емес ұйымдар алдына қо­йы­­латын міндеттер мен өзекті мә­се­ле­лерді таратып айтты.Өңірдегі қоғам­дық келісімді нығайтуға, өзекті әлеу­меттік мәселелерді шешуге және өс­келең ұрпаққа отансүйгіштіктің үлгісі болатын ерлік пен мейірімділік білдірген бірқатар үкіметтік емес ұй­ым­дар басшылары мен азаматтар облыс әкімінің сыйақысымен және Қазақ­стан­ның Азаматтық альянсы бекіткен «Бірлігіміз жарасқан» медалімен ма­рапатталды. Конференцияда Астана қаласында өтетін V Азаматтық фо­румға делегаттар сайланды. Сатыбалды СӘУІРБАЙ. Ақтөбе облысы.