Колумбияда бейбіт келісімге қол қойылды

«Колумбияның революцияшыл қарулы күштерінің» жетекшісі Родриго Лондоньо Эчеверри мен осы елдің президенті Хуан Мануэль Сантос жаңа бейбіт келісімге қол қойды. Салтанатты рәсім мемлекет астанасы Богота қаласында өтті. Оған бірқатар елдің басшылары мен БҰҰ-ның Бас хатшысы қатысты, деп хабарлады lenta.ru. Жарты ғасырдан астам уақытқа созылған қақтығысқа шек қоятын құжатты келесі аптада Колумбия конгресі ратификациялайды. Бұған сәйкес, көтерілісшілер қаруын тастап, саяси партия құрады. Негізі тараптар қыркүйектің аяғында осындай бейбіт келісімді бекіткен болатын. Бірақ, өткізілген референдумда халықтың басым бөлігі қарсы дауыс берді. Тұрғындар бүлікшілерді жазаға тартуды талап етіп, ереуілдер ұйымдастырған. Естеріңізге сала кетейік, Колумбияда азаматтық соғыс 1964 жылы басталған болатын. Қақтығыстардың салдарынан бүгінге дейін 220 мыңнан астам адам қаза тауып, тағы 6 миллионға жуығы үйлерін тастап кетуге мәжбүр болды.