Жаңашылдықтан жақсылық мол

Астанада «Қазақстан темір жолы» ұлттық компаниясы» АҚ бас ғимаратында «Ой-өрістен – өркен­деуге» атты инновациялық форум өтті. Оған барлық жол бөлімшелері, филиалдар мен еншілес кәсіпорын­дардан 800-ден астам делегат қа­тысты. Форум аясындағы көрмеге өндіріске енгізілген рационализа­торлық еңбектер мен тың ұсы­ныстар қойылды. Жиын мақсаты – жаңашылға өндірісте қолайлы ахуал орнатып, әрбір еңбеккердің жұмыс барысында талантының барлық қырын ашуы­на, сол арқылы өндіріс тиімділігін арттырып, шығын көлемін азайтуға ұмты­лысына қолдау көрсету. «ҚТЖ» ҰК» АҚ президенті Асқар Мамин көрмеде теміржолшы рационализаторлардың ондаған жо­басымен, ұсыныстарымен таныс­ты. Оның барлығы темір жолдың әртүрлі саласын қамтиды. Жаңа­шылдардың үздіктері еліміз Тәуел­сіздігінің 20 жылдығына арналатын «20 жыл қорытындысы» 1-ші республикалық инновациялық форум бағдарламасына енгізілмек. Биылғы жылдың сегіз айында ком­пания қоржынына 770 ин­новациялық жоба түссе, оның 525-і өндіріске енгізілген. Ол арқылы 111 миллион теңге үнемделіпті. Компанияның бас инженері Ба­уыржан Орынбасаров бүгінгі таңда ҚТЖ қоржынында 14 ин­нова­ция­лық жобаның қаралып жатқанды­ғын айтса, оның төртеуі ноу-хау технология­лық жобалары болып табылады екен. Компанияда ин­нова­ция­лық идеялар­дың ақпарат­тық инкубаторы «4И автоматтан­дырылған жүйесі» енгізілуде. Бұл инкубатор арқылы еңбек­керлердің идеялары, ұсыныстары жинақ­талып, өңделіп, сараптаудан өткі­зіледі. Бұл ақпараттық инкубаторда қарапайым еңбеккерден бастап компания президентіне дейін интернет арқылы корпоративтік желі жүйе­сімен таныса алады. Бас инженер компанияда кадрлар біліктілігін жетілдіруге зор маңыз беріліп отырған­дығына да тоқталды. Осы­ған орай Астанада жылына 15 мың маман кәсіби-техникалық дайын­дықтан өте алатын қазіргі заманға сай жаб­дықталған оқу орталығы жасақталып жатыр. Бүгінде Астанада «Эволюшн» се­риясындағы қазіргі заманғы тепловоздар шығарылып жатса, халықара­лық Өзен – Түркімен­с­тан­мен мемлекеттік шекара және Жетіген –Қорғас темір жол желілерінің құрылысы жүргізі­луде. Ұлттық компания жаңашыл темір­жол­шылардың ұсыныстары мен рацио­нализаторлық еңбектерін өнді­ріс­ке батыл енгізуге бағыт ұстанған. Әбдірахман ҚЫДЫРБЕК.