Алтын күз – жиын-теріннің ғана емес, жұмыстың да қайнаған кезі. Осы бір берекелі маусымда облыста тұңғыш рет саңырауқұлақ фестивалінің өткізілуінде өзіндік тағылым бары анық. Қазақстан Тәуелсіздігінің 20 жылдығы қарсаңындағы мерекелік шаралар аясындағы фестиваль жұмыспен қамту жөніндегі мемлекеттік бағдарламаны ел ішіне жақындата түскендей еді.
– Табиғаты көркем Ақмола облысы оның сансыз ырыздығынан да кенде емес, – дейді елді елең еткізген шараны ұйымдастырушы Ақмола облыстық жұмыспен қамту және әлеуметтік бағдарламаларды үйлестіру басқармасының бастығы Бақыт Есімова. – Өлкеміздегі өзін-өзі жұмыспен қамтушы 3000-нан астам адам орман жеміс-жидектері мен саңырауқұлақ жинап, оны өңдеп, сатумен айналысады. Фестивальді ұйымдастырудағы мақсатымыз – тұрғындарды шағын және орта бизнесті дамытуға шақырумен қатар, мемлекет тарапынан жасалып жатқан көмек-қолдау жөнінде түсінік беру. Біз алдағы кезде осы тұрғыдағы шаралар жұртшылық тарапынан қолдау тауып, дәстүрлі сипат алады деген сенімдеміз. Ал, бірінші шарамыздың символы болған саңырауқұлақ облысымыздың визиттік картасына айналмақ. Өйткені, өлкемізде оның тағамдық отыздан астам түрі өседі. Фестиваль барысында «Еуразия групп» ЖШС және «Туран Профи» халықаралық кәсіби академиясының мамандары шебер-сыныптар өткізетін болады.
«Астана – Бурабай» автомагистралінің Бұланды ормандарындағы қос жақтауы мерекедегідей безендірілген. Шараны ұйымдастыруға ұйытқы болған Бұланды және Еңбекшілдер аудандарының басшылығы 50 сауда нүктесін жабдықтап, киіз үйлерді де тігіп тастапты. Сахна төрінде көркемөнерпаздар үйірмесінің концерті үздіксіз жалғасын табуда. Арқан тарту, қол күресі, зілтемір көтеру сияқты жарыстардың қызығы да бір төбе. Балғындарға базарлық ретінде облыстық басқарма үрмелі аттракциондарды арқалап келгені қуанышты еселей түсті. Халықтық қолөнер шеберлерінің көрмесі тартымды әсер қалдырды.
Фестивальдің басты шарасы: «Үздік саңырауқұлақ жинаушы», «Ең үлкен саңырауқұлақ», «Білгір отбасы», «Емдік шаралар» байқауларына жұртшылық айрықша ықылас білдірді. Қазылар алқасының талқысына саңырауқұлақ, орман жидектері мен бау-бақша өнімдерінің, балдың 68 түрі ұсынылды. Жұртшылық күткендей, бас жүлде – «Саңырауқұлақ оскарын» Макин қаласының тұрғыны Александр Костров жеңіп алды. Ол осы кәсіппен арнайы патент арқылы 20 жылдан бері отбасымен бірге айналысып келеді екен. Ал, Еңбекшілдер ауданының өкілдері арасында Ольга Шевцованың мерейі үстем болды.
– Соңғы кездері бұл кәсіпке шынайы бетбұрыс байқалады, – дейді Еңбекшілдер ауданының әкімі Теміржан Хамитов. – Жаңа автобанның 40 шықырымдық жиегінде орналасқан Қаратал, Қоғам, Мәтен, Қарағай, Бұланды, Мақпал сияқты 18 ауылдың тұрғындары қосымша табыс көзін тауып отыр десек, артық айтқандық емес. Бизнестің түрлері де көбейе түсуде. Соның бірі – орман байлығын тұтынушыға ұсыну. Бүгінгі шараға 20-дан астам өкіліміз қатысуда. Біз мұндай бастаманы қолдаймыз. Алдағы кезде арнайы қабылдау пункттерін ашу ниетіндеміз.
Бұл күнгі ерекше шараға 1500 адамның қатысқандығы бастаманың баянды болатындығына сенім қалыптастырады.
Бақберген АМАЛБЕК.
Ақмола облысы.
